Dizionari de Lenghe Furlane

fete  /fè-/  fe|te  [FO]

1. s.f. toc di mangjative taiade in maniere di jessi avonde largje e fine:  une biele fete di pan di chel neri (Ivano Urli, Storie di Vera)
   Sin. toc¹ iper. , bocon iper. , sclop ipon. , slepe ipon. , slep ipon. , slepar ipon.
   Cfr. sope , sbreghe
   
   1. tai fin di cjar, robe salade, insacade e v.i.:  fasarìn une mirindute, un got di blanc, cuatri fetis di salam (Pieri Somede dai Marcs, Barbane); o mangjavin une fete di cjar e patatis fritis (Agnul di Spere, Un de maiorance)
      Sin. rudiele ipon. , bisteche ipon. , slepe ipon.
   2. toc di polente di forme plui o mancul regolâr:  a fâ compagnie al pes sîs fetonis di polente blancje di mieç chilo la une (Arturo Feruglio, Viaç a Vignesie); Mariane i passave cualchi plat di mignestre o une fete cjalde di base (Maria Forte, Il bal spisimât des ombrenis); al sarès tornât a gustâ di bessôl te sô cjamare, cun dôs fetis di polente scjaldade e un toc di formadi (Carlo Sgorlon, Prime di sere)
      Sin. bâr ipon. , slepe ipon. , sunde ipon.
   3. toc di robe di mangjâ taronde taiade dal mieç, daûr dai rais:  fetis di torte infolcjadis di pane sbatude (Agnul di Spere, Un cidinôr todesc); a 'nd mangjave une in dì [di angurie], fete daûr fete (Meni Ucel, Scussis)
      Sin. spic¹ , sclop , slepe ipon.
2. s.f. robe che e à une forme avonde largje e grande:  il cîl al jere a fetis di vapôr, scuris tal bas, claris su lis monts (Alan Brusini, Gian Paolo Linda, I forescj); dut strafont. I cjavei i colin jù a fetis sul cerneli, sul nâs (Meni Ucel, La ombrene); il cuviert al pareve stravuacât sot il pês di une fete penze di nêf (Maria Forte, La tiere di Lansing)
   
   1. (fig.) part dal cuarp grande, soredut in riferiments ai pîts:  a lavoravin i maltarûi, judantsi cun chês fetis di pîts che a distrigavin vore (Maria Forte, La tiere di Lansing)
3. s.f. part di alc che al ven dividût:  a mê mari i veve tocjade une biele fete di ereditât (Gianni Gregoricchio, Trê feminis)
   Sin. toc¹ , part¹ , porzion
   
   1. part di alc componût di plui elements o che si pues contâ o misurâ:  i ferovîrs a zuiavin vosant, tant che se a fossin tune piste pal Zûc di balis. Une buine fete de int ju cjalavin (Agnul di Spere, La scjate rosse); la fete plui grande di dute la component demografiche dal Friûl si cjate tai comuns de fasse de planure (Mauro Pascolini, Andrea Guaran, La planure e la cueste dal Friûl); a vevin gust di fâ un pôcs di conts, un belanç, se no de lôr vite, almancul di une biele fete di timp (Franca Mainardis, Il sium di Lissandri)
4. s.f. [FÛ, TS] teatr., let. toc teatrâl
5. s.f. discors o scrit lunc e che al stufe:  ce predicje, ce fete! / ca plui no la finìn (Zaneto, Sino in glesie o sul marcjât?); […] ce disie jê? / Jo o dîs che e je une fete / e che il gustâ mi spiete (Emilio Nardini, La scunsulte)
   Sin. luianie , broade , solfe , petule
6. s.f. bote o cuantitât di botis:  i mene a braçs aviarts, cuasi lu mace / […] / da un trop zelant copari e trop amì / al veve tirât sù dute chê fete (Pieri Çorut, La sdrondenade in Autun)
   Sin. slepe , rate¹ , sdrondenade , petule , onzude , batût , copete , batude

Polirematichis e espressions idiomatichis

• dâ une fete loc.v.
• fâ a fetis loc.v.
• molâ une fete loc.v.
• taiâ a fetis loc.v.

Proverbis:

• cuant che la polente e je piçule, tenti la tô fete in man
• e vâl plui une fete di polente cuiete che no une spanzade maladete
• la femine e à il cûr a fetis e, se lis da, no son mai netis
• par grande che e sedi la fertaie cuant che si è in putrops a dividile, la fete e tocje piçule