lune
lu|ne
[FO]
-
s.f.
satelit naturâl de Tiere:
e jere une bielissime gnot di Istât, cuntune lune che si viodeve come di dì (Meni Ucel, Serenadis);
la lune grande e monte sù pal cîl a slargjâ un blancôr di lat su la campagne e sul paîs indurmidît cui barcons spalancâts a respirâ (Dino Virgili, La aghe da pît la cleve);
uniche ricjece il lupiâ des stelis e il sflandorâ de lune che dut e indarintave jù pe val, fin sul lavio dal Tiliment (Roberto Ongaro, Il muc);
a racuei ti voi lis stelis / tal grant prât dal firmament; […] Planc planchin, une par une, / vie pe gnot vuei lâ cirint: / mi farai prestâ de lune / la sô sesule di arint (Emilio Nardini, Serenade);
dulà vâtu, / dulà vâtu, / Luna, / pai trois di lat dal cîl? / Ma la luna a continua il so viaç, / no à rispuestas par nissun (Giorgio Ferigo, Flaba seconda)
-
[TS]
astron.
satelit naturâl ancje di altris planets:
osservâ lis lunis di Saturni
-
fase lunâr:
ducj a lavin daûr la lune, i sants, i lunaris, e cussì al sucedeve che ducj a fasessin lis stessis voris plui o mancul tal stes timp (Carlo Sgorlon, Prime di sere);
fruts che a cognossevin e a savevin dut di plantis, di uciei, di stagjons, di lunis e di soreli (Riedo Pup, I furlans e i frutins)
-
s.f.
(fig.)
fase, circostance che si à di acetâ, in gjenar negative, spec. in fat di bêçs:
e metisi a fâ mûr [par fâ sù une glesie gnove], cu lis lunis di cumò, nol è un zûc di lodulis. Ma chei di Turniçons a rivaran insom, garantide (Josef Marchet, Lis predicjis dal muini)
-
s.f.
(fig.)
estri, umôr, spec. se al cambie daûr des situazions:
o jeri deventade nevrasteniche e o cambiavi di lune intal zîr di un minût (Gianni Gregoricchio, Trê feminis);
si jevave a buinore cu la lune serene (Maria Forte, La fie çuete)
-
umôr gnervôs, insoferent:
che a lu compatissin: nol è trist, ma se al à la lune… (Anute Fabris, A passe la scalmane);
ma sant Pieri nol podeve bonâsi, e al sfogave la lune murmuiant in jenfri i dincj la cançonete dai cjocs (Catarine Percude, Lis âfs)
-
s.f.
(fig.)
desideri, fortune, prospetive impussibile:
e butave lis cjartis […] «O Dio frute, viôt che tu âs un, ca, plen di bêçs…» […] Po dopo, par no fâti sperâ masse la lune: «Eh, ma chi la facende si met mâl…» (Cristina Noacco, Faliscjis)
Polirematichis e espressions idiomatichis
Proverbis:
- cuant che al plûf il prin martars di lune, no si à sec plui par chê lune
- cuant che la lune e à il cercli, ploie sigure
- cui che al cjale la lune, nol fâs fortune
- cul domandâ paron si va pardut, fûr che te lune
- la lune no à ce fâ cui gjambars
- la lune no je simpri taronde
- la lune no sint il baiâ dai cjans
- la lune ur fâs lusôr ai laris e ai inamorâts
- la mode e la fortune a durin tant che la lune
- lis donis a àn la lune cun lôr
- lis feminis a àn la lune cun lôr
- lune di brume mieze sute e mieze bagnade
- lune di sabide lune ladine
- lune in pîts marinâr sentât, lune sentade marinâr in pîts
- lune pelose zornade ploiose
- lune sabidine di cent une buine
- lune setembrine a siet lunis si inchine
- ni par baiâ di cjan ni par ronâ di mus nol è stât mai fermât il cors de lune
- nol è mai carnevâl che no sedi lune di Fevrâr
- nol è mai stât l'ultin di carnevâl che no sedi fate o par fâsi la lune di Fevrâr
- ogni mês si fâs la lune, ogni dì si impare une
- se al è bon timp il prin martars di lune, al è bon timp dute la lune