Dizionari de Lenghe Furlane

sigûr  si|gûr  [FO]

1. adi. che nol compuarte pericui:  l'imagazenament [dal combustibil nucleâr] al reste sigûr in plene cuvierture di aghe fin a 85 °C (Alessandro Pascolini, Il disastri de centrâl nucleâr di Fukushima Dai-ichi); [sot l'imperi persian] si podeve lâ de Palestine fin in Indie cence problemis, parcè che lis stradis a jerin siguris (Franc Fari, Identitât e universalitât inte Bibie)
   
   1. che al da protezion dai pericui:  al è il Domo il puest plui sigûr, li nissun ancjemò al à olsât menâ un sôl colp, ma cemût rivâ cence intopâsi tai çambarlans? (Carlo Tolazzi, La salamandrie tal fûc)
      Sin. parât , protet
2. adi. che nol è in pericul:  [il sindic] al veva fat crous e zurât da discovâ i laris e al si era mitût cun fiât e passiensa, fin che la Val a si era cuietada e la zent sigura in pâs (Novella Cantarutti, Il Bolp); tecnichis e invenzions buinis par rindi plui sigure e comude la vite intes citâts (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
   Sin. parât , protet
   
   1. che nol à probabilitât di cambiâ o di lâ in piês:  une des cjossis che ai nestris paris a puedin jessi someadis plui saldis, plui siguris e fatis par durâ plui a lunc, e che invezit e mostre par ogni viers cualchi sfese […] e sarà la division de tiere e da la umanitât in tantis nazions sieradis (Josef Marchet, Su altris fondis)
3. adi. che al sucêt, al fâs la sô funzion e v.i. cence intops, cence interuzions o problemis:  lis letaris a rivavin simpri siguris là che a vevin di rivâ (Maria Forte, Cjase di Dalban)
   
   1. che si pues infidâsi:  chês jurisdizions feudâls, che a dipendevin di lôr, lis metevin tes mans di personis siguris de lôr parintât o di lôr cognossince (Josef Marchet, Cuintristorie dal Friûl fin sot la Italie)
      Sin. fidât
4. adi. che al à o che al mostre convinzion in alc o in se stes:  e jere sigure di sei a mieze cueste de boscaie e i pareve che lant di chê bande e scugnive rivà sul Cormôr (Alan Brusini, Come tai romançs); lui al è simpri pront a dîmi une peraule e soi sigure che mi dîs la veretât in cualsisei robe che i domandi (AAVV, Sul florî); a mostravin il lôr caratar fuart, une volontât sigure e i voi a pandevin bontât (Pieri Menis, Chei di Muraie)
   Sin. ciert
5. adi. che al corispuint ae realtât:  "Ma coma, Asiut, se doma alieir i vin vût novelis siguris (siguris, ti dîs) che il Turc al era encjamò a Orient tal Lusons!" (Pier Paolo Pasolini, I Turcs tal Friûl)
   Sin. ciert , confermât , garantît
   
   1. che al corispuint a un futûr che al sucedarà cence fal:  i efiets a dosis altis [di radiazions] a puedin jessi imediâts o palesâsi tal timp. […] parsore dai 8 Sv si à muart sigure (Alessandro Pascolini, Il disastri de centrâl nucleâr di Fukushima Dai-ichi)
   2. che si rive a viodi e a cognossi ben:  il troi si disglagnave sigûr sot i lôr pas, che la braide e veve par lôr, ancje tal scûr, une filusumie di lens e cisis ben cognossude (Maria Forte, La gnot di Radeschi)
6. av. cence nissun dubi:  mi pâr che ca al sedi dut a puest, dut a la grande, dut gnûf […], ca no è sigûr miserie (Pieri Somede dai Marcs, Resurezion a Pontinie); a jerin ladis ator tantis vôs sul cont de sô feride, si diseve che al varès sigûr pierdude la gjambe (Pieri Menis, Sul agâr)
   Sin. cence mancul , ciert , dal sigûr , di ciert , di sigûr , di un sigûr , par sigûr
   
   1. par tacâ, interompi o finî une frase, cun valôr enfatic:  Fatime e veve, sigûr, cirût di tirâsi fûr des dificoltâts (Carlo Sgorlon, Ombris tal infinît)
   2. tant che rispueste di conferme:  «Tu, Silan, tu âs tal cjâf da spelâ jù il bosc di Viea, no mo?» «Sigûr. E ce voresse dî?» (Novella Cantarutti, I cjans di not)
      Sin. sì , sì ve , sì po

Polirematichis e espressions idiomatichis

• a colp sigûr loc.av.
• dal sigûr loc.av.
• di sigûr loc.av.
• par sigûr loc.av.

Proverbis:

• cuant che a cjante la dordule, vint sigûr
• cuant che a son fûr madracs e carbons, si è sigûrs di lamps e tons
• cuant che il soreli la joibe al va tal nûl, domenie al plûf sigûr
• cuant che la lune e à il cercli, ploie sigure
• cuant che si dîs fasarai, si è sigûrs di no fâ mai
• dôs disgraciis a son siguris: la muart e lis tassis
• malatie lungje, muart sigure
• nuie miôr che sôi par sei sigûrs
• Sant Pauli scûr, forment sigûr