Dizionari de Lenghe Furlane

volê¹  vo|lê  [FO]

1. v.mod. prime di un infinît, al segne une volontât, une intenzion:  jo no vuei tornâ indaûr, o vuei lâ indenant, vuê (Francesc Placerean, Pe unitât di glesie in Friûl); Julius i domandà ce che e voleve bevi (Fabian Ros, Eivissa mon amour)
   Sin. intindi , vê intenzion , vê voie
   Var. olê , vorê , orê , vuarê
   
   1. ancje sotintindint l'infinît, par vie che al è clâr di ce che si è za dite prime:  si rive sì, baste volê, si rive a fâ dut… (Pieri Somede dai Marcs, Resurezion a Pontinie)
   2. (enf.) ancje par dâ plui fuarce ae espression, ancje cun subiet inanimât o che nol à une vere volontât:  ogni tant, a i rivava dongja par comedâi li mans che a na volevin stâ in crous sul stomi (Novella Cantarutti, La not di Gjoriu)
   3. (enf.) in interogativis con valôr retoric o ancje di imperatîf:  "Volêso tasê?" (Pieri Somede dai Marcs, Ursule)
2. v.tr., v.mod. (enf.) in espressions retorichis, soredut domandis, pensâ:  "Po no vuelistu che o sepi?" (Roberto Ongaro, Il muc); "Ce afâr? Cemût vuelistu rivâ a soreli jevât cumò?" (Stiefin Morat, Donald dal Tiliment)
3. v.tr. desiderâ:  o vin volût un sfuei te nestre lenghe da cjâf a pîts (Josef Marchet, Un element fondamentâl dal moviment autonomistic); achì no volìn ni vueris, ni confins, ni fassisims (Marc Stolf, La «marcetta su Gorizia» e altro marciume)
   
   1. ancje cun predicatîfs o complements:  un om che al amave la sô tiere furlane, la Patrie dal Friûl, chê che e va de Livence al Timau, che le voleve liberade des sôs dificoltâts storichis (Adrian Cescje, Tal non di Fausto Schiavi); in barufe continue cun mê mari che mi voleve in cjase, ubidiente e "sestine" cemût che mi tontonave (Gianni Gregoricchio, Trê feminis)
4. v.tr. domandâ tant che presit o compens:  lôr par solit i domandavin il disturp ma lui nol voleve mai un centesim (Antoni Beline, Pre Pitin); dut al è lât ben, ma ce mostre e ce furbe, e à volût cinc francs (Pieri Somede dai Marcs, Ursule)
   Sin. domandâ
5. v.tr. cirî cdn., domandâ di cdn.:  il caporâl di zornade mi dîs di lâ sù in furarie che il comandant di compagnie mi voleve (Pieri Menis, Cemût che o soi restât caporâl); un clap sul balcon a lu dismovè dal dut: cualchidun a lu voleva (Novella Cantarutti, Il Bolp)
6. v.tr. acetâ, spec. tant che morôs o morose o tant che om o femine:  a i veva dibot cigât: "Se i tu mi voul, tu mi voul e se no i ti tuei!" (Novella Cantarutti, Se i tu mi voul, tu mi voul); no, no… lui nol voleve la fie di Nives, cu la muse rosse come un cjapon… i plaseve la fantate more (Checo Tam, Puiesis); Valerie e je la femine de mê vite e jo le vuei (Roberto Ongaro, Il muc)
7. v.tr. vê di bisugne:  lis plantis grassis no vuelin tantis curis
   Sin. domandâ
8. v.intr. jessi di bisugne, jessi necessari, jessi just, ancje cu la particule "i":  «Ca a vuelin bogns braçs par lavorâ e no stupideçs…» (Pieri Menis, Chei di Muraie); a lâ cuintri il plevan Gjentilin al voleve fiât! (Riedo Pup, La sigurazion des vacjis); i vûl timp par scuvierziju… Ma ju cjaparìn ancje lôr (Alviero Negro, Int di masnade); par fâ un franc a vuelin dîs palanchis (Alan Brusini, Il coragjo de sclope)
   Sin. coventâ
9. v.intr. al pues formâ corelativis:  vûstu par colpe dal stâ dibant o vûstu forsit ancje par vie di chei telefilms di polizais che i fasevin compagnie sopressant denant de television, vie pai agns e tacà a fâsi suspietose e curiose (Antescûr, L'om misteriôs)

Polirematichis e espressions idiomatichis

• bocje ce vûstu loc.inter.
• se Diu al vûl loc.av., loc.inter.
• se Diu vûl loc.av., loc.inter.
• tant che si vûl loc.av.
• trop che si vûl loc.av.
• volê ben loc.v.
• volê bon loc.v.
• volê dî loc.v.
• volê mâl loc.v.
• volê meti loc.v.
• volê significâ loc.v.
• volê un ben di vite loc.v.
• volêndi tantis loc.

