Dizionari de Lenghe Furlane

pâs  pâs  [FO]

1. s.f. cundizion di un popul o di un stât che nol è impegnât in conflits armâts:  lui che al veve fat malvulintîr ancje l'alpin, in timp di pâs e fra lis sôs monts, cumò lu vevin mandât in vuere e ta chês tieris forestis (Roberto Ongaro, Cretevierte); o volìn restâ chenti, te nestre tiere, libars di lavorâ, di lâ a scuele, di cjacarâ te nestre lenghe, in pâs cun ducj, cence soldâts, cence casermis (Tarcisio Venuti, La cjase di Toni)
2. s.f. acuardi che al fisse la fin di une vuere:  la Patrie dopo dal 1797 (pâs di Cjampfuarmit) e passà plui voltis de paronance francese (1805-13) a chê austriache (1798-1805, 1813-66) (Gian Carlo Menis, Storie dal popul furlan)
   Sin. acuardi , compatât¹ , convenzion , pat¹
3. s.f. concuardie inte vite e intai rapuarts tra personis:  mi visi simpri di mê agne Caroline, che e voleve ben a ducj e e meteve la pâs in famee (Cristina Noacco, Faliscjis); al jere simpri seren, in pâs cun ducj (Carlo Sgorlon, Prime di sere)
   Sin. armonie , bon vivi , union
4. s.f. mancjance di pôre, preocupazions, turbaments e v.i. intune persone:  e jere stade la prove plui dure [viodi il matrimoni dal fi che al leve mâl], tai agns che si à dibisugne di stâ in pâs cu la vite (Maria Forte, Cjase di Dalban)
   Sin. calme¹ , cuietece , serenitât
5. s.f. situazion che e da sensazions cuietis:  al alçà i voi e di colp i slusirin ridint lis stelis. Cetantis! Ce pâs in chel cîl seren, cjapiel imens di cheste tiere scure (Pieri Somede dai Marcs, O sielç lis stelis)
   Sin. cidin , cidinôr , cuiete , calme¹
6. s.f. moment o situazion li che si pues stâ cence sfadiâ o cence impegnâsi in alc di armonie fra plui personis:  (si sint a sunâ, il campanel di cjase) vuê è destinade che no puedi stâ un moment in pâs (Pieri Somede dai Marcs, Vilie di Nadâl (teatri))
   Sin. calme¹ , polse , padin , respîr
7. s.f. [TS] lit., st.art ogjet sacri di bussâ prime de comunion:  e sù, ducj in glesie o fûr de puarte grande, a cjapâ la benedizion dal plevan, cu la Pâs (Riedo Pup, I furlans e lis sagris); la famose "Pâs dal Duche Ors" ogjet devozionâl preziôs, di avoli e lamine di arint tampiestade di pieris duris, datade tra secul VIII e secul IX (Aministrazion Publiche, Cividât Museu Archeologjic Nazionâl)

Polirematichis e espressions idiomatichis

• dâ la pâs loc.v.
• dâsi la pâs loc.v.
• dâsi pâs loc.v.
• lâ in pâs loc.v.
• lassâ in pâs loc.v.
• meti il cûr in pâs loc.v.
• meti pâs loc.v.
• metisi il cûr in pâs loc.v.
• murî in pâs loc.v.

Proverbis:

• cui che al à dongje dal fogolâr pâs e amôr, al è un siôr
• cui che al à pâs, ligrie e amôr, dongje dal fogolâr al è un siôr
• cui che al viôt, sint e tâs, al è segn che al vûl vivi in pâs
• cui che al viôt, sint e tâs, al vûl vivi in pâs
• in chê cjase che la gjaline e cjante e il gjal al tâs e je pocje pâs
• la pâs di cjase nol è aur che le pai
• la pâs e je la mari de bondance
• la robe e robe la pâs
• la vitorie e je nemie de vuere, il scomençâ de pâs
• o vin une ale di pâs e une di salût
• par vê la pâs in chest mont a vuelin trê robis: une femine par cjase, une passare par vile, une cocule par sac
• par vê pâs sint e tâs
• robe mâl cuistade no à ni pâs ni durade
• robe robade no à ni pâs ni durade
• Sant Blâs il frêt al fâs la pâs
• se si mangje e si tâs, si mangje in pâs
• une pâs par fuarce e je segrete vuere
• vûstu vê pâs in famee, cusii la lenghe a la femine