sanc
sanc
[FO]
-
s.m.
licuit organic ros scûr, viscôs, costituît di plasme e corpuscui, che al circole tal aparât cardiovascolâr dai Vertebrâts, sburtât des pulsazions dal cûr, traspuartant e distribuint diviersis sostancis tal organisim:
altris complicazions [dal diabete] a puedin jessi […] disturps de circolazion dal sanc intes arteriis dal cûr e dal cerviel (Guglielmo Pitzalis, Curâ il diabete);
la donazion di sanc al è un at fondamentâl par contribuî ae salût de coletivitât (AAVV, ABC DONA! Guide pratiche ae donazion di sanc e emocomponents)
-
s.m.
(fig.)
in espressions che a pandin violence, copament, maçalizis, muart e v.i.:
se tu vens ca sù tes cretis / là che lôr mi àn soterât, / al è un splaç plen di stelutis, / dal mio sanc l'è stât bagnât (Arturo Zardini, Stelutis alpinis);
la nazion no si contente di vê vût il lôr sanc: e vûl ancje sfrutâ la lôr memorie e la lôr sepulture par chê propagande gladiatorie (Josef Marchet, Si tornial a cjariâ la suste?);
la mê cjera a è brusada e dirocada e sporcjada di sanc. I mê fradis a morin, ca intor, ca vissin: e a mi a mi pâr di mori cun lour (Pier Paolo Pasolini, I Turcs tal Friûl)
-
s.m.
(fig.)
apartignince a une gjernazie, a une famee, a une raze:
un nazionalisim garp che nol à ni sens ni reson di jessi intun sît là che il sanc si à messedât e tornât a messedâ, dulà che al è juste il sanc che nus fâs ducj fradis (Celso Macôr, Jentrade a Sacheburache);
te stale il cjaval di bon sanc al durmive impins (Pieri Somede dai Marcs, Gnot clare gnot scure)
Sin. cueste
, çoc
, gjernazie
, naie
, origjin
, plante
, raze2
, renazie
, riunde
, semence
, stirpe
-
parintât, spec. in riferiment ai dissendents:
il princip al murì, e cul passâ dai agns al murì ancje l'ultin dal so sanc (Josef Cjargnel, I pagans di Muine);
"Ma e je simpri sô fie… il so sanc…" (Pieri Somede dai Marcs, Gnot di Nadâl);
dopo dut a son di chel sanc istès, a son fradis o cusins drets (Josef Marchet, Lis predicjis dal muini)
-
s.m.
(fig.)
ce che si à, patrimoni:
al tacà a sberghelâ che lu vevin ruvinât, che i vevin robâts i siei sudôrs, il so sanc (Pieri Menis, Il fi de Rosse)
Sin. sostance
, patrimoni
, ben
, avê
-
s.m.
(fig.)
part profonde e vive di une persone:
i fîs di siôr Simon no vevin nissun dafâ cun chê braide, che no jere mai jentrade tal lôr sanc cu la fadie o cul cjalt di un afiet (Maria Forte, La tiere di Lansing)
Sin. anime
, spirt
-
disposizion naturâl, personâl o ancje ereditade o cjapade sù de famee, de culture, de esperience e v.i.:
in rivuart ai lavôrs, par un fîl, che i lavôrs lôr ju vevin tal sanc (Meni Ucel, I Catanas);
o blestemais cuintri lis convinzions che i nestris paris nus àn metudis tal sanc (Josef Marchet, Blestemis)
-
s.m.
(fig.)
fuarce vitâl, energjie:
par salvâ il furlan di une muart sigure, par fermâ la sô agonie, par meti ancjemò un fregul di sanc tes sôs venis, al è nome un rimiedi e nome un mieç: fâlu insegnâ tes scuelis (Josef Marchet, Dome un rimiedi par salvâ il furlan: insegnâlu tes scuelis)
Polirematichis e espressions idiomatichis
Proverbis:
- al à di cori il sanc pes sôs venis
- bisugne lassâ lâ il sanc pes sôs venis
- fûr sanc, dentri mistîr
- i bêçs a son il secont sanc dal om
- il sanc al tire
- il sanc nol è aghe
- il vin al fâs bon sanc
- l'om cence bêçs al è un om cence sanc
- no si po gjavâ sanc dal mûr
- o vin ducj il sanc ros
- sanc nol è aghe ni brût di fasûi
- se tu ti tais il nâs, il sanc ti va in bocje
- se tu ti tais un dêt, al jes sanc
- une tace di vin ros di vinars sant, al va dut in sanc