Dizionari de Lenghe Furlane

cambiâ  cam|bi|â  [FO]

1. v.tr. sostituî alc o cdn. cun alc altri o cun cdn. altri:  chê [biciclete] chi netade, piturade, cambiât cualchi toc, e devente come gnove (Carlo Sgorlon, Prime di sere); un pedoli rifat, che al cambiave fituâi ogni altri an par vie che sot di lui a murivin di fam (Pieri Menis, Agne Ursule); in trê agns a àn za cambiât president di Regjon cuatri voltis (Adrian Cescje, Memoriis di politiche linguistiche)
   Sin. baratâ , scambiâ , mudâ , variâ
   Var. gambiâ , gjambiâ , gjambâ
   
   1. sielzi o cjapâ alc diferent di prin:  si è visât che i bregons a jerin piçui e al è lât te buteghe a cambiâju
   2. zovâsi dai servizis, dal lavôr, dai prodots e v.i. di cdn. altri:  surât l'à il paron Svualt / che al ûl cambiâ gastalt (Toni Broili, Matrimoni in borascje)
   3. movisi di un puest a di un altri:  dopo vê cjapât un toc, il pedon al cambie colone e al va indenant su la colone dal toc che al à cjapât (Nilde Teresa Negro, Zuìn di scacs)
   4. v.intr. cui stes significâts des acezions parsore, ma cun complement di limitazion invezit che cun complement obiet:  cambiâ di residence par cualchi mês (Arturo Feruglio, In cîl e je une stele!…)
2. v.tr. rindi diferent di prin, modificâ, in miôr o in piês:  si jere rivâts a ridusi lis emissions di solfar, cence cambiâ il mût di vivi de int (Dario Bianchini Giaiotti, Fulvio Stel, Clime e incuinament: prime l'ûf o la gjaline?); ducj a condividevin la cussience che in Friûl no fos democrazie informative e che si veve di movisi par cambiâ lis robis (Max Mauro, Un Friûl difarent: i 90 mhz di Onde Furlane)
   Sin. alterâ , modificâ , rivoluzionâ , trasformâ , mudâ , baratâ , variâ
3. v.intr. deventâ diferent, vê mudaments:  biei timps, amîs, biei timps! epûr nol zove, / e son passâts. Ce restial al puar vieli / che i à vidûts e al campe inmò? La prove / che dut al cambie, dut: jo soi un spieli (Pieri Corvat, El cuarantevot); "Che mi conti, Rosute, che mi conti: isal alc di gnûf?" "No, ma la contesse e je cambiade une vore, saie, di îr incà" (Vittorio Vittorello, A ogni cost)
   Sin. modificâsi , mudâsi , trasformâsi , mudâ , cambiâsi , baratâsi , variâ
4. v.tr. fâ une operazion di cambi di valude:  [i toscans] a vevin un leam cetant strent cu la Tiere dal Patriarcjât, massime intal cumierç dal len, des pelicis o intal mistîr, simpri suspiet, di cambiâ monede (Angelo Floramo, Salvadis e dordei i oms, lovis lussuriosis lis feminis: il ritrat dai furlans di Franco Sacchetti)
   Sin. baratâ
   
   1. cjapâ e dâ une sume di bêç te stesse valude ma in biliets o monedis di tai diferent:  Nart Vidisson l'à consegnât al puintâr un dadîs, che jal cambii, juste par fâ alc di monede che al è sence (Giovanni Gortani, Il viaç di Vidisson)
5. v.tr. meti intor blancjarie o vistîts nets o diferents di chei di prin:  si à di cambiâ il frut
6. v.intr. passâ di un mieç di traspuart a di un altri:  la linie plui curte e duncje plui conveniente [par lâ de Europe a Córdoba ] no fâs passâ pe capitâl de Argjentine, ma par chê dal Cile, alore si cambie a Santiago e si passin lis Andis (Sandri Carrozzo, Un paîs furlan in Argjentine: Colonia Caroya)
7. v.tr., v.intr. passâ di une marcje a chê altre intun mieç di traspuart:  cambiâ de tierce ae cuarte; prin dal svolt al è miôr cambiâ la marcje
8. v.tr. fâ jessi prime o dopo intal timp:  mi domandai se a vessin cambiade la ore des lôr cunvignis, se cumò si cjatassin insiemi vie pe gnot (Carlo Sgorlon, Ombris tal infinît)
   Sin. movi , mudâ

Polirematichis e espressions idiomatichis

• cambiâ aiar loc.v.
• cambiâ arie loc.v.
• cambiâ discors loc.v.
• cambiâ idee loc.v.
• cambiâ l'aiar loc.v.
• cambiâ la arie loc.v.
• cambiâ lis cjartis in man loc.v.
• cambiâ lis cjartis in taule loc.v.
• cambiâ musiche loc.v.
• cambiâ sunade loc.v.
• cambiâ vele loc.v.

Proverbis:

• si cambie mulin ma no mulinâr