Dizionari de Lenghe Furlane

tocjâ  to|cjâ  [FO]

1. v.tr. svicinâ une part dal cuarp o un imprest a alc o a cdn. fin che si à contat:  dopo un pôc o tocji il mûr e o cjati il cric (Checo Tam, Cirî gnot); Crist al è resurît dai muarts e nô lu vin viodût, lu vin tocjât, lu vin sintût a fevelâ (Francesc Placerean, Crist resurît al colme dute la sperance dal om)
   
   1. fâ che alc, spec. une part dal cuarp, al jentri in contat cun alc altri:  tignintsi gobo di tocjâ il nâs par tiere (Pieri Menis, Lis leiendis di Buie)
      Sin. dâ
   2. v.tr., v.intr. jentrâ in contat:  si cjate inte posizion juste par tirâ in puarte cu la bale che e tocje il pâl (Marc Stolf, Napoli - Udinese 2-1); [cul taramot] i morârs a àn tacât a balâ, cu lis ramacis plui altis che a tocjavin fin par tiere (Cristina Noacco, Faliscjis)
      Sin. dâ
   3. (ancje ass.) inte aghe o sim., rivâ a poiâ i pîts sul fonts:  reste dulà che si tocje!
   4. palpâ o stimulâ cu lis mans cun intindiment sessuâl:  jê e strucjave cul butilion tes tacis ridint e sghindant lis manatis che a volevin tocjâle (Alan Brusini, Gian Paolo Linda, I forescj)
      Sin. palpâ , palpaçâ
   5. spec. in espressions negativis, fâ dal mâl:  al jevà la cengle par scoreâ une altre volte, ma Tilde si parà daûr di une des taulis. "No stâ a tocjâmi!" e berlà, pronte a scjampâ di une altre bande. "Jo no ai fat nuie di mâl!" (Gianni Gregoricchio, Trê feminis)
2. v.tr. cjapâ par doprâ, cambiâ di puest e v.i.:  [il pitôr] al faseve un pâr di dîs di fieste, cence tocjâ pinei, tocjant, par altri, da spes, la tace dal clinto (Roberto Ongaro, Cretevierte); di frut insù al veve viodudis chês cjartis e si ricuardave ancjemò cuant che i barbis, i «siôrs barbis», i disevin: «Lasse chê robe tu, no stâ tocjâ… Di grant tu capirâs…» (Pieri Menis, Chei di Muraie)
   Sin. cjoli , cjapâ
3. v.tr. fâ che alc al sedi diferent, al cjapi carateristichis diviersis:  scuasi i displasè di chê modernitât, che i tocjave la sacralitât des sôs memoriis di frut (Mario De Apollonia, Il timp par ledrôs); la mediazion le veve za fate Lamuela fin li che al jere pussibil, ma Frau al tocjarès alc dal sisteme Lamuela tant par cuietâ i filologjics (Adrian Cescje, Memoriis di politiche linguistiche)
   Sin. cambiâ , mudâ , meti man
4. v.tr. (ancje ass.) meti alc par pôc timp intun licuit di mût che si imbombi:  a bevevin ancje i fruts, prin di lâ a scuele. Si deviur un ûf sbatût, slungjât ben e no mâl cul vin, e i fruts lu tocjavin cul pan, prin di lâ a scuele (AAVV, Sul florî); Zuanfrancesc al tornave sù su la armadure, al cjapave in man il pinel, lu tocjave tal colôr (Dino Virgili, La aghe da pît la cleve); al leve a pescje e a cjace, par puartâ a cjase alc di bon di tocjâ cu la polente (Cristina Noacco, Faliscjis)
5. v.tr. rivâ a un ciert puest, spec. a un limit, un tiermin e v.i. o ancje a un ciert risultât:  chest an [pelegrinaç] in Galizie, là che al à tocjât l'ultin confin de tiere (Antoni Beline, Sant Jacum, là che al finìs il mont)
   Sin. jonzi
   
   1. rivâ a di un ciert pont o a un cualsisei valôr misurabil:  la fase espansive scomençade tal 1993 e tocje il nivel massim, e za tal 2002 e tache la inversion dal cicli economic (Fulvio Mattioni, Il futûr dal Friûl: laude ae "no sotan" economy); cuntun frêt che al criche e tal Zenâr dal cuarantecinc a Bad Wanbrumn si tocjin trente sot zero (Ivano Urli, Storie di Min)
6. v.tr. (fig.) fevelâ mâl, criticâ:  no stâ fevelâ cussì di Tavin! Chel no stâ tocjâmal! (Dino Virgili, La aghe da pît la cleve); o jeri dome une vore supierbeôs e violent, che guai se mi tocjavin (Carlo Sgorlon, Prime di sere); cualchi espert di psicologjie mi veve conseât za in chê volte di no tocjâ ni predis, ni militârs ni tifôs di balon (Riedo Pup, Rispueste: cjalâ e tasê)
   Sin. degradâ , dî mâl , discreditâ , sveçâ
7. v.tr. (fig.) rivâ a fâ un dam, materiâl o imateriâl:  lui mi capìs no mo, culì a van di mieç i lôr interès, i cjamps, lis stalis, i boscs; a riscjaressin di jessi tocjâts (Alan Brusini, Gian Paolo Linda, I forescj)
   Sin. interessâ
8. v.tr. (fig.) ofindi, ferî tal spirt, fâ mâl:  Silvio mi tormentave. […] Des voltis mi plombave daprûf a colp e al cirive lis peraulis che plui a podevin tocjâmi intal gno amôr propri (Gianni Gregoricchio, Trê feminis)
9. v.tr. (fig.) dâ une cierte emozion e v.i.:  i amîs i stavin dongje e lu sbaldivin cu lis lôr contis, ma di daûr, no lu tocjavin plui cun gust nancje chês (Maria Forte, Cjase di Dalban)
   
