Dizionari de Lenghe Furlane

amì  a|mì  [FO]

1. s.m. persone che si vuelii ben par afinitât di caratar, di interès, simpatie, stime, cence vê vincui di parintât o atrazion sentimentâl:  te ostarie si cjatà cun chei cuatri amîs che si jere fat tal paîs (Roberto Ongaro, Cretevierte); une serade in ligrie cun cuatri amîs (Franca Mainardis, Aiar di cjase); i doi a deventarin amîs (Fabian Ros, Eivissa mon amour)
   
   1. persone che si è in bogns rapuarts, ma cence vê un grant leam:  ducj amîs, cumò, che invezit prime, lui al cjalave ducj cun ombre (Maria Forte, Fadie come ale)
2. s.m. (fig.) robe che e da grant confuart:  par lui la aghe di vite e jere ancje l'unic amì (Maria Forte, Cjase di Dalban); o scuen dî "mandi" ancje ai miei libris, i amîs miôr che o ai vûts te vite (Carlo Sgorlon, Ombris tal infinît)
3. s.m. (eufem.) persone leade di un rapuart amorôs, soredut se nol è ancjemò uficiâl o se al è fûr dal matrimoni:  l'à vidût sul balcon cirche il misdì / la biele che zuiave cul amì (Pieri Çorut, Il Strolic furlan par l'an 1827)
   Sin. amant , morôs , madôr , amigo , tomât²
4. adi., s.m. che, cui che al à passion par alc:  pôc amant de pâs, amì de vuere (Pieri Çorut, Il lôf di Luncjamp); contadins bogns amîs de tiere che a lavorin (Pieri Somede dai Marcs, Il prossim)
   Sin. amant , apassionât
5. s.m. cui che si impegne pe difese di alc, ancje tal non di associazions:  no son pôcs i amîs de Furlanie, i siei inamorâts, i siei fedêi (Josef Marchet, Legnadis e pidadis); Tal moment di plui fuarte adesion il Grop amîs [di Onde Furlane] al à vût ancje 900 iscrits (Max Mauro, Un Friûl difarent: i 90 mhz di Onde Furlane)
6. s.m., adi. che, cui che al jude o al favorìs o al colabore a nivel politic o ancje militâr:  Europe e Stâts Unîts considerâts dai araps amîs di Israêl (Angelo Floramo, Cuintristorie dal Nûfcent 1970-1980)
7. s.m. (iron.) persone cognossude che no si vûl nomenâle:  «Cuissà i nestris amîs [chei de polizie segrete] ce che a cumbinaran doman di sere [...]?» (Franco Marchetta, Il numar 1089)
   Sin. amigo
8. adi. che al à une disposizion favorevule:  un fuart desideri di vê dongje personis amiis (Carlo Sgorlon, Ombris tal infinît); un destin amì che mi menave a planc intun lûc di beatitudin (Carlo Sgorlon, Il dolfin)
9. adi. che al fâs sintî familiaritât:  une sfladade umide e puartave fûr te strade l'odôr amì des stalis (Gianfranco Pellegrini, Sium de Vilie dai Sants)

Polirematichis e espressions idiomatichis

• amì dal cûr loc.s.m.
• amì de vore fate loc.s.m.
• amì di cjase loc.s.m.
• amì di famee loc.s.m.
• miôr amì loc.s.m.

Proverbis:

• a la ocasion si cognòs i amîs
• a son trops i amîs di cjacaris e pôcs di fats
• al vâl plui un amì che no cent parincj
• amì de vore fate e nemì di chê disfate
• amì di ducj, amì di nissun
• bogns i parincj, bogns i amîs, ma cuant che no 'nd è nuie a son ducj triscj
• cuant che il fûc al busine: o forescj o amîs a puartâ pueste
• cui che al è grant amì al è grant nemì
• cui che al fâs il to mistîr no ti è mai amì
• cui che ti visite tes gnocis e no ta la infermitât nol è to amì par veretât
• cul fâ plasês tu cuistis amîs, cul dî il vêr nemîs
• cul vin si sta tra amîs, cu la aghe si lave i pîts
• dai amîs mi vuardi jo, dai nemîs mi vuardi Gjo
• dai nemîs mi vuardi jo, dai amîs mi vuardi Gjo
• grancj amîs, grancj nemîs
• i amîs si cognossiju tes dibisugnis
• i fals amîs a son come lis moscjis: fin che a cjatin di mangjâ a stan in cusine
• i siôrs, amîs e lontans
• il cjan al è il plui fedêl amì dal om
• il miôr amì dal om al è il cjan
• impreste un libri, tu pierdis un amì
• la sagre dai amîs a dure cuindis dîs
• laude i amîs in public, coreziju in segret
• nol è vêr amì chel che simpri al dîs di sì
• se tu fasis debits tu cuistis parons, se tu fasis credits tu pierdis amîs
• si spere plui dai amîs che no dai parincj
• ten sù i amîs in public, coreziju in privât
• ten sù i amîs in public, coreziju in segret
• tes disgraciis si cognòs i amîs
• tes robis di pôc si cognòs i amîs
• tropons a son amîs a cjacaris e pôcs a fats