Dizionari de Lenghe Furlane

framieç  /-èç/  fra|mieç  [AF]

1. av., prep. par introdusi un complement di lûc, timp, cuantitât, par indicâ che alc o cdn., al è tal mieç di doi o plui elements, o tal mieç di un alc plui grant, intune situazion o sim., ancje cun sens une vore gjeneric o figurât:  in fonts dal broili al è un riscjel di fiar scuindût framieç i arbui (Vittorio Vittorello, A ogni cost); puar Gabriel! / Framieç la fole / piart il cjapiel… (Pieri Çorut, Puar Gabriel); e scuen distirâsi par tiere framieç un rizîr di moscjins che i sivilin a plen tes orelis (Ivano Urli, Storie di Vera)
   Sin. jenfri , injenfri , par jenfri , tramieç , tra , fra¹
   
   1. in corelazion cun "e", par pandi i tiermins o elements che a fasin tacâ e finî un spazi, un interval, une separazion, un paragon, une relazion e v.i.:  un piçul borc come Cjarmacis, lassât colà framieç la statâl e l'abitât di Teôr come un bezin lât a finîle lontan dal voli e dismenteât (Raffaele Serafini, Soreli jevât a mont); inviâsi a fâ une cjaminade pai prâts che a son framieç il riul Bombâs e il riul dai Uciei (Renzo Balzan, La rose dal baron)
2. av., prep. ancje in espressions fig., cun sfumadure di significât di compagnie e union:  e rît contente framieç dai siei amîs (Raffaele Serafini, B123ST)
   Sin. jenfri , injenfri , par jenfri , tramieç , tra , fra¹
   
   1. ancje par segnalâ diviers sogjets in relazion, in confront, in contrast e v.i.:  o vin ancjemò une diference framieç citâts e paîs: a Viene l'Adsl e rive al 61% dai nuclis familiârs, in Carinzie dome al 47% (Janez Erat, Iniziativis e ofensivis: vierzi la orbite de informazion)
   2. cun sfumadure di comparatîf o partitîf
   3. intune cundizion a mieze strade, che però e à part di un e di chel altri tiermin
3. s.m. element spaziâl, temporâl, formâl e v.i. che al à siei caratars distintîf rispiet a altris o rispiet a une situazion, composizion e v.i.:  tal libri otâf da l’Odissee si cjate un framieç comic une vore biel, cuant che Demodoc, il cjantôr dal re dai Feaci Alcinou, al conte dai amôrs di Ares e Afrodite (Pierluigi Visintin, La bataie jenfri lis suriis e i crots)
   Sin. tramieç , interval , jenfri