Dizionari de Lenghe Furlane

cualchi  cual|chi  [FO]

1. adi.indef. dome sing., par indicâ une cuantitât numerabile no dite di un precîs ma no tant grande:  te stazion di Milan ta chei agns si veve dispès cualchi intart, e i ferovîrs no rivavin dibot mai a mantignî ce che a disevin i tabelons stampâts (Agnul di Spere, In viaç di domenie); si sintivin contents e a tornavin dentri, dulà che ju spietave alc di cene e cualchi ore di sium (Maria Forte, Cjase di Dalban); al spietà un cualchi moment, po al sintì un pas e une vôs di femine (Roberto Ongaro, Il muc)
   Var. cacu , calchi , alchi
   
   1. [BF] ancje devant di un numerâl par indicâ une aprossimazion:  zovin, di cualchi vincj agn, veva propri l'aspiet del nestri contadin di planura: biel, fuart, disinvolt (Federigo Comelli, Il me paîs)
      Cfr. un¹
2. adi.indef. dome sing., par indicâ une persone o une robe cence identificâle o individuâle di un precîs:  al ven di scrupulâ che daûr dal moviment autonomistic dal Friûl cualchi furbat al vebi manovrade la mescule a pueste par semenâ la disconcuardie, e fâ lâ strucje dute la campagne (Josef Marchet, Esam di cussience); bisugnave pûr començâ di cualchi bande. Lâ al cine, a balâ, a spas tai zardins, se si è in dôs si à plui coragjo tal lassâsi butâ la peraule (Alan Brusini, Il svindic di Rosute)
   
   1. cul articul indefinît devant, al pues segnâ in maniere no precisade no dome la persone o la robe, ma ancje une cierte lôr forme o cualitât no specificade:  jo mi soi contentade di fâti une cualchi osservazion cun biele maniere (Pieri Piçul, Vieri e gnûf)
3. adi.indef. dome sing., denant di un sostantîf che al segne alc di misurabil, par indicâ une grandece, une intensitât, un nivel no precîs, ma no tant piçul:  a rispuindin in mût straordenari al lôr compit didascalic, cuntune alegorie semplice e cuntune comunicativitât plui imediade, e ancje cun cualchi valôr stilistic (Giovanni Battauz, Flavio Cossar, Renato Iacumin, I mosaics de basiliche di Aquilee); passâ tescj di une cualchi lungjece par cirî informazions specifichis (OLF, Indicazions pe programazion didatiche curiculâr daûr de leç 482/99)
   Sin. ciert

Polirematichis e espressions idiomatichis

• cualchi volte loc.av., loc.inter.
• pierdi cualchi colp loc.v.

Proverbis:

• di un disordin cualchi volte al nas un ordin