Dizionari de Lenghe Furlane

spietâ  spie|tâ  [FO]

1. v.tr. vê la disposizion psicologjiche indreçade ae prospetive che tal avignî al sucedi alc, al rivi cdn. e v.i.:  a spietavin la ploie a bagnâ i cjamps flapîts (Dino Virgili, La aghe da pît la cleve); chê altre dì o soi stade a Udin e o jeri sentade in place a spietâ mio cugnât (Catarine Percude, La plui biele); la contesse Dal Bas e spietave il tram ae fermade (Alan Brusini, Amîs come prime)
   Var. spetâ , sietâ , setâ²
   
   1. (ancje ass.) ass., jessi incinte:  chei che a fumin a varessin di vê rivuart pai adolessents, pes feminis che a spietin un frut e, in gjenar, par ducj chei che ur stan ator (Guglielmo Pitzalis, Stude i spagnolets!); i vuidadôrs si inacuarzin che Vera e spiete, e cussì i fasin di mot che si senti denant (Ivano Urli, Storie di Vera)
      Sin. comprâ , jessi in spiete
2. v.tr. (ancje ass.) lassâ passâ timp, intardâ une azion:  Laurinç al jere un di chei puems che daspò gustât a spietavin plui di dôs oris prin di fâ il bagn, tirant slavaris tal spieli de aghe (Agnul di Spere, Istât)
   
   1. sta fer o passîf o cuiet o sim. intant che al sucêt alc o prime che al sucedi alc:  la Ulive e butà il lat tal seglot, e spietà che lu pesassin e jal segnassin su la cjarte (Maria Forte, La tiere di Lansing)
   2. restâ disponibil:  "Ma… se une dì, Rosute, alc al cambiàs o tu tu cambiassis pinsîr… jo… jo ti spieti: o soi simpri chel!…" (Dino Virgili, La aghe da pît la cleve)
3. v.tr. vê une prevision, une prospetive, une sperance o ancje une volontât, une pretese pal avignî:  Lise e cjapà coragjo e i à contât dut, parcè che e jere vignude e ce che e spietave di jê (Pieri Menis, La maghe no fale); vêso savude la ultime? A son stâts a robâ l'aur sul altâr di Madone di Gracie a Udin. Cui? Se o spietais che ju cjatin! … (Josef Marchet, Lis predicjis dal muini); tornât in libertât, al spietave di jessi sassinât dai compagns come traditôr (Carlo Sgorlon, Ombris tal infinît)
   Sin. spietâsi
   Cfr. sperâ¹
4. v.tr. ancje cun subiet inanimât o astrat, jessi pront o previodût o prevedibil, jessi di fâ o di frontâ:  a tornavin dentri, dulà che ju spietave alc di cene e cualchi ore di sium (Maria Forte, Cjase di Dalban); te cjamare mi spietavin i lapis, il tireliniis, lis cjartis (Alan Brusini, Gian Paolo Linda, I forescj)
5. v.tr., v.intr. jessi intune situazion sospindude, no sierade, no sodisfate e v.i.:  il gno studi al spiete ancjemò un editôr e dut câs - ancje se no varès di dîlu jo - al è un saç interessant (Pierluigi Visintin, Friûl e furlans te Histoire de ma vie di Giacomo Casanova); tai Stâts Unîts la "cuistion indiane" no je sierade e e spiete inmò justizie (Carli Pup, Teritoris - Oms di Libertât)
6. v.intr. jessi dovê, dirit, jessi destinât, assegnât e v.i.:  a pretindevin di jessi paiâts plui di chel che ur spietave (Giovanni Pillinini, Zuan Batiste Cavedalis - Une vite esemplâr); i spietave ae assessore ae culture la nomine dai trê (Adrian Cescje, Memoriis di politiche linguistiche); no son lâts cuintri lis leçs, ma a àn dome vantât un lôr dirit, che ur spiete ancjemò dai timps dai patriarcjis di Aquilee (Alviero Negro, Int di masnade)
   Sin. tocjâ

Polirematichis e espressions idiomatichis

• spietâ cun mil mans loc.v.

Proverbis:

• a vê pure la cussience, ogni ben si po spietâ
• al è miôr misurâsi di bessôi che no spietâ di sei misurâts
• bisugne dâsi lis mans ator e no spietâ la mane dal cîl
• cuant che al è timp di fâ, fâs cence stâ a spietâ
• cui che al à timp che nol spieti timp
• cui che al po fâ vuê che nol spieti doman
• cui che le fâs le spiete
• il timp al ven par chel che al sa spietâ
• la muart e ven cuant che mancul si le spiete
• miôr spietâ e spietâ ben
• no bisugne spietâ la aghe al cûl
• no stâ spietâ di sierâ il cjôt daspò scjampade la purcite
• Sante Catarine o sîs o siet co vigne, spietimi a Sant Tomât che o vignarai cul cjar cjamât
• spietâ e no vignî a son robis di murî
• tâl si fâs, tâl si spiete