Dizionari de Lenghe Furlane

solit¹  /sò-/  so|lit  [FO]

1. adi. che al sucêt simpri o te plui part dai câs, che si fâs daûr de abitudin o di chê che e je calcolade la normalitât:  cu la nestre solite obietivitât, o disìn dal moment che al à reson. (No je la prime volte che i din reson!) (Josef Marchet, Svelts e dordei); "O no steit a tirà fûr la solite solfe cumò, se i no vuelis fâ capî, che i seis un pôc bruntulon!" (Anute Fabris, A passe la scalmane); un gnûf zûc, tant par rompi il solit drandran di ogni dì (Sandri Di Suald, Ah! la provincie)
   Sin. comun , normâl , ordenari , di ogni dì , regolâr , tradizionâl , usuâl
2. adi., s.m. che, cui che al fâs simpri o dispès ciertis robis, che al va simpri o dispès in cierts puescj, che al è o che si compuarte simpri o dispès intune cierte maniere:  "Po ben, lassìn stâ, sintît 'Sese, vêso tante int là dentri?" "Po no anime! i solits che bevin un cuart in doi e po e disin che noti..." (Pieri Somede dai Marcs, A la oselade); "Tu sês il solit muart di fam" (Amedeo Giacomini, Tal ospedâl)
3. s.m. dome sing., usance, regule, maniere usuâl di fâ o di sucedi:  la cjampane di Sant Nicolò e sunave madins plui a buinore dal solit (Catarine Percude, Lis striis di Gjermanie)
   Sin. ûs , usuâl , normâl , ordenari , regolâr , tradizionâl
4. adi., s.m. dome sing., mangjative o bevande che si è usâts a ordenâ simpri o la plui part des voltis che si va tun ambient:  Dele finalmentri mi ven dongje. "Ce comandial?" [...] "Il solit" (Alan Brusini, Gian Paolo Linda, I forescj)

Polirematichis e espressions idiomatichis

• di solit loc.av.
• mâl solit loc.s.m.
• pal solit loc.av.
• par solit loc.av.