Dizionari de Lenghe Furlane

jenfri  /jè-/  jen|fri  [FO]

1. av., prep. par introdusi un complement di lûc, ancje figurât, timp, cuantitât, par indicâ che alc o cdn., al è tal mieç di doi o plui elements, o tal mieç di un alc plui grant, ancje cun sens une vore gjeneric o figurât:  cul cjâf strent jenfri lis mans, al stave pensants (Zuan Lurinçon, La Madalene); si gjave il cjapielat passantsi i dêts jenfri dai cjavei bagnâts di sudôr (Franco Marchetta, Madalene)
   Sin. framieç , injenfri , par jenfri , tramieç , tra , fra¹
   Var. jentri¹ , enfri , entri , gnenfre , jenfre , jentre
   
   1. in corelazion cun "e", par pandi i tiermins o elements che a fasin tacâ e finî un spazi, un interval, une separazion, un paragon, une relazion e v.i.:  lis cjasis inclucidis jenfri il Luri e la Stradegnove (Dino Virgili, La aghe da pît la cleve); jenfri il 1977 e il 1979 il Comitât popolâr pe Universitât dal Friûl al tirà sù cirche 125 mil firmis (Max Mauro, Un Friûl difarent: i 90 mhz di Onde Furlane); i confins jenfri ben e mâl no jerin plui tant clârs (Agnul di Spere, Il puint de ledre)
2. av., prep. ancje in espressions fig., cun sfumadure di significât di compagnie e union:  ognidun che al jentre al sparìs jenfri amîs e parincj, ducj a domandâ di chel e di chê altre (Carlo Tolazzi, La salamandrie tal fûc)
   Sin. framieç , injenfri , par jenfri , tramieç , tra , fra¹
   
   1. ancje par segnalâ diviers sogjets in relazion, in confront, in contrast e v.i.:  e vignì fûr une grande barufe jenfri i contadins di Merêt e i soldâts de fuartece di Palme che a jerin inte sagre (Roberto Moschion, I nestris cognons. Studi sui cognons di Merêt, Roncjetis, S. Marie, S. Scjefin, Tissan)
   2. cun sfumadure di comparatîf o partitîf:  si sa che la marmote e je la plui durmione jenfri ducj i animâi (Franca Mainardis, Un bosc cence colôrs)
   3. intune cundizion a mieze strade, che però e à part di un e di chel altri tiermin:  chê cjase e veve une ande, no sai nancje jo cemût dî: jenfri il misteriôs e il maldert (Josef Cjargnel, Il gjatat neri dai Fers)
3. av., prep. par pandi confront, alternative, diference, o ancje mancjance di diference, di plui personis o entitâts:  jo, o dîs il vêr, o tornarès a fâ il referendum o plebissît chel di za fa 150 agns, che nus vevin clamâts a sielzi jenfri Austrie e Italie (Albert Travain, EuroAquileienses)
   Sin. fra¹ , tra
4. av., prep. denant di tiermins no antitetics, al pant une sume parziâl o cumbinazion di elements:  jenfri che al jere tart, che al jere frêt e che ancje al ploveve, no vevi propit nissune voie di lâ fûr
   Sin. tra , fra¹
5. av., prep. par segnâ un limit massim di timp o di spazi o di cuantitât:  intant, jenfri un an e une dì Silveri al tire i sghirets, come che ur tocje a di chei che a zurin il fals (Josef Cjargnel, La mont cu la spice discrodeade); lenti ator di Baracêt - jenfri un rai di vot chilometros (par la cuâl a une distance minime) - a forin cjatadis testemoneancis langobardis (Lucio Perès, Une lance longobarde cjatade a Baracêt); a àn ricevût la intimazion di paiâ jentri setemane chi un contribût (Riedo Pup, Par paiâ al vûl mistîr)
   Sin. dentri
6. s.m. spazi tra doi ogjets o dôs personis:  finî cu lis gjambis fra i jenfris dai lens (Alan Brusini, I ribei); al cjale il mûr gnûf: claps grancj, claps piçui, modon, e tai jenfris, scaiis cu la malte (Dino Virgili, La aghe da pît la cleve)
   Sin. interval , trate
7. s.m. dade di timp tal mieç di un principi e di une fin, o che si diferenzie di un prime e un dopo compagns tra di lôr:  ogni tant si fermave tal mieç dal discors, e in chei jenfris, cundut che il fogolâr al fos plen di int, si podevin sintî a crugnâ i carûi disore, tes cjamaris (Meni Ucel, Il sunsûr)
   
   1. dade di timp curte:  al va sù e jù par un jenfri, po al torne dongje il famei (Maria Forte, La tiere di Lansing)
      Sin. moment , pôc , alc

Polirematichis e espressions idiomatichis

• a mieç jenfri loc.prep.
• jenfri di loc.prep.
• jenfri vie loc.av., loc.prep.
• jenfri vie di loc.prep.
• par jenfri loc.av., loc.prep.