public
/-ù-/
pu|blic
[FO]
-
adi.
che al rivuarde dutis lis personis di une coletivitât:
ats, documents e tescj di interès public (Marc Stolf, Masse planc e cence plans. L'ûs public de lenghe furlane)
Sin. gjenerâl
, coletîf
-
adi.
relatîf ae sfere sociâl e cognossude di ducj, no a chê privade:
l'obietîf finâl, che al è chel di fâ de lenghe furlane une lenghe fevelade e scrite in ogni situazion comunicazionâl de vite publiche e privade (Adrian Cescje, Memoriis di politiche linguistiche)
-
adi.
che al sta sù su risorsis coletivis o che lis aministre, daûr di une organizazion regolade di leçs e normis istituzionâls:
finide in colegjo la tierce gjinasi, ae sierade jo e i miei compagns o vin dovût notâsi tes scuelis publichis (Pieri Somede dai Marcs, Un cuatri in italian);
il comun al pues promovi e favorî ativitâts turistichis, in mût diret o cun altris istituzions o ents publics e privâts (Aministrazion Publiche, Statût dal Comun di Udin);
si à di controlâ che i finanziaments a sedin onescj e pretindi un risultât dai bêçs publics (Sandri Carrozzo, L'Antifurlan)
Sin. statâl
-
adi.
di cdn., che al lavore par une istituzion o par un ent che al sta sù su risorsis coletivis o che lis aministre:
tai prossims dîs, ducj i dipendents publics a ricevaran lis istruzions par scomençâ a doprâ il gnûf strument (Christian Romanin, Traduzion intun click)
-
adi.
che al è viert a ducj, che ducj a puedin lâ o partecipâ:
la improibizion di fumâ intai locâi publics e dimostre che si pues intervignî […] par meti lis personis intes cundizions di rinunziâ al fum e di sielzi la salût (Guglielmo Pitzalis, Stude i spagnolets!);
tal 1999 mi coventave di dâ dongje une cunvigne publiche par anunziâ il program e lis liniis di procedure de normalizazion lessicâl (Adrian Cescje, Memoriis di politiche linguistiche)
-
adi.
che ducj a san:
un suspiet di adulteri che al devente un scandul public te societât udinese (Donato Toffoli, Il lunari mai jessût - Tellini te prime vuere mondiâl)
-
s.m.
complès des personis che a gjoldin di un ciert servizi, o ancje il complès des personis in gjenerâl:
Orari pal public. Dal lunis al vinars des 10.00 aes 12.30 (Aministrazion Publiche, www.comune.sanmartinoaltagliamento.pn.it);
[la burocrazie] e va indenant pe sô strade cence scomponisi, cence cirî di justificâsi […]. Cussì pôc i impuarte ce che al pense il public (Josef Marchet, Debil il cerviel ma fuarte la gramule)
Sin. int1
Cfr. citadinance
, comunitât
-
s.m.
complès de int che e scolte traviers i mass media, massime televisions o radios:
fâ trasmissions par furlan pal public dai zovins (Fabian Ros, Interviste cun Giorgio Cantoni)
-
complès des personis che a van a viodi, a sintî e v.i. une manifestazion sociâl o culturâl, che a gjoldin di une opare artistiche e v.i.:
[i Donner Trummel] a sunin lis bielis cuarnamusis, lis tablas e i tambûrs, fasint scjadenâ dut il public (Checo Tam, La maree nere)
-
s.m.
[TS]
econ.
setôr de economie sot de autoritât des istituzions:
une scjale di gramulis. Cualunche iniziative che e interessi il public e un grum di chês privadis, prime di lâ in vore a scuegnin passâ sù par chei scjalins (Josef Marchet, Jerarchie)
Polirematichis e espressions idiomatichis
Proverbis:
- laude i amîs in public, coreziju in segret
- ten sù i amîs in public, coreziju in privât
- ten sù i amîs in public, coreziju in segret