Dizionari de Lenghe Furlane

vendi  /-è-/  ven|di  [FO]

1. v.tr. (ancje ass.) cedi a cdn. la proprietât di alc o di une plante, di un animâl o di une persone sprivade de libertât in cambi di bêçs:  [Achil Telin] al è a stâ a Bologne di cuasi dîs agns e chi al vent libris e materiâl anticuari (Donato Toffoli, Il lunari mai jessût - Tellini te prime vuere mondiâl); Nocent, al jere un pôc di timp che al cirive di vendi un cjamp (Angelo Covazzi, Cemût pesâ la tiere); al jere un om positîf soredut tal comprâ e tal vendi, tal doprâ i bêçs e la peraule (Alan Brusini, Par stradis lungjis)
   Cfr. cedi , esitâ , molâ , plaçâ
   
   1. cedi il contrat di un atlete a une altre societât in cambi di bêçs:  blocâ la scuadre come che e je, nuie vendi nuie comprà, nuie grancj afârs (Riedo Pup, O cun Zico o cence Zico)
   2. dâ par bêçs ancje un servizi, une prestazion o alc di imateriâl, ancje cence passaç di proprietât:  ma cemût si vendial sul plan comerciâl un mieç di informazion par furlan? "Une radio - al dîs Venturini - e je simpri une imagjin gjenerâl. Si vent chê imagjin […]" (Max Mauro, Un Friûl difarent: i 90 mhz di Onde Furlane); e alore i ai pensât: ce fâ? Vendi sigurazions? Vendi bytes? Vendi pistolis? Boh! (Stiefin Morat, Donald dal Tiliment)
2. v.tr. (ancje fig.) dâ vie alc, cuintri la leç o la regule etiche, par vê bêçs o beneficis:  une politiche che e continue a vendi la cjar e il cerviel dai furlans sui marcjâts di fûr vie intant che chenci lis sanguetis i supin il sanc (Pieri Piçul, Vieri e gnûf); i volês strucâ da nûf intun casin / chês frutas che a la vendin par un franc? (Giorgio Ferigo, Sul stamp di Carlo Porta); alore o disìn a ducj i nestris amîs, a ducj i furlans che no àn vendude la anime par une pironade di lidric: no si à di molâ! (Josef Marchet, La nestre lenghe)
   Sin. cedi , concedi , dâ , esitâ , molâ , rineâ , spaçâ , tradî
   
   1. tradî:  aial tentât di vendi la patrie al nemì? (Pieri Piçul, Vieri e gnûf); a vegnin impen percepîts semplicementri come "politics londinês" ven a stâi come "caste" che e à tradît e vendude la Scozie (Sergio Cecotti, Il risultât eletorâl dai partîts di identitât teritoriâl - A case study: Scottish National Party)
      Sin. rineâ , tradî
3. v.tr. presentâ intune cierte maniere, fâ pensâ che cdn. o alc a vedin ciertis carateristichis, ancje par vê un vantaç:  oparis che, ancje se a vegnin vendudis par azions strategjichis, a van dome a imponi gnovis servitûts al teritori e ae coletivitât pal interès di pôcs di lôr (Comitât 482, 27 di Fevrâr: Zornade Furlane dai Dirits)
   
   1. dî, contâ, fâ savê, viôt vendile come che si le à comprade :  alc lu ai savût di altris e lu vent daûr che lu ai comprât, cence ni zontâ ni staronzâ (Antoni Beline, Pre Pitin)
4. v.intr. di prodot o servizi, vê sucès comerciâl, jessi vendût:  un "best seller" che ogni an al vent un grum (Dree Venier, «No esistin piçulis leteraturis»)

Polirematichis e espressions idiomatichis

• vendi cassie par triacje loc.v.
• vendi cemût che si à comprât loc.v.
• vendi cjare la piel loc.v.
• vendi come che si à comprât loc.v.
• vendi cul floc a la orele loc.v.
• vendi cul flôr a la orele loc.v.
• vendi daûr che si à comprât loc.v.
• vendi fum loc.
• vendi la anime loc.v.
• vendi la anime al diaul loc.v.
• vendi pe cuarde loc.v.

Proverbis:

• a chel pês che si compre, bisugne vendi
• a vendi fen si compre miserie
• a vendi ledan si compre miserie
• a vendi ôcs si compre miserie
• al è simpri mieç mont di vendi
• cuant che la ciale e cjante di Setembar, cui che al compre blave al sta mâl a tornâle a vendi
• cuant che si à vendût il tabâr si sta tal soreli
• cui che al compre al à bisugne di cent voi, cui che al vent i 'nd baste un
• cui che al compre cence podê al vent cence volê
• cui che al è fat siôr cul vendi fritulis che nol ledi a vendi colaçs
• cui che al vent fen al compre miserie
• cui che al vent stope si vistìs di sede e cui che al vent sede si vistìs di stope
• cui che ben al compre ben al vent
• cui che ben al done ben al vent
• cui che ben al regale ben al vent
• il forment plui si lu ten e plui ben si lu vent
• il mont al è mieç di vendi e mieç di comprâ
• l'avâr al coparès lis moscjis par vendi la piel
• l'avâr al cope il pedoli par vendi la piel
• l'avâr al cope il pulç par vendi la scusse
• la robe si le vent là che no 'nd è e si le compre là che si cjatile
• lis mascaris si lis vent di carnevâl
• no si po vendi il lat e fâ formadi
• no si vent dutis lis pioris che a van a marcjât
• no stâ vendi co ducj a vendin, no stâ comprâ co ducj a comprin
• nol vâl vendi il cjôt par comprâ il purcit
• par vendi al baste un voli, par comprâ no 'nd bastin cent
• se no si mostre, no si vent
• un bon vassiel di vin e une brave fantate si vendiju a cjase
• un contadin che al vent ledan al compre pedoi
• une robe daspò vendude ducj volarès comprâle
• une vacje daspò vendude ducj volarès comprâle