Proverbis:

• a 'nd volarès di macarons par stropâur la bocje a ducj
• a cui che al vûl, no i mancje il timp
• a cuinçâ la salate al vûl un mat a meti il vueli e un savi l'asêt
• a fâ bon pan, al vûl bon gran
• a fâ pan i vûl levan
• a lâ a marît a vuelin doi cjaçuts: un di fridi e un di vaî
• a lâ in malore no i vûl miserie
• a lâ in malore no i vûl sparagn
• a menâ il cjar al vûl tamon
• a ore cjoche, ducj vûl dî la sô
• a Sant Martin al vûl il forment tal cjamp o tal mulin
• a son i 'sâfs che a volaressin piâ dut il fossâl
• a volê contentâ une nuvice e ven la stice
• a volê fâ robe no bisugne vê pôre dal diaul
• a volê gjavâ i clauts cui dincj si reste sdenteâts
• a volê trai il ves plui grant de buse o che il ves nol passe o che la buse si sprece
• a vuelin dôs cjampanis par sunâ parie
• a vuelin dôs robis par fâ stâ ben une cjase: predi e purcit
• a vuelin fats a fâ umign
• a vuelin onzudis lis ruedis par che a zirin
• a vuelin siet umign a fâ une cjase, e baste une femine a strucjâle
• a vuelin trê robis par salvâsi: bon voli, buine gjambe e puarte vierte
• al devente ce che Diu al vûl e no ce che il diaul al pense
• al vûl che al fasi cui che al à man in paste
• al vûl inzen a messedâle cul len
• al vûl inzen ancje a fâ la polente cul len
• al vûl lat a fâ formadi
• al vûl levan par fâ pan
• al vûl mistîr a fâ cuincîr
• al vûl mistîr in dut e lassâur cjapâ lis surîs ai gjats
• al vûl rispietât il cjan dal paron
• al vûl un brâf mestri a stimâ une fabriche
• al vûl un dal art a stimâ il gjenar
• ancje il voli al vûl la sô part
• Avrîl al vûl ploie par sutîl
• bisugne riscjâ se si vûl roseâ
• bisugne rispietâ se si vûl sei rispietâts
• bisugne rompi i ûfs se si vûl fâ la fertaie
• ce che i va i vûl
• ce che no si volarès al capite aduès
• ce che no si vûl finî si fâs di mancul di començâ
• ce zovial volê ce che no si po vê?
• ce zovial volê là che no si rive?
• cjar di vedran no le vûl nancje il cjan
• cuant che a 'nd è masse parons, si po fâ ce che si vûl
• cuant che al è nûl, al po plovi cuant che al vûl
• cuant che Diu al vûl cussì, nol è nuie di masse
• cuant che Diu nol vûl, i sants no puedin
• cuant che il ben no si lu vûl, il mâl al è preparât
• cuant che il Signôr al vûl pierdi un, i cjol il judizi
• cuant che mus al vûl, musse no vûl; cuant che musse e vûl, mus nol vûl
• cuant che no 'nd è, la muart no 'nd vûl
• cuant che no 'nd è, nancje la muart no 'nd vûl
• cuant che no si vûl finî si fâs di mancul di tacâ
• cuant che si vûl bastonâ, si cjate simpri un len
• cui bogns si fâs ce che si vûl, cui triscj miôr che si po
• cui che al à di vêju al vûl vêju
• cui che al viôt, sint e tâs, al è segn che al vûl vivi in pâs
• cui che al viôt, sint e tâs, al vûl vivi in pâs
• cui che al vûl aghe che al ledi a la fontane
• cui che al vûl ancje al po
• cui che al vûl che al ledi; cui che nol vûl che al mandi
• cui che al vûl che si discomodi
• cui che al vûl cjapâ ducj i uciei che a passin no 'nt cjape nissun
• cui che al vûl cjapâ il gût, bisugne che si bagni il cûl
• cui che al vûl cjar che al ledi in becjarie
• cui che al vûl fâ ce che nol po al cjate ce che nol vûl
• cui che al vûl gjoldi di domenie che al sparagni la sabide
• cui che al vûl il pape che al ledi a Rome
• cui che al vûl jessi masse dret nol è maladet
• cui che al vûl jessi masse maladet nol va dret
• cui che al vûl jessi rispietât che al rispieti
• cui che al vûl la fie che al cjareci la mari
• cui che al vûl pes che si bagni i pîts
