Dizionari de Lenghe Furlane

tra  tra  [FO]

1. prep. par introdusi un complement di lûc, ancje figurât, timp, cuantitât, par indicâ che alc o cdn., al è tal mieç di doi o plui elements, o tal mieç di un alc plui grant, ancje cun sens une vore gjeneric o figurât:  o sin jessûts tra dôs filis di soldâts cu la baionete in cane che a maledivin, che e pocavin nome se o fossin lâts fûr di file (Pieri Menis, Il «miracul» di un ûf); une strade a magne, scure e scjafoiade tra lis monts (Alan Brusini, Il svindic di Rosute); i saveve di mâr il stâ dut il dì in ufici tra tantis cjartis, massime di Istât (Pieri Somede dai Marcs, La sûr)
   Sin. injenfri , par jenfri , tramieç , fra¹ , jenfri
   
   1. in corelazion cun "e" par pandi i tiermins o elements che a fasin tacâ e finî un spazi, un interval, une separazion, un paragon, une relazion e v.i.:  tra il 1615 e il 1617 e fo la vuere di Gardiscje (Josef Marchet, Cuintristorie dal Friûl fin sot la Italie); il cine di De Stefano al è particolâr, a mieze strade tra un documentari e un film di finzion (Fabian Ros, Il cine furlan)
2. prep. ancje in espressions fig., cun sfumadure di significât di compagnie e union:  in famee, intes situazions di ogni dì, intai rapuarts tra compagns di scuele e coleghis (Donato Toffoli, Relazion dal Grup di lavôr "Planificazion linguistiche"); tra noaltris furlans si fevelave simpri par furlan (Christian Romanin, Dino Zoff: «O vin lidrîs buinis, o vin di tignîlis di cont»)
   Sin. framieç , injenfri , par jenfri , tramieç , jenfri , fra¹
   
   1. ancje par segnalâ diviers sogjets in relazion, in confront, in contrast e v.i.:  vueris tra imperadôrs che a cirivin di ribaltâsi un cul altri (Josef Marchet, Cuintristorie dal Friûl fin sot la Italie); une dì, cuissà mai par ce reson, e sclopà une barufe tra i viei (Pieri Menis, Sot il puarti)
   2. cun sfumadure di comparatîf, partitîf, composizion:  cheste "sudizion" e je une des pecjis dal popul furlan, ancje dai plui brâfs, dai plui bogns, dai plui seris e dai plui galantoms tra ducj i furlans (Josef Marchet, Sudizion, la pecje dai furlans); par vie de grande diference tra la temperadure dal mâr, plui cjalt, e l'aiar frêt, e nas une instabilitât fuarte (Stefano Micheletti, Marcellino Salvador, Notis di meteorologjie pal Friûl - Vignesie Julie); te glesie di Madone di Graciis a Udin, che e da propit sul Zardin Grant, tra ducj i avôts, e je ancjemò une cueste dal drâc (Sandri Carrozzo, Friûl di Magance)
      Sin. jenfri , fra¹ , di¹
   3. riferît a se stes, pensant o fevelant dentri vie, di bessôl come se al fos cuntune altre persone:  «Par cheste volte, partide pierdude», o ai dit tra di me (Pieri Somede dai Marcs, Lis scuelis e la nêf); "Puar om! - al pensave tra di se - Estrôs come i pitôrs" (Zuan Lurinçon, La Madalene)
3. prep. par pandi confront, alternative, diference, o ancje mancjance di diference, di plui personis o entitâts:  par vie de grande diference tra la temperadure dal mâr, plui cjalt, e l'aiar frêt, e nas une instabilitât fuarte (Stefano Micheletti, Marcellino Salvador, Notis di meteorologjie pal Friûl - Vignesie Julie); la distance teoriche cussì ben esplicitade tal dî lis robis no podeve sei plui grande tra Salvi e Barbine (Adrian Cescje, Memoriis di politiche linguistiche)
   Sin. jenfri , fra¹
4. prep. denant di tiermins no antitetics, al pant une sume parziâl o cumbinazion di elements:  tra il cjalt, tra la int e tra il strenzi, a Jacum no i vignive il flât (Angelo Covazzi, Jacum in zardiniere)
   Sin. jenfri
5. prep. par introdusi un complement di timp, indicant un tiermin futûr rispiet a cuant che si fevele:  tra mancul di un mês e sarà une altre volte la zornade dai 3 di Avrîl, la "Fieste de Patrie dal Friûl" (Marc Stolf, La Patrie, la Fieste e la propueste di leç regjonâl); i doi si saludarin restant in peraule di sintîsi tra une setemane (Angelo Covazzi, Cemût pesâ la tiere)
   Sin. ca di , fra¹ , in

Polirematichis e espressions idiomatichis

• a mieç tra loc.prep.
• tra che loc.coniun.