solt
/-ò-/
solt
[CO, TS]
-
s.m., s.m.inv.
numism.
monede, in origjin di aur, po ancje di altris metai, che e jere la unitât monetarie in plui etis e lûcs de Europe, cun diviers valôrs:
lu cjate [un façolet che i plasi] e domande il presit. "Cincuante solt" (Luigi Gortani, Al marcjât di Vile);
in chei dîs si cuistave dîs solts e tirâ sede e sbuentâsi li mans plenis di poleçs, sgobâ come mus chê pueri frutatis, da li sîs di matine fintramai a lis vot di sere (Dolfo Zorzut, No je plui vive)
-
ancje par cuantificâ la marcjanzie o la robe che e vedi un ciert valôr:
cinc solts di cespis (Luîs Merlo, Tra parincj)
-
s.m.
in gjenar tal pl., bêçs:
la int a veve di tasê: ur davin sore cuatri solts, magari dîs agn dopo (Francesc Placerean, Cuintristorie dal Friûl dal 1866 fint in dì di vuê)
Sin. bêç
, boro
, brustul
, carantan
, centesim
, clincar
, craizar
, crût
, cuatrin
, palanche
, patan
, sclanfar
, sclanfe
, franc
, spinfar
, clanfar
, sclincar
Proverbis:
- a ogni fantate i stan ben doi solt di tentimbon
- al è miôr un solt in man che no un stât par aiar
- al è simpri ben di vê te sachete un solt di savût
- al vâl plui un solt in soreli che no in ombrene
- bisugne spindi simpri un solt di mancul di chel che si vuadagne
- cent pinsîrs no pain un solt
- cui che nol ten cont dal centesim nol rive a fâ il solt
- cuntun solt pocjis voltis si paie un debit
- feminis a 'nd è trê al solt, e il solt indaûr
- i rîs par che a sedin bogns a àn di valê un solt dal un
- il solt che si cjape a sotet al è un solt benedet
- jeve solt e sente bêç
- no si po vê solt e colaç
- si à simpri di lâ vie cun doi solt di mincjon te sachete
- un solt butât vie di un mat, al è racolt di un savi
- un solt di coion al sta simpri ben te sachete
- un solt di pote al sta simpri ben te sachete