Dizionari de Lenghe Furlane

comun  /-ùn/  co|mun  [FO]

1. adi. che al è te normalitât, che nol à carateristichis speciâls:  la cjase roseane - o intindìn la cjase comune, chê puare, e no la abitazion signorîl che e somee une vore a chê cjargnele - par solit e je piçule e pôc profonde (Mauro Pascolini, Andrea Guaran, La mont furlane)
   Sin. cualsisei , sempliç , di ogni dì , normâl , solit¹ , ordenari , usuâl
2. adi. che si cjate cun facilitât:  il blaudin al è comun sù pes cisis, pai mûrs vecjos e pai boscs (Giorgio Pascoli, Il Litum: jerbis salvadiis te cusine); il diabete e je une malatie tant comune (Guglielmo Pitzalis, Scuvierzi il diabete)
   Sin. slargjât , difondût
3. adi. che al è di proprietât, di interès, di volontât e v.i. di un grup, plui o mancul grant:  i components a firmin la "Cjarte di identitât pai viaçs sostignibii", cul fin comun di promovi un mût di fâ turisim just te distribuzion dai profits, rispietôs des comunitâts locâls e cuntun impat ambientâl bas (Buteghe dal Mont, Luche Nazzi, Guide par un consum just e solidâl); la eliminazion dai armaments nucleârs e domande, duncje, la elaborazion di une strategjie comune di bande de comunitât internazionâl (Alessandro Pascolini, Un mont cence armis nucleârs. Sfidis sientifichis e tecnologjichis); un ideâl comun di armonie e perfezion (Adrian Cescje, Viaç aes origjins dal Logos)
   Sin. di ducj , gjenerâl
4. adi. acetât, considerât de plui part des personis:  ancje se tal sintî comun sedi l'incuinament dal aiar che lis emissions di gas che a sburtin i cambiaments climatics a son viodûts come la stesse robe, nome di pôc la sience e à scomençât a considerâju come lis dôs bandis de stesse medaie (Dario Bianchini Giaiotti, Fulvio Stel, Clime e incuinament: prime l'ûf o la gjaline?)
5. s.m. [TS] stor. forme autonome di guvier des citâts de Ete di Mieç
   Var. cumon
   
   1. citât cun cheste forme di guvier
6. s.m. istituzion locâl, dotade di une cierte autonomie, cuntun o plui centris abitâts intal so teritori:  il comun di Cret al jere grandon, cun proprietâts privadis pitost limitadis. Il bosc al jere cuasi dut dal comun (Alan Brusini, Gian Paolo Linda, I forescj); al è stât fat un studi par une ricostruzion archeologjiche dal paisaç di un teritori furlan cjapant come esempli il teritori dal comun di Glemone, là che l'autôr pôc timp indaûr al à fat un lavôr su la toponomastiche (Rino Gubiani, Studi da la evoluzion dal paisaç mediant i toponims); Vigji cun tancj agns che al bateve la taviele e i paîs dal Comun, fasint ancje il cursôr, al cognosseve i nons di ducj, ogni stradele, ogni rivâl, ogni cunete e parfin cui che a jerin i parons dai cjamps (Lucio Perès, Vigji il vuardian)
   Sin. municipi , comune
   Var. cumon
   
   1. l'edifici sede di cheste istituzion o i siei uficis:  jo no crôt di sei in câs di vê chê incariche, no ai mighe scuele come vô, jo! No savarès di ce bande scomençâ un discors come chel che o fasês vô dal barcon dal Comun o denant dal monument (Roberto Ongaro, Il muc)
      Sin. municipi , comune

Polirematichis e espressions idiomatichis

• fâ cause comune loc.v.
• lûc comun loc.s.m.
• vê in comun loc.v.

Proverbis:

• cuant che nol cjante il cuc pai tredis di Avrîl, bisugne lâ in comun a cirîlu
• cui che al servìs il comun nol servìs nissun
• la robe dal comun e je di ducj e di nissun
• mangje dean, paie comun
• mangje merie, paie comun
• no si à di fâ caritât cu la robe dal comun
• te robe dal comun nol preste man nissun