• cui che al vûl provâ lis penis dal infier che al fasi di Istât il fari e il cjaradôr di Invier
• cui che al vûl racuei che al semeni
• cui che al vûl salvâ la panze pai fîcs che nol ledi in vuere
• cui che al vûl savê masse al sa di chel savôr che mi capîs
• cui che al vûl stâ ben une dì, che al mangji ben; un mês, che si maridi; un an, che al maci il purcit; dute la vite, che al ledi predi
• cui che al vûl stâ san che al pissi dispès tant che il cjan
• cui che al vûl un bricon che lu mandi a scuele o ben a passon
• cui che al vûl un cjan di cjace che lu cjoli di raze
• cui che al vûl un mangjon che al tegni un stiçon
• cui che al vûl une buine fantate che se fasi
• cui che al vûl vê che al ledi, cui che nol vûl vê che al mandi
• cui che al vûl vê lavôr mâl fat, che lu pai denant trat
• cui che al vûl vivi e che al vûl stâ ben che al cjoli il mont come che al ven
• cui che dut al vûl di rabie al mûr
• cui che i da il dêt al mat, al vûl il dêt cun dut il braç
• cui che no 'nd vûl che si sofli
• cui che nol à cjaval e al proviôt scorein, siele e spiron, se al vûl al è un mincjon
• cui che nol fâs cuant che al po, daspò nol po fâ cuant che al volarès
• cui che nol vûl che al mandi mes, cui che al vûl che al ledi stes
• cui che nol vûl il ben, il mâl al è preparât
• cui che nol vûl in chest mont sfadiâ che nol stedi a nassi
• cui che nol vûl nol merte
• cui che nol vûl pierdi che al fasi di mancul di zuiâ
• cui che nol vûl vê ostarie che al buti jù la frascje
• cui che nol vûl vê ostarie che al dispicji la frascje
• cui che plui ind à plui al volarès vênt
• cui che se vûl che se gjoldi
• cui che se vûl se merte
• cui che si vûl comodâ si dêf discuinçâ
• cui che simpri al lavore al è segn che al vûl lâ in malore
• cui che trop al vûl nol à nuie
• cui le intint, cui no le intint e cui nol vûl intindile
• cui no le capìs, cui nol vûl capîle e cui fâs di no capîle
• cui triscj bisugne fâ miôr che si po, cui bogns si fâs cemût che si vûl
• cui uciei i vûl la polente cjalde
• cul bon fâs ce che tu vûs, cul trist ce che tu pûs
• daspò dal batisim, ducj a volaressin sei santui
• Diu de int nol vûl jessi adorât corint
• ducj a vuelin dî la sô
• e je caritât tant a judâ cui che al vûl fâ robe, come a dâi un poc a cui che al vûl lâ in malore
• e vûl fam par savê ce che al è bon
• e vûl tele a fâ cjamesis
• fâs ai altris ce che tu volaressis fat a ti
• flât di cûl al va là che al vûl
• i cuarins a volaressin cuets cu la sclopetade
• i gjenitôrs no vuelin viodi mai i difiets de lôr prole
• i scherçs a vuelin fats a timp e lûc
• i siôrs a àn ce che a vuelin
• i siôrs a àn il paradîs in chest mont e se a vuelin ancje in chel altri
• i testarts le vuelin simpri a lôr mût
• i viei a vuelin che ancje i zovins a fasin come lôr
• i vûl bighe no cjavei
• i vûl fede a lassâ lis croçulis
• i vûl inzen a fâ la mignestre cul len
• i vûl saût a fâ scliçots
• il diaul nol vûl sintî il qui habitat
• il mâl che si vûl nol dûl
• il mâl che si vûl nol è mai di masse
• il mont al vûl sei ingjanât
• il pecjât nol vûl lûc
• il pes al vûl fresc
• il primarûl al nas cuant che al vûl
• il Signôr nol vûl mai nissun di content
• il vuei al sta tai crets
• jude cui che al à voie di fâ ben e cui che al vûl lâ in malore judilu a strucjâ
• l'om ce che al vûl vuê, doman nol vûl
• l'ûf al vûl nec durum nec tenerum sed basotum
• la cjarte si lasse meti sù ce che si vûl
• la muart no vûl vê mai tuart
• la plui grande fadie e je di fâje intindi a cui che nol vûl capîle
• la tiere no vûl ni puars ni avârs
