Dizionari de Lenghe Furlane

segnalâ  se|gna|lâ  [FO]

1. v.tr. meti in evidence o comunicâ midiant di segnâi:  al picje i doi fanâi ros e si dispon a partî e a fâ il so fat che al è di frenâ pes rivis jù e di segnalâ tai scambis che e je passade la travierse (Ivano Urli, Storie di Min)
   Sin. segnâ
2. v.tr. fâ cognossi, fâ savê:  i curadôrs [dal program "Telefon vert"] - cun Jacum Viole al lavore Adriano Venturini - a domandin ai scoltadôrs di segnalâ situazions che a capitin tal puest dulà che a vivin, deventant cussì protagoniscj de informazion (Max Mauro, Un Friûl difarent: i 90 mhz di Onde Furlane)
   
   1. fâ notâ, fâ presint alc par che si tegni in cont:  culì si vûl segnalâ almancul un pâr di cuistions saltadis fûr di chel scandai che nus somein significativis (Donato Toffoli, Relazion dal Grup di lavôr "Planificazion linguistiche")
      Sin. notâ , fâ notâ , marcâ , rimarcâ
   2. dâ informazions su alc o su cdn. che al pues jessi rilevant:  se un al è clandestin jo lu curi, ma daspò sta sigûr che lu segnali ai polizais (Maurizio Mattiuzza, La maiute di Zidane)
      Sin. segnâ , pandi
3. v.tr. di imprescj, aparâts e v.i., dâ une informazion:  il vôt dât al ven segnalât intal tabelon di pueste cun segnâi luminôs verts pal vôt a pro, ros pal vôt cuintri, blanc pe astension (Aministrazion Publiche, Regolament dal Consei Comunâl dal Comun di Udin)
   Sin. pandi , segnâ , mostrâ
4. v.tr. fâ capî, fâ dedusi:  la framentazion e la fitance medie - piçule e segnalave une incressite di rendite par etar (Adrian Cescje, Liniis di storie sociâl e economiche dal Friûl 1500 - 1800)
   Sin. pandi , segnâ , mostrâ