Dizionari de Lenghe Furlane

fer  /-è-/  fer  [FO]

1. adi. che nol fâs nissun moviment:  e viodè un automobil fer daûr dal camion (Gianni Gregoricchio, Trê feminis); e je li che e spiete, ferme tant che un pipin di zes (Alan Brusini, Gian Paolo Linda, I forescj)
   Sin. blocât , dûr , fermât , imobil , impostât , inatîf , incjantât , fis
   Var. ferm
   
   1. che nol treme, che nol clope:  cjapant in man il telefon par clamâlu, la man no jere propit ferme par vie di un ciert sens di sudizion (Christian Romanin, Dino Zoff: «O vin lidrîs buinis, o vin di tignîlis di cont»)
   2. tant che comant, ancje cence verp tal imperatîf:  fer, li che tu sês! (Alan Brusini, Come tai romançs)
2. adi. dal aiar, de aghe e v.i., che no corin o che a corin une vore a planc:  la aga a è ferma, grisi li gravi e dut inselvadiît (Novella Cantarutti, Il gorc di Grimau); sot il sofit scûr un fum lizêr al jere fer come un vêl (Pieri Menis, Il pignarûl)
   Sin. cuiet , calm , stagn¹
3. adi. che nol è stât mot, che al è tal stes puest:  e fissave simpri lis stessis robis fermis te cjamare a pene iluminade (Maria Forte, Cjase di Dalban)
   Sin. fis
   
   1. (fig.) di ativitât, vore e v.i., che no ven puartade indevant:  il Micul al faseve finte di lavorâ, ma dopo cuatri palotis al lassave dut fer (Alan Brusini, Par stradis lungjis); par vie che i lavôrs di edilizie a jerin fers, i lavoradôrs furlans a son lâts pal plui in France (Matteo Ermacora, La emigrazion furlane in France 1820-1970)
4. adi. di cdn., che nol lavore:  il lavorâ al jere chel che al salvave i Moràs. Lavorâ, lavoraçâ magari, ma mai stâ fers, chê e jere la ereditât dai lôr viei (Pieri Menis, Sul agâr)
   Sin. dibant
   
   1. che no si môf parcè che nol sa ce fâ, che nol sielç:  cualchi volte al somee che i editôrs a sedin fers devant dal gnûf (Dree Venier, «No esistin piçulis leteraturis»)
   2. di alc, che nol funzione o che nol ven doprât:  cumò nol pedalave, che i zenoi i tremavin e la muele e jere ferme tant che no olsàs a zirâ (Roberto Ongaro, Cretevierte); bêçs che a restin fers in spiete di vignî doprâts (Riedo Pup, O un scherç o un scandul)
   3. (fig.) di une situazion, realtât, comunitât e v.i. che no à dinamicitât economiche, culturâl, politiche, sociâl e v.i.:  tai agns Cincuante, la Italie e jere ferme (Oscar Puntel, Mario Collavino: une bandiere furlane parsore il gnûf World Trade Center di New York)
      Sin. fis , imobil , blocât
5. adi. (fig.) cence novitâts, che nol cambie o che no si pues cambiâ:  secui di vite ferme disgotâts moment par moment, respîr par respîr, batude par batude di cûr, un compagn di chel altri (Dino Virgili, La aghe da pît la cleve); che al cori o al stedi fer, l'orloi, pôc zove: / il timp al passe istès, fer l'è il destin (Emilio Nardini, L'orloi fer)
   Sin. fis , imobil , blocât
6. adi. di vin, cence bufulutis:  "O cjol une ribuele par plasê" "Ferme o spumantizade?"
7. adi. (fig.) che al à o che al mostre sigurece:  paron di se, cul voli lustri e fer come un flôr di barburice tal forment, al mostrave une dignitât sô personâl avuâl al non de sô famee (Alan Brusini, Come tai romançs); e jere restade ben impressionade di chel fâ seriôs e zentîl e, tal stes timp, fer e decidût (Roberto Ongaro, Il muc); la sô ande e jere altere, la vôs ferme, ma i voi ju veve ros, di vê vaît (Alan Brusini, Gian Paolo Linda, I forescj)
   Sin. dûr , franc , indurant , mastin , restîf , salt² , stabil , stagn¹ , sigûr , fuart¹
8. adi. che al à ustinazion o pocje voie di adatâsi aes novitâts:  o continui ancjemò a clamâle cussì. DDR. O soi restât fer a prime de colade dal mûr (Checo Tam, La maree nere)
   Sin. dûr , indurant , ustinât , mastin , restîf , salt² , tegnadiç , indaûr
9. adi. [TS] erald. te eraldiche, di un animâl, fer su lis cuatri talpis
10. s.m. ogjet, aparât che al covente par blocâ alc:  al à metût un fer tal barcon par che nol sbati
    Sin. sigure
    
    1. piçul furniment, in gjenar di metal, ancje preziôs, par tignî dongje tocs di vistiari:  i sbufs ariôs che si alçavin des spadulis i rivavin a fîl des orelis incurnisant la muse frescje e fasint plui spic a la cjadene di aur, al fer pontât su la fassete dal cuel (Pieri Menis, Chei di Muraie)
11. s.m. [TS] dir. misure restritive de libertât personâl disponude de polizie tai confronts di personis suspietadis o indiziadis di reât:  cinc setemanis di preson e po dopo il fer domiciliâr (Angelo Floramo, Cuintristorie dal Nûfcent 1990-2000); visiti che tu sês in stât di fer (Checo Tam, Sense)
    Cfr. arest¹ , custodie
12. s.m. [TS] bancj. proviodiment che al bloche la utilizazion di un cont corint o di un dipuesit bancjari di titui
    Sin. bloc

Polirematichis e espressions idiomatichis

• a fer loc.av.
• a pît fer loc.av.
• di pît fer loc.av.
• movi la aghe ferme loc.v.
• tignî fer loc.v.
• vê tiere ferme loc.v.
• vê tiere ferme sot i pîts loc.v.

Proverbis:

• cjar che e cres no po sta ferme
• i umign a cjaminin e lis montagnis a stan fermis
• la cjar che e mene no sta mai ferme
• la mont a sta ferme e la int e cjamine
• si trussin ancje lis citis che a stan fermis su la nape