Dizionari de Lenghe Furlane

cueste  /-é-/  cues|te  [FO]

1. s.f. ognidun dai vues placs, luncs e arcâts che a formin la casse dal stomi:  al jere colât di une impalcadure di cjase. Si veve rot il bacin e un pâr di cuestis (Amedeo Giacomini, Tal ospedâl)
   
   1. segn de magrece:  al jere tant smagrît che i si contavin lis cuestis
2. s.f. part dal cuarp che e corispuint ai flancs de casse dal stomi, massime in espressions figuradis:  une altre creature si nudrive tes cuestis de sô biade Ane (Maria Forte, "Nossent")
3. s.f. tai di bestie maçade, massime dal purcit, fat dai vues des cuestis e de cjar che a àn intor:  un regalut pal avocat, viodial, vin purcitât îr l'altri, un biel toc di cueste e une file di luianiis (Pieri Somede dai Marcs, L'avocat e la luianie)
4. s.f. [TS] bot. gnervadure centrâl de fuee
5. s.f. gjambe buine di mangjâ di cualchi verdure:  comprâ spinaze e cualchi cueste di blede
6. s.f. bande di un libri, formade dal fîl des pagjinis sieradis:  il frut al scriveve, pleât parsore i libris, e ogni tant al disfueave un libron che al veve lis cuestis miezis blancjis e miezis rossis (Carlo Sgorlon, Prime di sere)
7. s.f. tess. rilêf che si forme tun tiessût in graciis di une urdidure particolâr:  un pâr di bregons a cuestis
8. s.f. teren in pendence:  doi pelegrins a viazavin cun ande strache, marcant pas dopo pas, planc a planc, su la cueste di chê mont brustulide (Josef Cjargnel, Il Lâc di Cjavaç); tant plui che a erin rivâts da pît da mont e che bisugnave scomençâ a cjapâ sù la cueste biel plan (Luigi Gortani, Il matescul di Cjabie); i na sai pi dulà che a passin i cunfins da la cjera dai Indrîcs: a corevin par lunc e par traviers via pa li parts pi largji da la mont, a cjapavin drenti li pi bieli cuesti in recès fissi di vîts e di melârs (Novella Cantarutti, I cunfins)
   Sin. rive , cleve , pale² ipon. , rivâl¹
9. s.f. zone di tiere ferme che e je dongje dal mâr:  cueste rimpinide; la centrâl di Fukushima Dai-ichi […] si cjate dongje de citât di Okuma, su la cueste nordorientâl dal Gjapon (Alessandro Pascolini, Il disastri de centrâl nucleâr di Fukushima Dai-ichi); il tren al cor sù pal stivâl di Italie, sfrissant la cueste tireniche (Adrian Cescje, Memoriis di politiche linguistiche); par turisim si sielzeve la Cjargne; e par fâ la cjase si sielzeve il Friûl des culinis, dai flums, des citâts bielis come paîs. La cueste dal mâr, e jere palût (Riedo Pup, I furlans e il mâr)
   Sin. lît¹ , litorâl , marine , ôr , rive , splaze ipon. , rasule ipon.
10. s.f. arch. element costrutîf doprât tai volts formât di gnervaduris che a dan fûr in rilêf:  une abside cuadrade cun volt a crosere e velis dividudis di cuestis pituradis a fresc daûr dal ûs dai tumiecins (Aministrazion Publiche, Cjavalì - Glesie di Sant Lenart)
11. s.f. (fig.) origjin, divignince familiâr:  no si po migo pretindi di jessi ducj nassûts intune cueste di re (Pieri Somede dai Marcs, Cjase di fitâ)
    
    1. part di un complès origjinari, di une struture, di un grup e v.i.:  di une cueste dai Officials al jere nassût, tai prins agns '70, l'Irish Republican Socialist Party (Carli Pup, Il diari di Bobby Sands)

Polirematichis e espressions idiomatichis

• a mieze cueste loc.av., loc.adi.inv.
• in cueste di soreli loc.av.
• meti tes cuestis loc.v.
• regolâ lis cuestis loc.v.
• rompi lis cuestis loc.v.

Proverbis:

• il mâl dai altris no i juste lis cuestis a dinissun