Dizionari de Lenghe Furlane

puartâ  puar|tâ  [FO]

1. v.tr. movi alc o cdn. di pês di une bande a di une altre:  "Signour, a tornin i nustris fantats…" […] "Ducjus?" […] "Ducjus, ducjus, a son, sì, zent. Ma un a lu puartin. Un a lu puartin ta un jetut di ramassis […]" (Pier Paolo Pasolini, I Turcs tal Friûl); il camarîr […] al puartave guantieris di cjicaris di cafè (Agnul di Spere, Messe di misdì a Varsavie); o vevi di puartâi jo la bocjade te sô bocje, par vie che lui nol rivave bessôl (Ivano Urli, Storie di Min)
   Sin. menâ
   Var. partâ
   
   1. fâ lâ di un puest a di un altri, compagnant o fasint montâ tun mieç di traspuart:  "Lu puartio in machine?" i vevi dite a Pieri. Mi rispuindeve che al veve miôr lâ cu la coriere (Alan Brusini, Gian Paolo Linda, I forescj)
   2. (fig.) indreçâ, fâ rivâ a di un pont, a di une consecuence e v.i.:  al cirive di puartâ il discors su chel argoment, ma Rita e rivave simpri a scjantonâ pe plui curte (Carlo Sgorlon, Prime di sere)
2. v.tr. tignî cun se intant di un viaç:  o ven a cognossi che el benedet omp nol à puartât nissun fagot cun lui (Arturo Feruglio, Viaç a Vignesie)
   Sin. puartâsi , puartâ daûr , puartâsi daûr
3. v.tr. traspuartâ par fâ cumierç o par furnî cdn. di alc.:  a Sant Denêl, che i siôrs a tignivin platât il gran disint che no 'nt vevin, cuant che lu puartarin sul marcjât, l'an dopo, la int si inacuarzerin che al jere patît e a volevin copâ i siôrs (Dino Virgili, La aghe da pît la cleve)
4. v.tr. fâ vê tant che regâl:  a ti ce ti aie puartât chest an sante Luzie? (Carlo Sgorlon, Il dolfin)
5. v.tr. fâ vê un servizi, meti a disposizion une risorse:  il Comun al veve impegnât par 30 agns intal 1852 la Societât Roucher e Favier […] di puartâ la iluminazion a gas inte citât (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
   Sin. menâ
6. v.tr. (coloc.) controlâ un mieç di traspuart, un veicul e v.i.:  «Ce che al vûl dî savê puartâ une machine» dissal l'operari, mostrant il fantat (Carlo Sgorlon, Prime di sere)
   Sin. menâ , vuidâ
7. v.tr. (ancje ass.) direzi il compagn, o pal solit la compagne, tal bal in doi
   Sin. menâ
8. v.tr. rivâ a sostignî o a tignî dentri une cierte cjame:  il so cjar, cu lis ruedis di camion, fuart e lizêr, che al puartave come nuie une cjame di trente cuintâi (Carlo Sgorlon, Prime di sere)
   Sin. tignî
9. v.tr. mostrâ intorsi cierts segns, improntis, olmis:  [i paîs] a puartin i segns evidents dal ultin disastrôs taramot dal 1976 (Luigina Di Giusto, Andrea Guaran, Mauro Pascolini, La culine furlane)
   Sin. vê
   
   1. vê segnât o scrit parsore:  il memoriâl, firmât di Tellini […] al puarte la date dal 4 di Mai dal 1916 (Donato Toffoli, Il lunari mai jessût - Tellini te prime vuere mondiâl)
      Sin. vê , ripuartâ
10. v.tr. vê intor o usâ a vê intor un vistît o sim.:  o zurarès che in ciertis cocis, che a puartin il cjapiel, al sedi plui dificil di fâ jentrâ une idee, che no tal mio cjâf di piere (Guido Antonioli, Florean dal Palaç, I, 1); a puartavin su la petorine de cjamese blancje une ponte verde di ruscli cu lis balutis rossis, par fâ la bandiere taliane (Dino Virgili, La aghe da pît la cleve)
    Sin. vê , vê intor , vê sù
11. v.tr. vê la barbe o i cjavei taiâts intune cierte maniere:  il Signôr al ordenà a sant Pieri di petenâlu. Al puartave i cjavei a la nazarene e sant Pieri cul disgredei i faseve la rie (Catarine Percude, Il voli del Signôr)
    Sin. vê
12. v.tr. (ancje ass.) vê intal grim un embrion o une creature dilunc de gravidance:  timp medio di puartâ: de cjavale 336 zornadis, de musse 350 zornadis, de vacje 280 zornadis, de cjavre 150 zornadis [...] (Giuseppe Ferdinando del Torre, Il contadinel. Lunari par l'an 1871)
13. v.tr. vê un non o sorenon, une denominazion, une cualifiche, un titul e v.i.:  se a puartassin un non che nol oblee, alore sì che a podaressin lâ pes Gjermaniis e ancje jo o finirès di strussiâmi, ma a son di une famee che e scuen tignîsi sù (Maria Forte, Cjase di Dalban); cheste creaturute no à nissune colpe, e je dal vuestri sanc, e puarte il vuestri non… (Pieri Somede dai Marcs, Une butule verde)
    Sin. vê
14. v.tr. comunicâ, riferî, trasmeti, fâ savê:  cui che al torne dal Venezuela, al puarte di sigûr i salûts di Dreute Citòs. Dreute al mande a saludà ducj, ma soredut i vecjos (Alan Brusini, Alpin jo mame!); al funerâl, al puartà la sô preiere di cûr (Maria Forte, Cjase di Dalban)
    Sin. pandi , dî
15. v.tr. doprâ intun discors, intun confront, intun resonament:  al scrîf di vêi fevelât mieze ore, puartant un grum di buinis resons, «ma resons dal gjenar no àn mai fat prese […]» (Pierluigi Visintin, Friûl e furlans te Histoire de ma vie di Giacomo Casanova)
    Sin. puartâ indevant , puartâ fûr , presentâ
16. v.tr. causionâ, provocâ:  «Il taramot» ur diseve Mirco, «come che al à fat disastris, al puartarà culì bêçs a paladis». E nissun i crodeve. «Ben miserie al puarte» (Alan Brusini, Par stradis lungjis)
    Sin. menâ , menâ dongje
    
