sponzi  /-ò-/  spon|zi  [CO]

  1. v.tr. causâ une pression concentrade intun pont, in câs fasint ancje mâl:  a gji gjavin fûr i voi, gji slambrin li vuarelis, lu tirin pai cjavei, lu sponzin cun guselis e clauts (Dolfo Zorzut, Bisugne nassi cu la cjamese!); [il ruscli] al è une plantute basse, cun fueutis verdis scuris [...] che a sponzin come demonis (Sandri Secco dai Juris, Lis pomulis dal Unviar)
    Sin. ponzi , becâ , pontâ
    1. di insets o altris besteutis, colpî cul asei o cun cualchi altri aparât, par fâ mâl, par supâ sanc, par scliçâ velen e v.i.:  Taresie, nancje che le ves sponzude une âf, e ve un strabalç (Gianni Gregoricchio, Trê feminis); al vignì fûr un avon che [...] al le a sponzi un omp su la gose (Sergio Visentin, Mûts di dî)
    2. dal aiar, dal frêt e v.i. causâ une sensazion di mâl o di fastidi:  mi plaseve di gjoldimi chê lûs gnove e chel aiarin che al sponzeve la muse (Alan Brusini, Gian Paolo Linda, I forescj)
      Sin. becâ , taiâ , taçâ , ponzi
    3. ancje di alc di imateriâl, causâ dolôr acût o fastidi o stimul:  si jevave e si tornave a insentâ; par un pinsîr che lu sponzeve dentri (Maria Forte, Slobar); e je la ore che il cîl / al piart colôr, / e dentri, plui fuart / e sponç la nostalgjie (Rina Smaniotto, Sot sere...); al nas un dubi che al sponç e al sburte a cirî (Pieri Piçul, Vieri e gnûf)
    4. (fig.) dâ fastidi, provocâ, ofindi a peraulis o cuntun mût di fâ:  simpri pronte / a ridi, a stuzigâ, a meti la prionte / tai discors di tô mari, / a cumbinâ un dispiet, / a sponzi, a mateâ (Ercole Carletti, Fumate); a olevin fâlu sbrocâ, lu sponzevin a pueste, lu stuzigavin par fâlu invelegnâ (Eugjeni Marcuç, Liende a Sant Zuan)
      Sin. becâ , stuzigâ , stocâ , ponzi
  2. v.tr. [BF] (ancje ass.) di robe di mangjâ o di bevi o di odôr, fâ une sensazion come di piçulis pontis o di brusôr in bocje o tal nâs
    Sin. becâ , ponzi
  3. v.tr. [CO, TS] med. sbusâ un vâs o un ingjâf dal cuarp, par fâ vignî fûr sanc o materie:  sponzint la pustole, si diminuìs la cuantitât di marce (Giuseppe Ferdinando del Torre, Il contadinel. Lunari par l'an 1858)
    Sin. ponzi , pontâ