Dizionari de Lenghe Furlane

fabricâ  fa|bri|câ  [AF]

1. v.tr. fâ, produsi midiant di un lavôr tecnic, artesanâl o industriâl:  par une difese o par une «riscosse» cu lis armis, la Italie e scugnarès pensâ di fabricâ bombis atomichis (Josef Marchet, No si à di judicâ il passât cu la mentalitât di cumò)
   Sin. dâ dongje , fâ sù , meti adun , meti dongje , parâ dongje , fâ , produsi
   Var. frabicâ
   
   1. (ancje ass.) fâ un edifici:  a volerin provâsi ancje lôr a fabricâ une glesie (Luigi Gortani, Il Deu di Cjargne); a tacarin a fabricâ: a faserin sù lis cjasutis di clap e di stran, no tacadis, ma une chi e une là (Dino Virgili, La aghe da pît la cleve)
      Sin. fâ sù , tirâ sù , costruî , edificâ
   2. (fig.) fâ, vê un risultât ancje no materiâl:  la grant part dei malans, / che nô disìn che vegnin da là sù, / si fabrichin ca jù (Pieri Çorut, Pronostic del 1836)

Proverbis:

• cui che al à bêçs di no savê ce fâ, che si meti a litigâ o a fabricâ
• cui che al à bêçs di no savê ce fâ, che si meti in lît o a fabricâ
• cui che al fâs fabricâ al à bêçs in casse, cui che al fâs piturâ ind à di masse
• fabricâ cui bêçs in casse, piturâ se a 'nd è masse
• il fabricâ al impuarìs a gote a gote
• la cjase dai contents e je ancjemò di fâ, e no cjatin claps di fabricâ
• la cjase dai contents e je ancjemò di fabricâ
• la cjase dai contents e je di fabricâ e nissun no le rive adore di fâ