semence
/-èn-/
se|men|ce
[AF]
-
s.f.
te plante o te pome, cuarp riprodutîf fecondât, plui o mancul piçul e di forme divierse daûr des speciis, che al prodûs un gnûf individui cu la sô gjerminazion:
[te stagjon frede] la vite vegjetâl e polse tes lidrîs e tes semencis che planc a planc si trasformin (Mario Martinis, Dicembar)
Var. samence
Cfr. nusel
, sepe2
, vues
-
ancje cun valôr coletîf, cuantitât di chei cuarps riprodutîfs, soredut di plantis coltivadis, ancje in oposizion ai grans che a son destinâts a jessi mangjâts e no a jessi semenâts:
saial lui, siôr copari, cetantis voltis che o scuen butâ la semence tal cjamp daûr des scuelis? E ogni volte me netin, chês sboentadis di passaris che nol ven nuie redenzie! (Meni Ucel, La visite dal vescul);
in putropis fameis, si mangjave la polente fate cu la blave che e jere stade metude vie di semence (Roberto Ongaro, Il muc)
-
s.f.
licuit organic gjenitâl masculin, che al conten spermatozous:
ogni mascje, gjate o vacje che e fos, e parturive un fi dopo vêlu puartât par un timp plui o mancul lunc te sô panze. Martin però mi pandè che chest al sucedeve dome cuant che e veve vude la semence dal mascli (Carlo Sgorlon, Il dolfin);
"Nus covente dome la tô semence. Le metarìn intune bancje a pueste! Cuant che nus coventarà… le doprarìn pe inseminazion artificiâl." (Checo Tam, Sense)
Sin. sboradure
, sbore
-
s.f.
[TS]
zoot.
dai cavalîrs, cuantitât di ûfs:
tal 1857 e rivà la atrofie dal cavalîr, che e distruzè la produzion di galete par putrops agns. Bisugnà fâ rivâ la semence dal Gjapon, che e costave une vore di plui (Adrian Cescje, Liniis di storie sociâl e economiche dal Friûl 1500 - 1800)
-
s.f.
complès di individuis che a vegnin o che a vignaran di un progjenitôr comun:
me muîr nas Cjampanîl [di cognon], in conseguence / nasseran Cjampanîi de sô semence (Pieri Çorut, L'avîs pe fondarie)
Sin. gjernazie
, raze2
, famee
-
complès di individuis che a àn in comun carateristichis linguistichis, etnichis, culturâls, identitariis:
a podaran freâsi lis mans parcè che la malandrete semence dai furlans e sarà piardude (Josef Marchet, Furlans autonomiscj platonics)
-
categorie di personis che si puedin calcolâ te stesse categorie, par une cualsisei carateristiche in comun:
jo o soi di une semence dute diferente di gno zinar (Josef Marchet, Lis predicjis dal muini)
-
s.f.
(fig.)
element che al prodûs un efiet, ancje dopo passât timp:
al è inamissibil, come oms, come cristians, come int razionâl, pensâ che la vuere, cu la sô semence di violence e di ostilitât, e puedi risolvi alc (Antoni Beline, De bello balcanico)
Cfr. levan
, lidrîs
, çoc
, çocje
, faliscje
-
s.f.
(fig.)
piçule cuantitât vanzade:
di sclâfs e restà e ancjemò e reste juste la semence tal cjanton rimit de Resie, sot la mont Cjanine (Josef Marchet, Cuintristorie dal Friûl fin sot la Italie)
-
soredut in espressions negativis, piçule notizie, indizi, olme e v.i.:
de nestre classe un sôl si è dispredât e o vin pierdude di lui ogni semence (Antoni Beline, La fabriche dai predis)
Sin. olme
, usme
Cfr. ombre
-
s.f.
[TS]
artes.
claut une vore piçul:
un grum di argagns: martiel, bruschin, trade e tocuts di cere, stranset, sponton, suble... Po dopo: semencis, stichetons [...] (Lucia Scoziero, Rico il cjaliâr)
Polirematichis e espressions idiomatichis
Proverbis:
- a semenâ pe glerie si strachin i bûs e si piert la semence
- cui che al mangje la semence al cjie la paie
- de semence si cognòs la plante
- ogni jerbe e fâs la sô semence e ogni len la sô pome