Dizionari de Lenghe Furlane

fra¹  fra  [FO]

1. prep. par introdusi un complement di lûc, ancje figurât, timp, cuantitât, par indicâ che alc o cdn. al è tal mieç di doi o plui elements, o tal mieç di un alc plui grant, ancje cun sens une vore gjeneric o figurât:  al è colât jù tun grebano profont fra dôs pichis (Pieri Menis, Tinut di Libro); il viaç di ogni faliscje che e cjape il svol fra il cîl, là che e je nassude impiade, e la tiere, là che e va a poiâsi cence lûs (Cristina Noacco, Faliscjis); el leon cu lis alis, embleme di Vignesie, che al ten fra lis çatis el libri viart (Arturo Feruglio, Viaç a Vignesie); une biele Sierade e jere daûr a rivâ fra lis culinis dal Friûl (Roberto Ongaro, Il muc); stratignint une blesteme fra i dincj, Grivôr si jere rindût a inviâsi a pît (Franca Mainardis, Grivôr); in belance fra il ben e il mâl (Carlo Tolazzi, La salamandrie tal fûc); chel glon al jere come une agonie infinide, fra vivi e murî (Dino Virgili, La aghe da pît la cleve); chi il caratar si formave fra il cidinôr des monts, il blanc des nêfs e tal frêt dai luncs Inviers (Roberto Ongaro, Cretevierte)
   Sin. injenfri , par jenfri , tramieç , tra , jenfri
   
   1. in corelazion cun "e" par pandi i tiermins o elements che a fasin tacâ e finî un spazi, un interval, une separazion, un paragon, une relazion e v.i.:  la vecje none sentade a gucjâ fra barcon e fogolâr (Maria Forte, Cjase di Dalban); no esist plui nissuna diferença fra te e fra Atila il cuâl, dopo avê distrut cent citâts e jessi muart nei braçs de la volutât, stava distirât sul so jet di parada (Zuan Luîs Filli, Il farc); ce bugade di ricuarts fra la vee e il sium (Pieri Somede dai Marcs, Sant Simon: 28 di Otubar 1917); e cussì Vigji di Nimis, fra une bocjade e chê altre, al contà la storie di so fi malât e vuarît (Pieri Menis, Vigji il cuintribandîr)
2. prep. ancje in espressions fig., cun sfumadure di significât di compagnie e union:  "Sù, sù, fra amîs, al po cjacarâ cun libertât" (Angelo Covazzi, Il gnûf plevan)
   Sin. framieç , injenfri , par jenfri , tramieç , jenfri , tra
   
   1. ancje par segnalâ diviers sogjets in relazion, in confront, in contrast e v.i.:  mieçs di ogni cualitât a son lâts straçâts par dibant intune vuere sterpe e stupide fra partîts (Josef Marchet, Preambul rusin); impen di tichignâsi fra di nô, no saressial il câs di fâ alc? (Franca Mainardis, Un bosc cence colôrs)
   2. cun sfumadure di comparatîf o partitîf:  ducj passavin denant da sô cjasa e disevin: «Benedeta tu fra duti li feminis furlanis […]» (Ugo Pellis, Catinuta); la angarie plui orende fra chês cometudis cuintri dai lavoradôrs e je chê fate cuintri dai fruts (Buteghe dal Mont, Luche Nazzi, Guide par un consum just e solidâl); fra tantis incarichis o vevi ancje chê di sostituî il prefet te presidence di une comission (Pieri Somede dai Marcs, Chel de formadiele)
      Sin. jenfri , tra , di¹
   3. riferît a se stes, pensant o fevelant dentri vie, di bessôl come se al fos cuntune altre persone:  al pensave fra di se: al è un pôc tart, ma miôr cussì che nuie (Roberto Ongaro, Il muc)
3. prep. par pandi confront, alternative, diference, o ancje mancjance di diference, di plui personis o entitâts:  pôre jo no 'ndi ai / ju cjali te lûs dai voi / no mi pâr che e sedi trope diference/ fra nô e lôr no vin bondance (Aldo Giavitto, Viodiju rivâ)
   Sin. jenfri , tra
4. prep. denant di tiermins no antitetics, al pant une sume parziâl o cumbinazion di elements:  fra il sut e lis surîs chest an le viodìn peloche (Pieri Somede dai Marcs, Tripoli bel sol d'amore)
   Sin. framieç , injenfri , par jenfri , tramieç
5. prep. par introdusi un complement di timp, indicant un tiermin futûr rispiet a cuant che si fevele:  nossere o vin telefonât a vuestri nevôt e fra un pôc al varès di jessi chi (Franca Mainardis, Aiar di cjase); fra pôcs dîs e varès finît di seselâ (Pieri Somede dai Marcs, La spiarie); si viodarìn fra dîs agns. Sperìn di cjatâsi insiemi in cheste biele glesie e di podê dîsi insiemi che il taramot al à vierte une altre strade, al à dismot il nestri popul (Francesc Placerean, Il Friûl taramotât al à bisugne di ducj, ma al à di aministrâsi di bessôl)
   Sin. ca di , tra , in

Polirematichis e espressions idiomatichis

• a mieç fra loc.prep.

Proverbis:

• fra doi litighents il tierç al gjolt