Dizionari de Lenghe Furlane

pulît  pu|lît  [AF]

1. p.pass., adi. viôt pulî , viôt pulîsi
2. adi. che al à une superficie cence iregolaritâts e cence pontis o sim.:  ai prins di Avost, dut il Friûl - la plane, la culine, lis monts - al jere tosât e pulît come un ort (Riedo Pup, I furlans e i prâts)
   Sin. vualîf¹ , slis , regolâr , avuâl
3. adi. fat ben, cun cure e precision:  la schede presentade dal siôr Cristin, pulide, ordenade, documentade, e je stade paiade 500 francs (Riedo Pup, Il furlan al jentre in tribunâl)
   Sin. puntuâl , precîs , just , regolâr
4. adi. che nol à sporcjisie, impuritâts o ancje che nol à colpe, pecjât, tristerie e v.i.:  doi voi pulîts tant che la aghe di mont (Gianni Gregoricchio, Trê feminis)
   Sin. net
   
   1. che i plâs il net, l'ordin:  il paîs al è net e ordenât, si viôt che la int e je pulide (Alan Brusini, Gian Paolo Linda, I forescj)
5. adi. che al va daûr des normis de creance:  un bocon di om par là, il cont: misurât, educât, nol berghelave mai, pulît (Riedo Pup, Il façolet dal Dacian)
   Sin. fin¹ , finet , creançôs , creançât , educât
   
   1. che si vistìs cun finece, cun elegance:  [une femine] di mieze etât, pulide, che e trai a siôr (Pieri Somede dai Marcs, La buteghe dal barbîr)
      Sin. fin¹ , finet , elegant , ben montât
6. av. in maniere considerade buine o intune cualsisei maniere positive:  ti tratarà pulît / e ti amarà il marît (Pieri Çorut, Par lis gnocis Campiut-Fabris); a Bidin no i coventà resonâ tant a dilunc par decidisi… E dut al le pulît (Riedo Pup, Chei di Martrent); la femine si met di impegn e lis cuei cussì pulît che a nasavin bon par dut il borc (Andreina Nicoloso Ciceri, Lis pernîs - Racconti popolari friulani I)
   Sin. ben , cemût che Diu al comande , cemût che si dêf , just , te maniere juste , come che Diu comande , come che si dêf
   
   1. daûr des regulis di creance e di rispiet:  "Ti racomandi, Angjeliche, viôt di vê pazience; viôt di fâ pulît. Cul to temperament viôt di no… viôt di no… viôt di no… orpo di Baco! Âstu capît?" (Vittorio Vittorello, A ogni cost)
   2. ben di salût, umôr e v.i.:  "Cemût, 'Sefut? …" "Pulît, Nunziadine! …" (Arturo Feruglio, I stivâi di Zuan Batiste); "Viôt di stâ pulît pari, se ti covente alc, claminus" (Giuliana Pellegrini, Tite, classe 1924)
   3. av. in buine situazion economiche:  a i sameava che li scarpi a fossin la insegna di cui che a sta pulît e che al è paron e siôr (Novella Cantarutti, Il pan da la Guda)

Proverbis:

• il fevelâ pulît nol scortee la lenghe