Dizionari de Lenghe Furlane

violent  /-ènt/  vi|o|lent  [AF]

1. adi. caraterizât di fuarce agressive:  la dissipline e jere tremende, bastave un piçul fal par scjadenâ la reazion plui violente, ti picjavin, ti devin pachis di copâ, i vuardians a vevin man libare, a podevin copânus e nissun al varès dit nuie (Max Mauro, Buchenwald 1944); un sfuei di tindince mazziniane e radicâl, al publicave un violent articul cuintri Cavedalis (Giovanni Pillinini, Zuan Batiste Cavedalis - Une vite esemplâr)
   Cfr. fuart¹ , trist , brusc¹
2. adi., s.m. che, cui che al dopre la fuarce cun agressivitât cuintri di chei altris:  e veve preât che a clamassin il predi ma che e tremave di pôre parcè so fi, cjocat e violent al veve zurât che no lu varès lassât jentrâ (Pieri Somede dai Marcs, O sielç lis stelis)
   Cfr. barufant , trist , prepotent
3. adi. (fig.) caraterizât di grande intensitât, dificil di controlâ o di sopuartâ:  mi veve cjapade une vaiarole a sustons, violente (Gianni Gregoricchio, Trê feminis); l'atac [di malstâ] al jere stât cussì subitani e violent di lassâlu cence fuarce (Amedeo Giacomini, Tal ospedâl); a di chel siôr i vignì sù un grop tal cuel, cussì violent che si è scossât dut, come se al ves tocjât eletric (Pieri Menis, Un macet di sanmartinis)
   Sin. sbalsamant , spasmodic , teribil , trement , sfolmenât , fogât , infogât , viament , rabin¹ , rabiôs , salvadi