mugnestri
/-é-/
mu|gnes|tri
[AF]
-
adi.
soredut di animâl, che al à un caratar dolç, che al ubidìs daurman e che nol è agressîf:
al argagnave intor di un mussut mugnestri e pacific, imbastintlu cun barîi e bolzetis (Giovanni Urban, Sukaran)
Sin. dumiesti
, dolç di bocje
, ubidient
, cuiet
, bon
Var. mugnesti
, mignestri
, mugnestic
, mignesti
, mignestic
-
adi.
ancje di persone, caratar, mût di fâ e v.i., pront a scoltâ, a capî, a no barufâ:
al mi à dât une voglade che crodevi che al mi sfulminà […], ma plui tart mi e vignût dongje plui mugnestri (Pieri Somede dai Marcs, Gnot di Nadâl);
al vîf la sô vite, sclet e mugnestri, cence fâi mâl a dinissun (Ivano Urli, Storie di Min)
Sin. dumiesti
, dolç
, bon
, adatevul
, degnevul
, tenar
, pacific
, pazient
, cuiet
, indulgjent
-
che si lasse comandâ:
le àn metude dute par fâmi deventâ mugnestri, par fâmi stâ in rie, par fâmi resonâ e fevelâ come lôr (Antoni Beline, De famee al seminari)
-
adi.
(fig.)
di element materiâl, che si lasse lavorâ cun facilitât e che al da bon risultât o che al rispuint ben a un comant, a une manovre e v.i.:
la tiare buine, mugnestre, ca jù, e dave il pan pal cristian e il fen pal nemâl (Dino Virgili, La aghe da pît la cleve);
il portelon dongje si jere viert, mugnestri, cuntun scloc (Gianfranco Pellegrini, La otave corsie)