• la vedrane e volarès vêlu, la maridade e volarès tornâlu indaûr
• la vît i vûl il so pâl
• lasse che a disin ce che a vuelin e fâs ce che al va ben
• mats e fruts a puedin dî ce che a vuelin
• mats, feminis, paron, timp e cûl fâs ce che al vûl
• metimi râr se tu vûs che ti jempli il granâr
• misuriti se no tu vûs sei misurât
• nissun plui sort di cui che nol vûl sintî
• no si da al mont un vuarp plui grant di chel che nol vûl viodi
• no si po volê ben cuant che dal cûr nol ven
• no stâ fâ il mâl se no tu vûs sei odeât
• no stâ fâ mâl se tu vûs vê ben
• no stâ fâur ai altris ce che no tu vûs che ti fasin a ti
• no stâ fumâ se tu vûs campâ
• no vûl grant fadie a fâ il coion
• nûl e cûl al fâs ce che al vûl
• ogni mulin al vûl la sô aghe
• ognidun al po fâ ce che al vûl
• onorimi se tu vûs che ti onori
• pal mus al vûl baston
• par che al sedi bon il cafè a vuelin trê robis: cualitât, cuantitât e savêlu fâ
• par che e vegni biele ue e biele blave a vuelin cjantadis lis implorazions de ciale
• par chê strade che no si vûl lâ al tocje di cori
• par cognossi il furp, al vûl un furp e mieç
• par cuinçâ ben il lidric al vûl: pal vueli un avâr, pal asêt un moderât e a messedâlu un mat
• par decidi di une fabriche al vûl un mestri
• par fâ pan i vûl farine e levan
• par fâ robe al vûl levan
• par lâ in malore no i vûl sparagn
• par lâ in malore no vûl miserie
• par ogni sant i vûl la sô cjandele
• par salvâsi a vuelin trê robis: bon voli, buine gjambe e puarte vierte
• par vê la pâs in chest mont a vuelin trê robis: une femine par cjase, une passare par vile, une cocule par sac
• passât il trenteun no lis vûl plui nissun
• plui si 'nd à, plui si volarès vênt
• primarûl al po nassi cuant che al vûl
• primarûl cuant che al vûl
• ravi, ravi: cui che si 'nd vûl, si 'nd gjavi; ravi, raveti: cui che si 'nd vûl, si 'nd meti
• rispiete se tu vûs sei rispietât
• Sant Florean nol vûl ingjan
• se Diu al vûl, bisugne rispietâ la sô sante man
• se Diu nol vûl, no si môf une fuee di pôl
• se la crôs no si vûl che e pesi, si à di puartâle e no di strissinâle
• se la done a vûl comparî, la crodie dal cjâf e devi dulî
• se no si po fâ come che si volarès, si scuen fâ come che si pues
• se no tu vûs che lis sepin, fâs di mancul di fâlis
• se no tu vûs insegnâ ben, fâs di mancul di insegnâ mâl
• se o ves un fi che al ves non doman, o volarès maçâlu daurman
• se si vûl conservâ la amicizie, bisugne stâ lontans
• se si vûl piâ pes, bisugne bagnâ il cûl
• se si vûl pierdi la amicizie, bisugne imprestâ bêçs
• se si vûl savê la zornade, si cjale la matine
• se si vûl vê un gust, bisugne paiâlu
• se tu vûs che i altris a mantegnin il to segret, scomence a mantignîlu tu
• se tu vûs cognossi la fie, cjale la mari
• se tu vûs comandâ, impare prin a ubidî
• se tu vûs fâ savê une robe, contile in segret
• se tu vûs sei ben viodût, tenti sort e ancje mut
• se tu vûs sparniçâ une robe, contile in segret
• se tu vûs vê ben, fasilu
• se tu vûs vê reson, zighe fuart
• si fâs ce che si pues e no ce che si volarès
• sossedâ nol vûl ingjan: o sium o fam
• sossedâ nol vûl mintî: o fam o sêt o sen di lâ a durmî o cualchi cjosse che nol olse a dî
• sta cul to avuâl se tu vûs fâ bon carnevâl
• su la cjarte si po scrivi ce che si vûl
• tes causis a vuelin trê robis: vê reson, savêle dî e cjatâ cui che le dedi
• ucii il cjan al lôf se tu vûs che no ti vegni cuintri
• une robe daspò vendude ducj volarès comprâle
• une vacje daspò vendude ducj volarès comprâle
• vûstu vê pâs in famee, cusii la lenghe a la femine