Dizionari de Lenghe Furlane

costruî  cos|tru|î  [FO]

1. v.tr. fâ alc metint dongje plui elements:  tornât a cjase sul ronc sot dal cjistiel al scomence a costruî e sperimentâ lis primis lampadinis eletrichis (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât); il calci, che al jude a costruî i vues, al è la sostance plui impuartante inte prevenzion e inte cure de osteoporosi (Guglielmo Pitzalis, Ocjo ai vues!)
   Sin. fâ , dâ dongje , meti dongje , fabricâ
   
   1. (ancje ass.) fâ oparis di edilizie, di inzegnarie e v.i.:  o vin fat lis fondis, che a rivin jù fintremai a 50 metris sot tiere […]. Po dopo, o vin di costruî 108 plans (Oscar Puntel, Mario Collavino: une bandiere furlane parsore il gnûf World Trade Center di New York); su lis primis faldis des monts a forin costruîts cjistiei e fortificazions (Josef Marchet, Cuintristorie dal Friûl fin sot la Italie); il dislocament des aghis dal Tiliment e de Ledre par costruî un canâl navigabil di Udin fin a Sant Zorç di Noiâr (Giovanni Pillinini, Zuan Batiste Cavedalis - Une vite esemplâr)
      Sin. dreçâ sù , edificâ , erizi , fabricâ , tirâ sù , fâ sù
2. v.tr. ancje riferît a robis astratis, creâ, inventâ:  la justizie vere e je tes mans de umanitât, par chest jo o scombat, par chest o dovìn scombati, prin par imbastî e po par costruì un gnûf ordin sociâl (Pieri Somede dai Marcs, Un pugn di moscjis); lis primis provis di costruî imprescj di contabilitât economiche nazionâl a puedin rimontâ a la Ingletiere dal Sîscent (Marzi di Strassolt, Dal Prodot Interni Lort aes misuris dal benstâ)
   Sin. argagnâ , burî fûr , comedâ , componi , creâ , cumbinâ , fâ dongje , fâ sù , fondâ , ideâ , impastanâ , implantâ , inmaneâ , inventâ , meti adun , meti sù , organizâ , rangjâ
3. v.tr. [TS] ling. disponi i elements di une proposizion secont lis normis gramaticâls e sintatichis di une lenghe