Dizionari de Lenghe Furlane

lunc  lunc  [FO]

1. adi. che al à une grande dimension o une cierte dimension in sens lineâr:  un prât lunc e stret fra lis boschetis di une bande e il flum di chê altre (Roberto Ongaro, Il muc); [lis tencjis] lis cjapavin nome i fantats che a vevin la cjane gargane, e un fîl lunc il dopli de cjane (Lucio Perès, A pescje tal suei); a lerin a pît. Nol jere un toc di strade lunc (Agnul di Spere, Te grande place)
   
   1. che rispiet a altris robis de stesse sorte al à plui estension:  vistût cuntune gjachete estive blu e une cjamese cu lis maniis lungjis (Sandri Di Suald, Ah! la provincie); cjavei luncs e neris, bandonâts a slas su lis spalis (Carlo Sgorlon, Il dolfin)
2. s.m. estension lineâr, dimension che no je ni la altece ni la profonditât:  [la isule] e faseve 30 Km di larc par 15 di lunc (Fabian Ros, Eivissa mon amour); dopo vêlu metût te smuarse [un toc di len] lu sgjavà par lunc cuntun scarpel (Carlo Sgorlon, Prime di sere)
3. adi. che al rive a une cierte distance o ancje a masse distance rispiet al obietîf:  si inserìs suntun lanç lunc […] e le met tal sac (Marc Stolf, Fiorentina - Udinese 3-0)
4. adi., s.m. che, cui che al à une buine altece:  adun cul poliziot al jere un tâl, in borghês, lunc e sec (Fabian Ros, Un piçul particolâr)
   Sin. alt¹ , grant , bocon
   
   1. [TS] sport spec. te bale tal zei, zuiadôr une vore alt
5. adi. soredut di paste o rîs, masse cuet o che al à pierdût consistence parcè che al à polsât masse:  ma i rîs son masse luncs, la cjar è dure, / slichigne la friture, / il rost cjarbon (Pieri Çorut, La sdavasse); o ai scugnût gustâ une ore plui tart, par la cuâl i rîs e jerin deventâts luncs (Arturo Feruglio, El sardelon)
   Sin. stracuet , stradilacuet
6. adi. in funz. di av., in posizion orizontâl:  Marc di Monai [muart inneât] al tornà a Çupicje distirât lunc suntune carete (Agnul di Spere, Istât)
   Sin. distirât , pognet
7. adi. che al à une cierte durade o al dure une vore, plui di ce che si previodeve o al è par solit:  vivi une vite lungje e biele (AAVV, Sul florî); une predicje di gale, in chê sere. […] Une predicje lungje, che e je un pôc la sume di chês che al à fatis vie pe setemane dal Otavari (Meni Ucel, Otavari a Madone)
   
   1. che al domande tant timp:  [chel de traduzion] al è che al è un lavôr lunc e dificil, al covente metisi in zûc e vê cussience de dificoltât de sfide (Walter Tomada, Pierluigi Cappello: «L’om plui concret? Il poete»)
8. adi. di cdn., che al sta tant timp a fâ alc:  si met in spiete dal om. Spiete, spiete. Ma ce lunc che al è chel cristian! Che al vebi cjatât cualchidun? (Meni Ucel, Gjiso e la Eline); [il confessôr] nol jere curiôs, nol jere lunc, al capive al svol e al jere clâr tes rispuestis (Antoni Beline, Pre Pitin)
9. adi. di alc preparât cun masse aghe, o cun plui aghe di ce che al è par solit:  une mignestrute, par lui, di brût lunc, une fete di strachin o di cjar, scotade te gridele, cence cuince, e un miluç cuet (Amedeo Giacomini, Tal ospedâl); al ordene un cafè lunc maglât (Paolo Monte, Messe grande)
   Cfr. lami , slungjât , slungjâ
10. adi. [TS] sport di scuadre, che e ten i zuiadôrs o lis liniis di zuiadôrs lontans tra di lôr:  la scuadre blancje e nere e je masse lungje e il so sburt al è masse debil (Marc Stolf, Udinese - Chievo 1-0)
11. adi. [TS] fon., metr. di vocâl o ben di silabe, che e dure di plui e che e je in oposizion fonologjiche cuntune vocâl o silabe curte:  tai tescj dal cinccent e dal sîscent al è frecuent di doprâ secuencis di dôs vocâls par segnâ lis lungjis (Xavier Lamuela, La grafie furlane normalizade)

Polirematichis e espressions idiomatichis

• a la lungje loc.av., loc.adi.inv.
• a la plui lungje loc.av.
• a lunc loc.av., loc.adi.inv.
• a lunc e a larc loc.av.
• ae lungje loc.av., loc.adi.inv.
• ae plui lungje loc.av.
• anime lungje loc.s.f.
• cafè lunc loc.s.m.
• cjan lunc loc.s.m.
• fâ il pas plui lunc de gjambe loc.v.
• fâ vignî la barbe lungje loc.v.
• in lunc e in larc loc.av.
• lâ pes lungjis loc.v.
• muse lungje loc.s.f.
• parussulin de code lungje loc.s.m.
• savêle lungje loc.v.
• tirâ a lunc loc.v.
• tirâ in lunc loc.v.
• tirâ pes lungjis loc.v.
• tirâle pes lungjis loc.v.
• une curte e une lungje loc.s.f.pl.
• une lungje e une curte loc.s.f.pl.
• vê i voi luncs loc.v.
• vê il nâs lunc loc.v.
• vê la viste lungje loc.v.
• vê lis ongulis lungjis loc.v.
• vê lis orelis lungjis loc.v.
• vê lis sgrifis lungjis loc.v.

Proverbis:

• a fâ il pas plui lunc de gjambe, si romp il cavalot
• brût lunc nol plâs
• conts dispès, amicizie lungje
• cui che al à il nâs lunc lis nase a la lontane
• cui che si distire plui che a son luncs i bleons, si discuvierç i pîts
• divuardi che la cjavre e ves la code lungje
• i brûts luncs a van pe taule
• il maridâ al è curt, il stentâ al è lunc
• il Signôr al à la mace lungje
• il Signôr al à la man lungje
• il Signôr al à la scorie lungje e al rive pardut
• la justizie e à lis mans lungjis
• la lenghe de femine a je lungje tant che la Tresemane
• la robe plui lungje e je la sperance
• lis robis lungjis a deventin madracs
• lunc di mangjâ, pegri di lavorâ
• lunc o curt, un baston al è simpri un baston
• malatie lungje, muart sigure
• par vivi a lunc covente doprâ scarpis vieris
• plui piçul al è il cûr des feminis, plui lungje la lenghe
• vît curte, vendeme lungje
• vuarditi dal om che al cjale bas e de femine che e à lunc il pas