Dizionari de Lenghe Furlane

segnâ  se|gnâ  [FO]

1. v.tr. fâ o lassâ une linie o une forme:  a jerin vignûts forestîrs cun cjalcine e pinei. A segnarin une linie blancje (Tarcisio Venuti, La cjase di Toni); siôr Agnul al segnà une crôs, par tiere, cul stombli de scorie, propit denant dai cjavai, cuant che a stavin par partî (Maria Forte, Cjase di Dalban); lu puartarin sù distirât suntun braç di ramacis, cul cjâf a pendolon, che al segnave la strade di sanc (Dino Virgili, La aghe da pît la cleve)
   
   1. ancje proietâ, fâ percepî:  di gnot la lune palombe e segnave par tiere su lis pieris, ducj i volts, cu la sô lûs flapide (Maria Forte, I arcs)
2. v.tr. fâ un simbul cuntun ciert significât o cuntun ciert valôr, par esprimi o comunicâ alc o par visâsi di alc:  tai tescj dal cinccent e dal sîscent al è frecuent di doprâ secuencis di dôs vocâls par segnâ lis lungjis (Xavier Lamuela, La grafie furlane normalizade)
   
   1. scrivi alc par visâsal o par che altris si visin o sepin, par fâ une note, e v.i.:  o ai segnât sul notes lis oparis che mi àn fat plui impression (Arturo Feruglio, Viaç a Vignesie); al veve dut il timp par lâ li dal tren di Zurì, che tal orari al jere segnât a 18.40 (Agnul di Spere, In viaç di domenie)
3. v.tr. tignî cont di une cuantitât di marcjanzie o di bêçs di vê o di dâ:  paistu daurman o aio di segnâ?
   Sin. notâ
4. v.tr. [TS] sport (ancje ass.) intai sports di scuadre, otignî un pont pe sô scuadre:  mi cjati ancje bessôl cul puartîr denant, che o podarès fintâ, trai e segnâ (Stiefin Morat, Donald dal Tiliment)
   Sin. realizâ , fâ
5. v.tr. di un strument, mostrâ:  la svee sul comodin e segnave lis siet (Franca Mainardis, Aiar di cjase)
   Sin. marcâ , mostrâ , pandi , segnalâ
6. v.tr. dâ la misure dal timp che al passe o di alc che al sucêt a dadis regolârs:  il mont de semplice societât contadine furlane, che lu segnavin lis fiestis dai sants dal calendari e lis voris di stagjon tes campagnis (Adrian Cescje, Memoriis di politiche linguistiche)
   Sin. misurâ
7. v.tr. (ancje fig.) fâ ricognossi, permeti di capî, di individuâ:  lis cjarandis o lis filis dai morârs a segnavin lis proprietâts (Carlo Sgorlon, Ombris tal infinît)
   Sin. jessi¹ , marcâ , rapresentâ
   
   1. (ancje fig.) rapresentâ un element clâr e ricognossût, jessi o dâ une cierte carateristiche:  Finisterre, chê spice di cret sul Atlantic che e segne la fin dal mont cognossût (Antoni Beline, Sant Jacum, là che al finìs il mont)
8. v.tr. (ancje fig.) lassâ un efiet, une consecuence che si viôt:  e je une femine di pôc mancul di trente agns, un fisic magri, la muse, segnade de fadie, e je ancjemò graciose (Marisa Moretti, Neveade); chel pôc che a àn viodût lôr ur à segnade la anime par dute la vite (Antoni Beline, Sant Jacum, là che al finìs il mont)
9. v.tr. calcolâ o fâ calcolâ in maniere negative, spec. daûr de morâl o de considerazion publiche:  e je clare la reson che la int mi segnave pe strade (AAVV, Sul florî)
   Sin. bolâ , disonorâ , marcâ , condanâ , segnâ a dêt , segnâ cul dêt
10. v.tr. dâ indicazions o istruzions:  «Là sù, po, sore il borc». E rispuindè chê, segnant un troi (Josef Cjargnel, I pagans di Muine); al procurave di no slontanâsi trop dal puest che il pari i veve segnât cun tante precision (Franca Mainardis, La liende dal riûl)
    Sin. descrivi , dismostrâ , mostrâ , pandi , insegnâ¹
11. v.tr. viôt insegnâ¹ :  pipinute, ca ti prei / vuei segnâti propri a lei (Anute Fabris, La mestre da la pipine)
12. v.tr. (ancje fig.) decidi, definî une linie, un percors e v.i.:  il confin al è stât studiât pas par pas, dai sorestants de politiche e segnât dai stâts maiôrs des fuarcis vitoriosis (Josef Marchet, La man e la arme)
    
    1. puartâ a une cierte decision, a un ciert efiet:  lis resons che a àn segnât la fin de iluminazion a gas a son stadis pluitost leadis al pericul di incendi e al incuinament dai ambients iluminâts (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
    2. testemoneâ, dimostrâ une cierte decision o un ciert efiet:  al fo firmât sei dai rapresentants di Vignesie sei di chei da la Austrie il verbâl che al segnave la fin de resistence dai venezians (Giovanni Pillinini, Zuan Batiste Cavedalis - Une vite esemplâr)
13. v.tr. fâ il segn de crôs, fâ un mot di benedizion:  lu busse, lu segne cu la crôs, al pree (Pieri Menis, Funerâl a Pâl Piçul)

Polirematichis e espressions idiomatichis

• segnâ a dêt loc.v.
• segnâ cul dêt loc.v.
• segnâ il troi loc.v.
• segnâ la strade loc.v.