Dizionari de Lenghe Furlane

comunitât  co|mu|ni|tât  [FO]

1. s.f. complès di personis che a àn leams di convivence, organizazion, lenghe, culture, etnie, interès, setôr di ativitât o altri, di maniere che a formin une unitât, che e pues jessi di nivel locâl fin a nivel di dute la umanitât:  in gjenerâl, al risulte che lis comunitâts umanis dal Paleolitic superiôr a sedin ben adatadis ae stepe e aes cundizions ambientâls dal Würm tant che dispès a rivin a meti i lôr incjampaments a pôcs chilometris dai fronts dai glaçârs (Andrea Pessina, Gaetano Vinciguerra, La preistorie in Friûl); une stesse persone e une interie comunitât a puedin fevelâ plui lenghis e il fat di imparâ une gnove nol scancele lis lenghis che si saveve za (Sandri Carrozzo, Vuere e pâs - Il conflit linguistic in Friûl jenfri vuere cidine e pâs bausarie); la identitât de comunitât nazionâl furlane e esist e intune civiltât di dirit e mene al dirit a esisti e a resisti a cui e a ce che al pretint che e disparedi (Adrian Cescje, Memoriis di politiche linguistiche); inte programazion si invie une trasmission che no à precedents, e no dome in cheste regjon. Al è il prin notiziari plurilengâl indreçât aes comunitâts imigradis: Tam tam (Max Mauro, Un Friûl difarent: i 90 mhz di Onde Furlane); la comunitât internazionâl e fo une vore pronte a reagjî e, tal zîr di un dîs agns, si rivà a une convenzion internazionâl par fâ calâ lis emissions globâls di solfar (Dario Bianchini Giaiotti, Fulvio Stel, Clime e incuinament: prime l'ûf o la gjaline?); une lenghe di comunicazion internazionâl e je sintude tant che necessarie in part de comunitât sientifiche (Donato Toffoli, Il lunari mai jessût - Tellini te prime vuere mondiâl)
2. s.f. grup di personis che a vivin te stesse struture e che a van daûr des stessis regulis:  jentrant tal curtîl de badie [di Montserrat], si viôt une grande lapide là che la nazion catalane e ringracie la comunitât benedetine di Montserrat par vê difindude cun fuarce e coerence la identitât culturâl catalane (Antoni Beline, Sant Jacum, là che al finìs il mont); tal 762 i trê fradis langobarts Erfon, Marc e Anton, cu la famose donazion "sextense" a regalin teritoris a comunitâts di muinis che a fondaran la abazie di Siest e il munistîr di muiniis di Salt, dongje Paulêt (Angelo Floramo, Ri-cognossi la autonomie)
   
   1. struture inmaneade par judâ drogâts, alcoliscj, malâts mentâi e v.i.:  in chei agns Franco Basaglia, adun cun Antonio Slavich, al scree a Gurize la prime comunitât terapeutiche mondiâl par malâts mentâi, contade tal 1968 tal libri "L'istituzione negata. Rapporto da un ospedale psichiatrico" (Angelo Floramo, Cuintristorie dal Nûfcent 1960-1970)
3. s.f. grup di personis che a àn la stesse fede religjose:  la stele di Davide, figurade dongje des fondazions dal tor dal cjampanili, e sarès une conferme de presince judaiche te comunitât cristiane aquileiese (Giovanni Battauz, Flavio Cossar, Renato Iacumin, I mosaics de basiliche di Aquilee)
   
   1. parochie:  il lôr sun [des cjampanis] nus clame a Messe, nus ricuarde ricorencis e moments impuartants pe comunitât, tant che la nassite o la muart di un parochian, nus vise di laudâ Diu e legrâ i moments di fieste (Monika Pascolo, Il sun de fieste)
      Sin. parochie
4. s.f. organizazion, pal solit internazionâl, che e lee i membris cun pats o tratâts economics e politics:  tal 1951, lis peraulis di Schuman e di Monnet a deventarin, almancul in part, realtât, cu la creazion de CECA (Comunitât europeane dal cjarbon e dal açâl). In chê volte si vierzeve in concret il cantîr de costruzion de unitât de Europe (Marc Stolf, Friûl Europe. Une date simbul)
5. s.f. [CO, TS] stor. aministrazion locâl dotade di une sô autonomie:  lis dôs istituzions plui diferentis dai ordenaments talians, sot il guvier dai patriarcjis, a forin lis Comunitâts e il Parlament (Josef Marchet, Cuintristorie dal Friûl fin sot la Italie)
   Sin. comun , comune , municipi
   
   1. popolazion che e vîf sot di chê aministrazion:  lis unitâts di comunitât, lis viciniis, si devin dongje e a nomenavin un dean (Adrian Cescje, Liniis di storie sociâl e economiche dal Friûl 1500 - 1800)
6. s.f. il fat di vê o di meti in comun, di condividi:  favorî une comunitât di pratiche professionâl dai docents (Patrizia Pavatti, Insegnament dal furlan - la norme "in situazion": tra regulis e plan de ufierte formative)
   Sin. comunance , condivision