Dizionari de Lenghe Furlane

ciert  /-è-/  ciert  [FO]

1. adi. che nol à dubis:  «Il nivel di democrazie di un Paîs si misure dal mût che a vegnin tratadis lis minorancis». No sin cierts che cheste frase, assegnade al 'Mahatma' Mohandas Karamchand Gandhi, e sedi stade in efiets scrite o pronunziade dal eminent filosof e politic indian (Marc Stolf, Masse planc e cence plans. L'ûs public de lenghe furlane)
2. adi. che al è fûr di dubi, che si pues calcolâ che al sedi vêr o che al disi la veretât:  par che une opare e sedi tutelade e à di jessi une "creazion estrinsecade", ven a stâi che no coventin regjistrazions, si à dome di provâ cun provis ciertis che si è stâts i prins (Dree Venier, «No esistin piçulis leteraturis»)
   Sin. bon , clâr , evident , fidât , fondât , garantît , naturâl , palês , pandût , precîs , sperimentât , sigûr , positîf , concret , crêt
   
   1. che si cognòs cence dubi, che al è stât verificât o che si pues verificâ:  no si cjape la agriculture tant che une art, che e vedi i siei principis e lis sôs regulis poiadis sore esperiencis ciertis, daûr clime e teren (Adrian Cescje, Liniis di storie sociâl e economiche dal Friûl 1500 - 1800)
      Sin. clâr , evident , fidât , fondât , garantît , precîs , sperimentât , sigûr , positîf , concret
   2. che al sucedarà dal sigûr, che si pues previodi cun precision:  mi permet di sugjerî a voaltris compagn che al finanziadôr di definî in timps cierts (Adrian Cescje, Memoriis di politiche linguistiche); ancje il grant Newton al veve tratât la religjon tal lengaç de sience dal so timp, crodint di fâ previsions ciertis sul futûr dal mont (Sergio Cecotti, Teologjie algjebriche)
      Sin. clâr , fidât , fondât , garantît , pandût , precîs , sigûr , concret
3. adi.indef. al indiche cdn. o alc. che no si rive a descrivi o no si vûl descrivi in maniere precise:  un servizi che ogni lenghe e fâs, nomenant lis robis, al è di definî individualitâts - partint des peraulis - e di classificà. Une lenghe e ordene lis robis dal mont intune cierte maniere (Franc Fari, Il cjâf dai furlans); cuant che si crôt di vê poiât par simpri te dismentie cierts fats de nestre vite, al capite alc che ju torne a fâ dâ sù (Roberto Ongaro, Il muc); o vin simpri vude pôre che cierte int, convertide a la autonomie al ultin moment, si sedi fate indenant par inturbidî lis aghis (Josef Marchet, Cuarde e savon)
   Sin. cualchi , dât¹ , di chel , tâl
   
   1. cun valôr di atenuazion, intune cuantitât o misure no definide, che e je o che e à di jessi parsore dal minim ancje se no rive al massim:  i vûl ancje une cierte coretece par modulâ i messaçs e che chescj a puedin passâ oltri lis censuris che i aversaris, plui fuarts, a puedin meti (Sandri Di Suald, Comunicâ la autonomie); vê une cierte posizion di tignî
   2. che al à une cualitât, une misure, un valôr sotintindût e clâr pal interlocutôr, ma che par cualchi reson, ancje par delicatece, no si definìs:  une siore di une cierte etât; e je une cierte ore, o ai di lâ a cjase; par plasê no stâ a doprâ ciertis peraulis…
   3. cuntun non propri, par indicâ une persone no cognossude, pôc cognossude o che no si à ancjemò fevelât di jê:  a son vignûts a cirînus tal gno apartament di Padue doi di lôr, un ciert Franzin e un ciert Bocot, Zuan Carli Bocot, furlan di Dolegne tal Cuei (Adrian Cescje, Memoriis di politiche linguistiche); Tu Virgilio tu jeris piçul e salacor no tu varàs sintût a fevelâ di un ciert cont Pauli che al jere stât copât (Pieri Somede dai Marcs, Resurezion a Pontinie)
      Sin. tâl
   4. cun valôr spres.:  No, no, miôr nancje impaçâsi cun cierte int (Roberto Ongaro, Cretevierte)
4. pron.indef. tal pl., cualchidun, un pocjis di personis, cence definî cui o trops:  cierts a disin cussì e altris a disin il contrari
   Sin. cualchidun , ciertuns , un pôcs , cierts e cuâi
   
   1. ancje tal sing., une persone:  al è un ciert che al va in smanie par sposâsi (Pieri Çorut, Nissune lu vûl)
      Sin. tâl
5. s.m.sing. ce che al è fûr di dubi:  dî dome il ciert
6. s.m.sing. ce che al garantìs une jentrade economiche sigure, fisse:  bisugne che l'inciart / al rindi plui dal ciart (Toni Broili, Vuei fâmi muini)
7. av. cence che a puedin jessi dubis:  no je stade ciert casuâl la sielte di Udin par ospitâ tant vivôr (Angelo Floramo, Cuintristorie dal Nûfcent 1900-1910); e sperìn ciert in Crist e in lui credìn (Jaroni Blancon, II); jo vuei rifâmi ciert di cheste ofese (Ermes di Colorêt, II, 92)
   Sin. cence fal , ciertementri , cun ciertece , cun sigurece , lafè sì , po sì , po sì ve , sì , sigurementri , sì ve
8. av. tes rispuestis, par dî di sì:  "Ti visistu?" "Ciert!" (Oscar Puntel, Toni Capuozzo: «Ognidun al bale cun sô agne»); "Ti tegnistu inzornât su chel che al sucêt chi?" "Ciert. O lei simpri i cuotidians in linie…" (Natascia Gargano, Luca Manfè e il frico che al à concuistade la Americhe)
   Sin. cence fal , ciertementri , cun ciertece , cun sigurece , lafè sì , po sì , po sì ve , sì , sigurementri , sì ve , po no vûstu , vûstu di no , vûstu che no , sigûr
9. av. cun valôr interietîf, ancje enfatic, par tacâ o interompi o finî une frase, par rinfuarcî, dâ un sens di conclusion, concession o altris:  si tratave di une politiche centralizade ciert, ma che si fondave ancje sui conseis, i conciliabui, su lis riunions di ogni gjenar (Fabian Ros, La invenzion dal stât); ciert, lis sôs pôris lis à ancje jê. Pôre di un avignî che nol sedi seren. Pôre des malatiis. Pôre di no vê fate la sielte juste pe scuele superiôr (AAVV, Sul florî); ciert, cuant che Lissandri al jere lât in France, a Udin la int no lave plui ator cun caroce e cjavai, ma il trafic al jere ancjemò sopuartabil (Franca Mainardis, Il sium di Lissandri)

Polirematichis e espressions idiomatichis

• dal ciert loc.av.
• di ciert loc.av.
• par ciert loc.av.

Proverbis:

• mai bandonâ il ciert pal inciert
• no bisugne mai dî ce che no si sa di ciert
• no stâ lassâ il ciert pal inciert