Dizionari de Lenghe Furlane

antîc  an|tîc  [FO]

1. adi. che al ven di un passât lontan, che al va indaûr te storie:  par salvâ une tradizion antigone […] tal 2001, in Cjargne, ae Polse di Cougnes, e je nassude la associazion «Scampanotadôrs furlans - Gino Ermacora» (Monika Pascolo, Il sun de fieste)
   Sin. vecjo , vieri¹
   
   1. di un ogjet artistic o di colezion, che al à almancul cent agns:  jê i tignive une vore a insiorâ la sô cjase di robis vieris, antighis, come armârs, panariis, gratulis, vintulis, cassons, plats di crep piturâts o di peltri (Meni Ucel, Culturis)
2. adi. [TS] stor. de ete storiche che e tache cu la scriture e che e finìs cul colâ dal imperi roman:  la statue di Zeus [di Olimpie] e jere considerade tal mont antîc la prime des siet maraveis dal mont (Adrian Cescje, Viaç aes origjins dal Logos)
3. adi. che al è sucedût di tant timp:  ta chel salustri [par vie de morfine] i vignivin aments robis antigonis, dismenteadis, platadis par agnorums tes grispis dal cerviel (Alan Brusini, Il malât di Cime Undis)
   Sin. vecjo , vieri¹
   
   1. che al è simpri sucedût, che al è simpri stât:  al sarâ il vizi antîc che a àn i oms di pensâ (Giorgio Ferigo, Un soldatin)
4. adi. tipic dal passât, de culture passade:  a veva na grinta rabina e istès mulisita intal mostaç e a deva, a scoltâla, la idea di un savê antîc (Novella Cantarutti, La femina di Marasint)
   Sin. vieli , vieri¹
   
   1. s.m. il timp passât, il culture passade e ce che al è tipic dal passât:  lis grandis ruvinis, il stîl gotic, dut ce che al profume di antîc (Checo Tam, La maree nere)
5. s.m. massime tal pl., om de antichitât o di un timp passât, in câs ancje progjenitôr:  i nestris antîcs vevin una specie di scuela ancja lôr: ma la lôr sala jera una plaça, e scuelârs dut il popul (Federigo Comelli, Il me paîs); ma alore a vevin reson i antîcs (Checo Tam, La maree nere)
   Cfr. vecjo , vieli , von
6. adi. che al dure di tant timp:  il scjas dal taramot al à sigurementri contribuît a dismovi une cussience antighe, autonomiste, specialiste (Angelo Floramo, Ri-cognossi la autonomie)
   Sin. vieri¹ , vecjo

Polirematichis e espressions idiomatichis

• a la antighe loc.av., loc.adi.inv.
• par antîc loc.av.