pazient
/-ènt/
pa|zi|ent
[AF]
-
adi., s.m.
che, cui che al à pazience, che al è bon di sopuartâ dolôrs, disgraciis e v.i.:
te storie si cjate plui di une volte che la rabie dal pazient e je deventade la piês di dutis (Francesc Placerean, Cuintristorie dal Friûl dal 1866 fint in dì di vuê)
Sin. pazientôs
-
che, cui che al sopuarte o al acete cun calme di spietâ o di fâ alc che al domande tant timp:
il nestri letôr [...] al è pazient: nô o spedìn il gjornâl ai prins dal mês, ma cun lis Puestis Talianis al rive une dì là, e vot dîs dopo tal paîs dongje (Dree Venier, «La Patrie dal Friûl», biliet di visite dai furlans)
-
adi.
che al mostre pazience, che al mostre capacitât di sopuartâ o di spietâ:
un spirt acût e pazient di sienziât (Achil Telin, La Patrie Ladine, I, 2)
-
adi.
che al domande pazience, costance:
cumò chest lavôr pazient e costôs di agn e agn, [...] cheste pratiche dai trois e dai gatui, e riscje di lâ in malore (Josef Marchet, La unitât de camore)
-
s.m.
cui che al à une patologjie o une lesion e che al è tratât cuntune terapie:
al veve bisugne di un trop di analisis di laboratori par lâ fintremai insom ae sô diagnosi e duncje indreçâ il pazient viers une terapie adatade (Fabian Ros, L'om che al pierdeve pinsîrs pe strade);
un tierç dai pazients cun cheste forme di epilessie al à patît, di frut, lis convulsions cu la fiere (Franc Fari, Il cjâf dai furlans)
Cfr. malât
Proverbis:
- l'om sdegnôs al semene difidencis, l'om pazient lis gjave
- la cjarte e je paziente