Dizionari de Lenghe Furlane

cuiet  /-èt/  cu|iet  [FO]

1. adi. di cdn., o di caratar o dal mût di stâ, che nol è agjitât, gnervôs, conturbât e v,i,:  Taresie la Mione, di fantate - jo mi visi si ben che o jeri di nît - e jere tant che un sclopon, ma cuiete e plene di sudizion, che nissun al varès pensât di viodile, dopo, a direzi une fameone come chê dai Slossars, indulà che e je lade a marît (Josef Marchet, Lis predicjis dal muini); i Lanzins a cjaminavin a braç, cence fevelâ o fevelant cu la vôs basse e cuiete (Dino Virgili, La aghe da pît la cleve); la int di chel vagon dismenteât e veve continuât a lei cuiete, o a cjacarâ (Agnul di Spere, La scjate rosse); par segnâl, une crosute / je sculpide li tal cret, / fra chês stelis nas la arbute, / sot di lôr, jo o duar cuiet (Arturo Zardini, Stelutis alpinis); nus fasaran l'onôr di lassânus in vuaite sui confins, par durmî il lôr sium plui cuiets (Josef Marchet, Legnadis e pidadis)
   Sin. bon , calm , cuç , pacific , pacjific , seren , trancuîl , pacheôs , pasât , dolç , pazient , mugnestri
   
   1. ancje come esortazion:  "Cuiet, 'Sef, cuiet. Tu viodarâs che tal ospedâl a rivaran a comedâti" (Enrico Martina, Ricuarts e inlusions)
2. adi. di bestie, che no fâs cuintri, che no je agressive:  il Baio al jere un cjaval cuiet, dolç di smuars e di buine memorie (Maria Forte, Cjase di Dalban)
   Sin. bon , calm , cuç , pacific , pacjific , trancuîl , dolç , mugnestri , dumiesti
3. adi. di dade di timp, di situazion, puest e v.i., che al da, che al mostre, che al fâs sintî calme, pâs, serenitât, che nol è disturbât o caraterizât di confusion, sunsûrs e v.i.:  il gust de vite libare e cuiete, fûr di ogni impegn e interès di robis (Alan Brusini, Par stradis lungjis); la gnot e jere cuiete, che al pareve dal impussibil che al fos tant mâl pal mont e che pôc lontan si copassin (Maria Forte, "Nossent")
   Sin. calm , pacific , pacjific , seren , trancuîl , pasât , cidin , cêt
4. adi. di aghe, aiar, element naturâl e v.i., no violent:  une aghe cence trasparence e che e tignive mâl il riflès dai lens, ma fuarte in chel so mot cuiet e slis (Maria Forte, Mabile la Lunghine); ma a no jodin sô mari pleta / a spacâ i stecs di na fassina, / cuntra il zenoli, di matina / bunora, jê e la flama cuieta (Pier Paolo Pasolini, Viers Pordenon e il mont)
   Sin. calm , pacific , pacjific , seren , trancuîl , pasât , lemit
5. adi. di mieç di traspuart, facil di menâ e no masse svelt:  e je une machine cuiete, no stâ a pretindi che e cori tant
6. s.m. situazion o cundizion cence confusion, cence sunsûrs o cence pinsîrs, pressions e v.i.:  dopo cene, tal cuiet dal fogolâr, intant che la vecje e gucjave, la Ulive e tornà sul discors di prime (Maria Forte, La tiere di Lansing)
   Sin. cidin , cidinôr , cuiete , calme¹ , trancuilitât , serenitât , pâs

Polirematichis e espressions idiomatichis

• stâ cuiet loc.v.

Proverbis:

• cuant che i fruts a stan cuiets, al è cjatîf segn
• cuant che i fruts a stan cuiets, brut segn
• cuant che i fruts a stan cuiets, segn che a son malâts
• e vâl plui une fete di polente cuiete che no une spanzade maladete
• lasse stâ cuiet il cjan cuant che al duar