Dizionari de Lenghe Furlane

dolç  /-ó-/  dolç  [FO]

1. adi. che al à il savôr principâl diferent di salât, garp e amâr, tant che il zucar o la mîl:  aliments plens di gras e zucars a son calorics e a puedin fâ ingrassâ e puartâ al diabete: si scuen sbassâ il consum di aliments e bevandis dolcis (Guglielmo Pitzalis, Mangje san 2); [tai cjarsons] in gjenerâl si metin dentri ancje ingredients dolçs e speziâts, che a riclamin guscj medievâi e rinassimentâi (Sandri Carrozzo, Une regjon di cerçâ); dôs butiliis di vin di Cipri, dolç e une vore fuart (Pierluigi Visintin, Friûl e furlans te Histoire de ma vie di Giacomo Casanova); il savôr des cartufulis todescjis nol è amâr, ma scuasit dolç (Giorgio Pascoli, Il Litum: jerbis salvadiis te cusine)
   Var. doç
   
   1. s.m. chel dai savôrs principâi che nol è salât, garp ni amâr:  ogni rap sglonf di dolç tai asins tarondins (Maria Forte, Il Bide di Miot); de cusine al rivave il frizi dal pes, il dolç de cevole, il garp dal vin (Alan Brusini, Gian Paolo Linda, I forescj)
2. s.m. robe di mangjâ, ancje fate cun preparazions complessis, che e à il savôr carateristic dal zucar, mîl o sim.:  lis "gubanis", cun mudaments di nons, a son il dolç tipic de Pasche intune vore di paîs de Europe orientâl (Sandri Carrozzo, La gubane, o ben la fortune di jessi la puarte de Europe orientâl); si vistivin di gale e a preparavin il tratament, il te, il cafè, il whisky, i dolçs sul taulin indorât (Carlo Sgorlon, Ombris tal infinît); la zent a na podeva spindi bêçs in dolçs e goloseçs che Luc al era bon da fâ (Novella Cantarutti, Il pan da la Guda)
3. adi. di savôr delicât, no fuart e no becant:  sparcs blancs dolçs
4. adi. (fig.) che al è biel par cualchi altri sens che nol sedi il gust, che al dâ bielis sensazions:  lis ruedis a griavin sun chel glerein di stelis cuntun sun dolç come une musiche (Dino Virgili, Il cjaradôr des animis); nol rivave a gjavâsi di intorsi il ricuart di chel sium stramp, plen di imagjins inmagadis e dolcis (Franca Mainardis, Grivôr)
   Sin. delicât , deliziôs , dulinciôs , graciât , graciôs , soâf
   
   1. s.m. ce che al fâs plasê:  chel paîs che al veve simpri il so dolç ancje sul dûr dai pedrâts e i veve simpri paiât i voi (Maria Forte, Cjase di Dalban)
5. adi. (fig.) che nol è tant in pendence:  a drete invezit, viers la mont, la rive e je plui dolce e lis cjasis a son a plui filis (Alan Brusini, Gian Paolo Linda, I forescj); une cleve dolce che e lave jù a pierdisi te plagne lavorade (Maria Forte, La tiere di Lansing)
   Sin. lizêr
   
   1. s.m. il jessi pôc in rive:  il rûc [...] al zeva jù pai prâts in dolç dai Cumugnâi fin ta la Miduna (Novella Cantarutti, Il bal da li fati)
6. adi. (fig.) che al mostre rispiet, zentilece, no agressîf ni risupiôs:  il paron al deventave mol di suste se une femine, massime zovenute, si presentave là di lui: al jevave in pîts, i dave la man, le faseve sentâ, al fevelave dolç (Dino Virgili, La aghe da pît la cleve)
   Sin. amabil , bon , civîl , civilin , complasent , cortesan , creançât , degnevul , jentrant , manierôs , mugnestri , plasevul , tratîf , zentîl
7. adi. (fig.) che al fâs sintî afiet, tenarece:  une bussade dolce in prin, ma che e deventà simpri plui infogade e convulsive (Roberto Ongaro, Il muc); sâstu - i diseve a Meni cun vôs dolce - o ai fat meti la scunute dongje il nestri jet: e je cussì biele chê scunute che tu âs volût comprâ pal nestri frutin (Pieri Somede dai Marcs, Il segno)
   Sin. afetuôs , amabil , dulinciôs , tenar
   
   1. sintiment di amôr afetuôs:  dut al veve vût par jê dome la premure di fâle siore, ma cence saceâle mai cuntune ore vere di dolç (Maria Forte, La tiere di Lansing)
8. adi. (fig.) che i si vûl ben, spec. tes espressions di afiet:  vô sês il mio cjâr ben, il dolç mio flât (Ermes di Colorêt, II, 12)
   Sin. amât , cjâr , biel
9. adi. che nol fâs patî, che nol da consecuencis negativis o che al à mancul aspiets negatîfs rispiet a altris robis de stesse sorte:  provâ cuntune cure dolce; gjinastiche dolce; [Cleobi e Biton] si indurmidirin stracs sui scjalins, e a passarin dal sium ae muart dolce (Adrian Cescje, Viaç aes origjins dal Logos)
   Sin. bon , moderât

Polirematichis e espressions idiomatichis

• aghe dolce loc.s.f.
• cjapâ in dolç loc.v.
• cjoli in dolç loc.v.
• flaut dolç loc.s.m.
• gloti amâr e spudâ dolç loc.v.
• len dolç loc.s.m.
• paste dolce loc.s.f.
• spudâ dolç cu la bocje amare loc.v.

Proverbis:

• cui che al à amâr in bocje nol po spudâ dolç
• daspò dal dolç al ven l'amâr
• il dolç al è sul fonts
• la fam e fâs dolç l' amâr
• no si po gloti amâr e spudâ dolç
• no si po vê il dolç cence l'amâr