Dizionari de Lenghe Furlane

spirt  spirt  [FO]

1. s.m. [FO, TS] st.religj., teol., filos. principi imateriâl oponût ae materialitât, che daûr des concezions des diviersis religjons, al pues corispuindi al sofli vitâl, ae anime individuâl, ae part divine presinte te persone e v.i., considerât unît o dividût dal cuarp:  [i benandants] pal fat di jessi nassûts cu la cjamese, a son destinâts, o fintremai obleâts di une fuarce sorenaturâl, a lâ fûr cul spirt dal cuarp, a lâ in lûcs lontans par scombati in spirt cuintri dai strions (Sandri Carrozzo, Jenfri vîfs e muarts)
   Var. spirit
   
   1. viôt Spiritussant :  che [la glesie] e vedi di impaçâsi in non dal Spirt, in non dal Spiritussant des robis di chest mont e je une dutrine vecjissime (Francesc Placerean, La Glesie e à di lassâ i popui come che a son e fâur di levan seont la lôr paste)
2. s.m. anime di une persone muarte:  prin dal Concei di Trent e jere dute une sdrume di danâts, spirts e fantasimis che a torzeonavin pal mont a messet dai vîfs (Josef Cjargnel, Batistute); la cjase cumò e je stade vendude: a son dome spirts li dentri. I spirts dal nono e di altris (Checo Tam, Sic transit gloria mundi)
   Sin. anime , comparence , fantasime , ombre , parence
   
   1. entitât metafisiche che si pense che e puedi fâ dal mâl:  une brute zornade si inmalà, e, come se al ves vût i spirts intor, al scomençà a urlâ, a smaniâ, a maltratâ, che nissun nol podeve stâi dongje (Pieri Menis, Lis leiendis di Buie)
      Sin. demoni , diaul
3. s.m. [TS] mitol. personificazion mitologjiche di lûcs o elements naturâi:  dutis lis monts a àn un lôr spirt che al loze tal plui profont dai lôr crets: si clamin i spirts des monts; ancje la Mont Grande e veve e e à il so (Roberto Ongaro, Cretevierte); il Tiliment al è chest, al è un dai spirts che a sburtin lis tiaris. E nô parsore, che o corìn vie cun lui cence savêlu (Stiefin Morat, Donald dal Tiliment)
   Sin. divinitât , diu , gjeni
4. s.m. cundizion o disposizion psicologjiche, mût di vivi e di viodi lis robis:  a son lis divisions dai spirts, il contrast dai intindiments, la diversion des fuarcis tra monarchics e republicans, tra filosovietics e filoamericans, fra progressiscj e reazionaris che a sbreghin la anime da la Italie (Josef Marchet, I trê savis di là jù)
   Sin. estri , lune , umôr , vene¹
   
   1. buine disposizion psicologjiche:  vite plene di fuarce zovine, di spirt e di bon timp (Zuan Lurinçon, La Madalene); la sô peraule e rivave simpri a tornâ spirt e fuarce a ducj, ancje tal piês cruziâsi (Maria Forte, Cjase di Dalban)
5. s.m. complès des carateristichis psicologjichis profondis, tipichis di un individui:  zovins cussì discompagns dai contadinots cence spirt e savôr che e veve cognossût fin in chê volte (Maria Forte, Cjase di Dalban); Fredo Migot, ancje di vecjo, al veve conservât la sô legre vene di spirt gjubiâl e ecuilibrât (Riedo Pup, Murî di fam cui camarins plens)
   Sin. caratar , personalitât
   
   1. personalitât fuarte, plene di buinis cualitâts:  zovins cussì discompagns dai contadinots cence spirt e savôr che e veve cognossût fin in chê volte (Maria Forte, Cjase di Dalban); i furlans di là, se a vevin un fregul di cjâf e di spirt, a cjatavin la strade vierte par Viene e no ur mancjavin ni lis pussibilitâts di butâsi fûr, ni lis sodisfazions (Josef Marchet, Cuintristorie dal Friûl fin sot la Italie)
   2. (fig.) complès des carateristichis tipichis ancje di un grup, di un fat, di une iniziative, di un lûc, di une circostance e v.i.:  il poete [epic] al devente vôs dal popul, al pant il spirt di dute une int (Sandri Carrozzo, Otmar Mainardis); i fîs a jerin come i paris, tacâts al spirt vieri de lôr tiere (Dino Virgili, La aghe da pît la cleve); e pûr il spirit pi font di chê stagjon [de Vierte] i lu ai supât tai cjantons di chê cjasa suturna, cun mê agni che a spiavin il soreli rivâ a lenzi i antîi dai balcons, la piera dal fogalâr, che a spetavin il molâsi dal glaç e il timp da scuminçâ li vori pai prâts (Novella Cantarutti, Stagjon di rosi)
   3. il jessi pront, il vê buine disposizion o inclinazion par alc:  no je plui chê voie di vignî fûr, il spirt di sacrifici parcè che cumò a stan ducj ben e a cjapin la vite in maniere diferente (Christian Romanin, Dino Zoff: «O vin lidrîs buinis, o vin di tignîlis di cont»); al prevalè in lui il spirt di servizi e cussì al deventà ministri cun dutis lis consecuencis politichis che cheste incarghe e compuartave (Giovanni Pillinini, Zuan Batiste Cavedalis - Une vite esemplâr)
6. s.m. significât o intindiment profont:  l'assessôr […] al à anticipât alc su cemût che al intint di movisi, ma la linie fate indenant e somee lâ juste de bande contrarie dal spirt de leç (Carli Pup, Sot atac l'avignî de lenghe furlane)
   Sin. idee , significât
7. s.m. alcul etilic o altre sostance alcoliche:  e coreve a disinfetâ, cun spirts, cjamaris e coridôrs (Maria Forte, Cjase di Dalban)
8. s.m. [TS] gram. segn diacritic doprât tal alfabet grêc, che al è di dôs fatis e al segne la vocâl di inizi di peraule naturâl o aspirade:  spirt dolç e spirt garp

Polirematichis e espressions idiomatichis

• fâ boli i spirts loc.v.
• vê i spirts loc.v.
• vê i spirts abolics loc.v.
• vê i spirts intor loc.v.
• vê i spirts te panze loc.v.