baratâ
ba|ra|tâ
[AF]
-
v.tr.
(ancje ass.)
dâ alc in cambi di alc altri, cence doprâ bêçs par comprâ e vendi:
a jerin stâts i sclâfs su la puarte a baratâ cjastinis (Dino Virgili, La aghe da pît la cleve);
al intivà une panarie di cjariesâr, dute sporcje di tiere e di sbits di gjaline. Al domandà se le vendevin, e al finì par baratâle cuntune cjalderie par fâ la polente (Carlo Sgorlon, Prime di sere);
o ai ancje memorie dai cjargnei che, subit dopo de prime e de seconde vuere, a vignivin jù in Friûl a baratâ lops cun blave (Antoni Beline, Sant Jacum, là che al finìs il mont)
Sin. cambiâ
, permutâ
, scambiâ
Var. baretâ
-
(fig.)
rinunziâ a alc, ancje imateriâl, in cambi di alc altri:
no àn mai fat violencis ma saldo paididis, cence dâ vie e baratâ la libertât dal lôr pinsîr par un piç di zucar (Ivano Urli, Il mus di Lise)
Sin. vendi
, dâ vie
, dâ
-
v.tr.
causâ un cambi, une trasformazion:
il spieli nol miore, ne al barate… / Al lasse chel che al cjate (Pieri Çorut, Il spieli)
Sin. cambiâ
, trasformâ
-
v.tr.
cjapâ, sielzi, doprâ e v.i. alc o cdn. tal puest di alc altri o di cdn. altri:
a Glemone e si barate il valisot, si 'nd lasse un, e si 'nt cjol sù un altri (Giovanni Gortani, Lant jù pe Tresemane)
Sin. cambiâ
-
passâ di une azion a di une altre:
ancje lôr, baratât la solfe in ridi, / […] / son tornâts vie contents par chel sussidi (Toni Broili, Il spetacul di mieze Cresime)
-
v.tr.
fâ o vê un scambi, ancje di ideis, conversazions e v.i.:
o ai vût ocasion di baratâ cun cualchidun di voaltris impressions e preocupazions (Adrian Cescje, Memoriis di politiche linguistiche);
si sentave dongje dal spolert […] a baratâ cuatri cjacaris cun Nene e Milio (Roberto Ongaro, Cretevierte)
Sin. cambiâ
, scambiâ
Polirematichis e espressions idiomatichis
Proverbis:
- cui che al barate paîs al barate fortune
- si barate mulin ma no mulinâr