   1. fâ impression o comozion:  al fâs dûl il patî dai puars, ma al tocje plui chel dai siôrs… I puars a vain dome la miserie, ma chei altris ancje la umiliazion di colâ tal bas (Maria Forte, La tiere di Lansing)
      Sin. colpî , comovi , ingropâ
10. v.tr. (fig.) frontâ, ancje dome in mût svelt, un argoment:  no si po tocjâ une cuistion serie e impuartante, cence che si metin in moviment lis marionetis de comedie iredentistiche a scjafoiâ ogni discussion (Josef Marchet, Rapresentants dal popul); e jere seneose di savê parcè che Eliseo al veve copât doi umign. I vignive iniment che lui al veve a pene tocjât l'argoment, la prime volte che al jere stât in cjase lôr, e dopo nol veve mai plui dit nuie (Carlo Sgorlon, Prime di sere); il so teme al tocjave ducj i ponts plui dolorôs di vuê: lis cjartis tes stradis, lis scovacis tai rivuats, il fûc tai boscs, l'incuinament des aghis e dal aiar che si respire (Alan Brusini, Amîs come prime)
    Sin. frontâ , tratâ
    
    1. vê un ciert argoment, une cierte pertinence:  o vierzarìn cumò une cuistion che e tocje il furlan e la lenghe d'oc: la palatalizazion de forme dal câs subiet intal plurâl (Zorç Cadorin, Cualchi ipotesi sul furlan di prin di scrivilu); la situazion e je complesse ancje par ce che al tocje lis competencis di control e di erogazion dai finanziaments (Linda Picco, Sandri Carrozzo, Efiets economics e ocupazionâi des leçs di tutele de lenghe furlane)
       Sin. rivuardâ¹ , intignî , interessâ
11. v.tr. sunâ un strument musicâl:  che i sunadôrs no si poran mancjâ, / che a 'nd era li tra nô di virtuôs, / che diviers instroments a san tocjâ (Eusebi Stele, La crudeltât, la tirania di Amôr); tocjant il sivilot / torne il pastôr dal prât (Pieri Çorut, La gnot di Avrîl); a pene che il fari al tocjà il violin, ducj i spetatôrs a scomençarin a balâ come mats (Luigi Gortani, Meni Fari)
    Sin. sunâ
12. v.intr. sucedi, capitâ:  nol podeve imagjinâ che i sarès tocjade une tâl (Roberto Ongaro, Il muc); Eliseo nol varès mai sperât che i tocjàs une fortune cussì (Carlo Sgorlon, Prime di sere)
    Sin. capitâ , sucedi , vignî , rivâ
13. v.intr. impers., jessi necessari:  i tocjave o prin o dopo di lâ a fâ il soldât (Pieri Somede dai Marcs, Co une vôs e clame); il mont vuê al è diviers, e tocje adatâsi (Meni Ucel, La visite dal vescul); al cjante il gjal / al criche il dì / mandi ninine / tocje partî (Popolâr, Al cjante il gjal)
    Cfr. coventâ , volê¹ , scugnî , vê
14. v.intr. jessi o lâ di dirit, di dovê e v.i.:  no ti lassarai lâ vie di chenti fin che no tu mi varâs dât ce che mi tocje! (Franca Mainardis, Un bosc cence colôrs); vêso fat i conts, voaltris abonâts, di trop che us tocje di spese, in dì? (Riedo Pup, Tal non di Raffaella afârs e guviars); a mê mari i veve tocjade une biele fete di ereditât (Gianni Gregoricchio, Trê feminis)
    Sin. competi , spietâ , vignî

Polirematichis e espressions idiomatichis

• tocjâ cu la man loc.v.
• tocjâ cul dêt loc.v.
• tocjâ cun man loc.v.
• tocjâ il cîl cui dêts loc.v.
• tocjâ il cîl cul dêt loc.v.
• tocjâ il cîl cuntun dêt loc.v.
• tocjâ il cûr loc.v.
• tocjâ il fonts loc.v.
• tocjâ il paradîs cui dêts loc.v.
• tocjâ la anime loc.v.
• tocjâ sul vîf loc.v.

Proverbis:

• a spandi vueli, a tocjin disgraciis
• al plui indeul i tocje simpri di cjapâlis
• al tocje di lassâ lâ la aghe injù e il fum insù
• cui che al bute vie cu lis mans i tocje a cercjâ cui pîts
• cui che al bute vie cu lis mans i tocje di cirî cui pîts
• cui che al mene il spêt nol tocje nancje un dêt
• dal taiepiere no stâ cjalâ, in farie no stâ tocjâ, in speziarie no stâ cerçâ
• Diu al tocje i siei
• dulà che no si dopre il cjâf ur tocje a lis gjambis
• fin che a son i dincj in bocje no si sa ce che nus tocje
• fin che un al à dincj in bocje nol sa ce che i tocje
• il Signôr al tocje i siei e jo mi tocji i coions
• in farie no stâ tocjâ, in speziarie no stâ mangjâ
• infin che si à dincj in bocje, no si sa ce che al tocje
• la tampieste no puarte mai cjaristie ma puar chel che i tocje
• no bisugne tocjâi la code al madrac
• no stâ meti la lenghe là che no ti tocje
• no stâ tocjâ il cjan cuant che al duar
• no vierzi bocje se no ti tocje
• par chê strade che no si vûl lâ al tocje di cori
• par grande che e sedi la fertaie cuant che si è in putrops a dividile, la fete e tocje piçule