Dizionari de Lenghe Furlane

superiôr  su|pe|ri|ôr  [AF]

1. adi. che al è plui insù, plui adalt:  la part superiôr dai elements di combustibil [di une centrâl nucleâr] e je tignude a muel intune misture bifase aghe-vapôr (Alessandro Pascolini, Il disastri de centrâl nucleâr di Fukushima Dai-ichi)
   Sin. sore , disore , parsore , adalt
2. adi. plui alt in grandece, cuantitât, intensitât, numar e v.i.:  temperaduris superiôrs ai 200 grâts (Redazion il Diari, Il soreli intun spieli)
   Sin. sore , disore , parsore
3. adi. miôr par cualchi carateristiche o ancje in gjenerâl:  il vin bon si pues vê dome di uis di cualitât superiôr (Enrico Peterlunger, Storie curte de vît in Friûl)
   Sin. miôr
4. adi. ancje di persone o personis, miôr par cualchi aspiet, tant che lis capacitâts, la ricjece, la posizion jerarchiche e v.i., o ancje in gjenerâl:  e je istruide, studiose, buine… une creature superiôr (Costantino Smaniotto, Co l'amôr al cimie); nol covente cjatâ cerviei superiôrs, iluminâts di universâl gjenialitât; al baste cjatâ personis onestis e pratichis (Josef Marchet, O zuìn ancje nô)
   Sin. sore , disore , parsore
5. adi., s.m. che, cui che intune organizazion o intune jerarchie al à plui responsabilitât, plui podê, plui retribuzion e v.i.:  a scugnaressin lâ in pension cul grât di colonei, cence la promozion al grât superiôr, vâl a dî cence deventâ gjenerâi (Riedo Pup, Cinccent a la volte); al ubidì ai siei superiôrs fin tal ultin (Pieri Menis, Sul agâr)
   Cfr. disore , parsore , sore , sorestant
6. s.m. cui che al è da cjâf di une comunitât religjose, spec. di un convent:  i veis da zî là dal superiôr dai fraris a Glemona (Olimpia Guerra - Istitût di Ricercje Achil Telin, I ucielats da lis malis gnovis - Friûl des culinis III)
7. adi. [TS] stor. di une provincie romane, plui dongje di Rome rispiet a di une altre cun chel stes non:  la Gjermanie superiôr
8. adi. [TS] gjeol., paleont., archeol. di epoche, che e je testemoneade di reperts che a stan in strâts plui alts rispiet a altris e che duncje e je plui resinte:  tra la fin dal Paleolitic superiôr e l'inizi dal Mesolitic e je rivade une impuartante inovazion des tecnichis di cjace cu la invenzion dal arc (Andrea Pessina, Gaetano Vinciguerra, La preistorie in Friûl); i fossii di pterosaur plui antîcs a son stâts cjatâts in crets dal Triassic superiôr (Noric) in Lombardie, in Friûl, in Tirôl e in Groenlande (Francesco Gobbo, Gjeologjie e paleontologjie ator di Preon)
   
   1. [TS] gjeol. di plan o strât, che al è parsore di altris e che duncje al è di formazion plui resinte:  chescj calcârs a rivin a vê un spessôr di plui o mancul 50 m te Lovinçole e a son de part superiôr dal Jurassic inferiôr e de base dal Jurassic medi (Francesco Gobbo, Gjeologjie e paleontologjie ator di Preon)
9. adi., s.f. scuele, cuntun cicli che pal solit al è di cinc agns, indreçade a arlêfs dopo dai cutuardis agns:  i libris di tescj che a son une disgracie. A partî di chei de scuele primarie fin a la scuele superiôr che nus àn imbombâts intune vision nazionalistiche (Pierino Donada, Insegnâ il furlan: oblic o oportunitât?); gno fradi, che al à cutuardis agns e al è za tes superiôrs (AAVV, Sul florî)