Dizionari de Lenghe Furlane

sclop  /-ò-/  sclop  [AF]

1. s.m. incressite une vore imburide dal volum di alc, che al finìs par rompisi in maniere violente:  desenis e desenis di soldâts vistûts in blu/grîs a tacarin a cori jù par une culine, fusîi in man e elmets di açâl. Un cjadaldiaul trement. Vôs, rumôrs di metraie, sclops… (Checo Tam, La sente di piere)
   Sin. deflagrazion , detonazion , esplosion , bot , ton¹
   
   1. rumôr fuart produsût di alc che si romp in maniere violente:  al veve vualmât trê rus muarts a mieze strade viers il flum. A jerin lâts par aiar suntune mine […]. Il sclop si lu veve vût sintût sul colm de gnot, tal scûr di lune (Agnul di Spere, Cjalant la rive)
2. s.m. (fig.) sunôr fuart e improvîs, no dome di alc che al sclope:  i sclops de scorie si sintiviju di lontan (Carlo Sgorlon, Prime di sere); la puarte si sierà cuntun sclop (Josef Cjargnel, Il Lâc di Cjavaç); un sclop da ridi tâl, che lu sintirin fin su la place dal marcjât (Luigi Gortani, Al marcjât di Vile)
   Sin. esplosion , scarabotade , ton¹ , bot
3. s.m. (fig.) manifestazion fuarte e imburide di un cualsisei fenomen:  sclops di ligrie maliziose (Maria Forte, La rive di Sant Pieri)
4. s.m. [TS] bot.com. spec. tal pl., plante e rose di plui speciis dal gjenar Gentiana, in particolâr Gentiana acualis e Gentiana froelichii:  pesteli e sclops, campaneli e rosi di cucuc (Novella Cantarutti, Stagjon di rosi)
5. s.m. (fig.) femine une vore biele:  pensant che chel sclop di fantate, che cumò e jere di mestri Nart, e varès podût sei la sô femine […] i vignive un grop che i cjoleve il flât (Roberto Ongaro, Cretevierte); e jere un sclop, e someave propit une fie di siôrs, cun chê graciute, come un don di Diu par fâsi volê ben di ducj (Maria Forte, Dome la cjampanute di Sant Bortul)
   Sin. sclopon , sclese
6. s.m. toc di alc, in gjenar avonde grues, taiât o sclapât vie di alc di plui grant:  Zebec al veve sudât sanc par butâ jù un cjastinâr di cent agns sù pe mont, […] par ridusilu in sclops e par meti in tasse, tal ultin, i sclops, che a podessin secjâsi denant di menâju te cort (Meni Ucel, Zebec)
   Sin. sclampe , fete , slepe
7. s.m. viôt sclope :  e capìs, dai sclops che ôt, che vô e vei da esse un famous cjaçadour (Giuseppe Malattia della Vallata, Al Signour e Sant Piere a "La Puça" de Claut)

Polirematichis e espressions idiomatichis

• a bot e sclop loc.av.
• bot e sclop loc.av.
• dâ un sclop loc.v.
• di bot e sclop loc.av.

Proverbis:

• il prin dì di Inseri al è sant Pas, il secont sant Crepìn, il tierç sant Sclop