    1. provocâ une emozion, une sensazion:  cheste clime di fede e cheste dimension religjose e umane che la domenie e veve a puartavin ligrie e gjubialitât (Riedo Pup, Tornìn a fâ fieste)
       Sin. menâ
17. v.tr. determinâ ciertis cundizions atmosferichis:  i aiars jù […] di Est Nordest; a menin aiar sut, che al puarte biel timp, ma vie pal Invier l'aiar al pues jessi ancje une vore frêt (Stefano Micheletti, Marcellino Salvador, Notis di meteorologjie pal Friûl - Vignesie Julie)
    Sin. menâ
18. v.tr. (ancje ass.) di strade o sim, lâ intune cierte direzion:  a cjaminavin svelts pal troi che al puarte su la Montgrande (Tarcisio Venuti, La cjase di Toni)
    Sin. menâ
    
    1. (fig.) fâ rivâ a une cierte situazion, cundizion, azion e v.i.:  il discors lu puartave a fevelâ di robis vieris e lontanis (Alan Brusini, Gian Paolo Linda, I forescj)

Polirematichis e espressions idiomatichis

• a gjambis puartaitmi loc.av.
• puartâ a cjase loc.v.
• puartâ a dissen loc.v.
• puartâ a spale loc.v.
• puartâ a spalis loc.v.
• puartâ aghe al mâr loc.v.
• puartâ ator loc.v.
• puartâ claps te Tor loc.v.
• puartâ corot loc.v.
• puartâ dongje loc.v.
• puartâ fortune loc.v.
• puartâ fûr loc.v.
• puartâ fûr la scusse loc.v.
• puartâ in palme di man loc.v.
• puartâ in sene loc.v.
• puartâ in taule loc.v.
• puartâ indenant loc.v.
• puartâ indevant loc.v.
• puartâ insom loc.v.
• puartâ la aghe cu la orele loc.v.
• puartâ la aghe cu lis orelis loc.v.
• puartâ la cjase sot il cjapiel loc.v.
• puartâ la crôs loc.v.
• puartâ la part loc.v.
• puartâ pazience loc.v.
• puartâ rispiet loc.v.
• puartâ tes stelis loc.v.
• puartâ vie loc.v.
• puartâ vie zornadis di ligrie loc.v.
• puartâle fûr loc.v.

Proverbis:

• a chel mus che nol puarte bast, no si dai vene
• a fuarce di puartâ, ancje un scarpin di lache al devente une çavate
• a prometi no dûl la schene, ma ben a puartâ il fas
• aghe cidine e puarte ruvine
• aiar di fressure al puarte in sepulture
• al è un trist uciel chel che nol puarte cun se la plume
• ambassadôr nol puarte pene
• bisugne scomençâ a puartâ il jôf a buinore
• chê che al da il Signôr si le puarte vulintîr, chê che si fâs di bessôi e je plui pesante di puartâ
• cuant che il fûc al busine: o forescj o amîs a puartâ pueste
• cuant che la femine e nas l'om al à di savê puartâ il fas
• cuant che la femine si spose, l'om al à di puartâ la crôs
• cui che al puarte la crôs nol po cjantâ messe
• cui che al tire il cuartês che al puarti il pês
• cul perdonâ ai triscj si puarte dam ai bogns
• darandan il malât al puarte il san
• difiet di nature si puarte in sepulture
• dulà che il cûr al tire lis gjambis a puartin
• fortune in amôr e puarte fortune al zûc
• i bêçs no si puartiju cun se
• i façolets a puartin lagrimis
• il diaul une volte al puartave e cumò che al è vieli al strissine
• il just al puarte la pene dal pecjadôr
• il mus al puarte il sac ma al mangje ancje la semule
• il timp nol puarte spade
• l'om la sô sorte le puarte tai comedons
• l'uciel al puarte e al ven puartât
• la aghe corinte no puarte sporcjetât
• la puarte e dîs: puarte
• la robe no si le puarte là vie di là
• la tampieste no puarte mai cjaristie ma puar chel che i tocje
• la tampieste no puarte miserie
• lis gjambis a puartin là che il cûr al tire
• lis gusielis a puartin pinsîrs
• ni in taule ni in jet no si puarte rispiet
• no si da pan che nol puarti ancje un insegnament
• no si po cjantâ e puartâ il sant
• no si po cjantâ e puartâ la crôs
• no si po puartâ simpri la mascare
• nol è mai un mâl che nol puarti un ben
• nol è negozi in tiere che al puarti plui dam de vuere
• ogni intardament al puarte pericul
• puartâ aghe al mâr
• puarte al vûl dî puarte a cjase
• se dutis lis vacjis a puartassin il sampogn
• se la crôs no si vûl che e pesi, si à di puartâle e no di strissinâle
• se o lin a puartâ la nestre crôs in place, o tornìn a cjase cu la nestre
• se tu i puartis afiet a la tô prole, atint a la campagne
• si puarte la barete par cuvierzi la tegne
• uciel che no si puarte la plume daûr, nol è uciel
• vizi di nature si puarte in sepulture