Dizionari de Lenghe Furlane

model  /-èl/  mo|del  [FO]

1. s.m. ogjet reâl che si proponisi di copiâ, rapresentâ, fotografâ e v.i.
2. s.m. cui che al pose, ancje di mistîr, par pitôrs, scultôrs e v.i.:  si tratave simpri de stesse persone che e veve fat di model; in fat, in dutis chês telis, si podeve rigjavâ un jenfrisegn che al jere simpri fis e compagn (Roberto Ongaro, Cretevierte)
   
   1. cui che par profession al met sù e al presente vistîts tes sfiladis di mode
   2. persone une vore biele:  chel Gabriel, / ducj cuancj lu dîs, / al è un model, / al è un zoiel… / da cjâf a pîts / l'è un paradîs (Pieri Çorut, Puar Gabriel)
3. s.m. (fig.) persone degne di sei imitade:  o jeri un frutat che al veve simpri bisugne di un model di copiâ e di venerâ e o podevi vênt nome un a la volte (Carlo Sgorlon, Il dolfin)
   Sin. esempli
4. s.m. cualsisei robe o sisteme che al à carateristichis specifichis e che al pues jessi cjapât tant che riferiment:  il progrès tecnologjic (come la invenzion de television) al à fat in mût che il model culturâl american si slargjàs dapardut (Franc Fari, Eric Pascul, Autonomie e democrazie, i numars de socializazion umane); il model organizatîf des sezions socialistis fondadis in dut il Friûl vie pai prins dîs agns dal Nûfcent al jere chel dal «arbeiter sekretariat» todesc (Matteo Ermacora, La emigrazion furlane in Austrie e in Gjermanie)
5. s.m. prototip industriâl:  al veva tirât four un campionari puartât da la Fransa e al veva tirât jù il model pi di lusso (Novella Cantarutti, Il Crist sclagn)
   
   1. ogjet, fat su scjale industriâl, daûr di un prototip:  a decidin di lâ a Rome in moto. Dôs Frera gnovis resintis model Raid Nord Sud (Alan Brusini, Amîs come prime); cuntun vecjo automobil, un model che lu si viodeve bielzà pardut ancje prime de vuere (Carlo Sgorlon, Ombris tal infinît)
6. s.m. complès di carateristichis estetichis e tecnichis:  a jerin dôs poltronis, simpri dal model dal sofà: cul vilût vert cuadretât di neri (Roberto Ongaro, Il muc)
7. s.m. [TS] sart. sfuei di cjarte che al mostre lis liniis di un vistît
8. s.m. [TS] metal. forme par solit di len che e covente par fâ il stamp che al à di ricevi il metal fondût
9. s.m. [TS] art forme di materiâl plastic che e covente tant che idee par rivâ a vê il lavôr finît
10. s.m. copie in scjale di un ogjet:  il model de gnove Ferrari in scjale 1/48
11. s.m. [CO, TS] burocr. formulari za pront che al à di sei jemplât cun informazions domandadis di une aministrazion:  al fasè ricors, al implenà une rie di modei e di cjartis di bol (Carlo Sgorlon, Ombris tal infinît)
    Sin. modul
12. s.m. [TS] filos. esemplâr origjinari e ideâl des cjossis individuâls de realtât percetive
    Sin. archetip , ideâl , idee
13. s.m. [TS] logj. inte epistemologjie moderne, scheme teoric che in base a chel a son verificadis dutis lis formulis e relazions di une teorie
    
    1. mat. rapresentazion matematiche di un scheme fisic, economic e v.i.
    2. mat. insiemi di ogjets matematics astrats, simbolics, no specificâts, che a àn proprietâts definidis di une serie di postulâts, che si pues operâ sore
14. s.m. [TS] econ., sient. scheme teoric che al descrîf un o plui fenomens cul marcâ lis carateristichis struturâls di rilevance plui fuarte:  intal 1913 N. Bohr al met adun il model di atom cun orbitis cuantizadis (Lorenzo Marcolini, Lis celis organichis nanostruturadis)
15. s.m. in funz. adi.inv., di cdn. che si pues cjapâ di bon esempli:  un citadin model; une impleade model
    
    1. in funz. adi.inv., organizazion, iniziative e v.i., che e pues jessi un esempli di funzionalitât, razionalitât e v.i.:  une industrie model tal setôr de alte tecnologjie