Dizionari de Lenghe Furlane

impensâsi  im|pen|sâ|si  [FO]

1. v.pron.tr., v.pron.intr. vê presint te memorie:  al à scugnût lâ a cirî la clâf - che no si impensave plui là che le veve imbusade (Riedo Pup, I furlans e il muini); mi impensi di ce che mi contave mê puare none (Lucio Perès, Gno barbe Sisto)
   Sin. visâsi , ricuardâsi
2. v.pron.intr. vê a cûr, cjapâsi cure di cdn. o di alc:  [il cjan di nissun] al passe par dongje / al mene le code / al cîr cualchidun / che si impensi di lui (Ennio Zampa, Il cjan di nissun); e veve tant di chel cefâ a impensâsi di dut, a netâ di polvar lis antighis fotografiis, a fâ ordin tes vecjis cjartis (Franca Mainardis, Il sium di Lissandri)
   Sin. visâsi , pensâsi , stâ daûr , viodi , tignî cont
   
   1. tignî te juste considerazion:  impensaitsi mo, ancje di chê altre vite un grum plui impuartante, par vie che e durarà par simpri (Renzo Balzan, Vitis in Cjargne e misteris tal cûr)
3. v.pron.intr. concepî cu la ment, fâ un pinsîr, un resonament:  la Dosche si invià, ma dopo cualchi pas si impensà che forsit e faseve mâl a tratâ chel puar om in chê forme (Meni Ucel, Il cicin)
   Sin. pensâ , pensâsi , considerâ , calcolâ
   
   1. figurâ cu la ment, cu la fantasie robis pussibilis o ancje ireâls, ancje in espressions enfatichis:  di lâ vie di cjase no si impensave nancje parcè che no varès vût il cûr di bandonâ i siei viei (Pieri Somede dai Marcs, A jerin lagrimis); dutis lis cjasis cumò a àn une stanzie di bagn, impensâsi se no à il bagn jê! (Laurin Zuan Nardin, Il cop)
      Sin. insumiâsi , rapresentâsi , figurâsi , pensâsi , pensâ , imagjinâ , imagjinâsi
   2. calcolâ just, oportun, necessari:  la tierce [che e je lade vie dal paîs] no jere ni biele ni buine e nissun si è mai impensât di vaîle (Josef Marchet, Lis predicjis dal muini); "Ce ti impensistu di fâ cumò [sborfant lis plantis], no viodistu che al plûf?" (Alan Brusini, Amîs come prime)
4. v.pron.tr., v.pron.intr. deventâ o jessi cussient, meti la atenzion su di alc o su di cdn.:  [i fruts] a fasin des voltis stupidagjinis dome par che cualchidun si impensi di lôr (AAVV, Sul florî); spierdûts ta cuatri cjasis fumulis, ta un bûs dal Friûl, coma faia il Signour a impensâsi di nû? A si nas, a si vîf, a si mour. E Lui a nol sa nuia (Pier Paolo Pasolini, I Turcs tal Friûl)
   Sin. imparcevisi , incjolisi , indâsi , indaviodisi , intaiâsi , rindisi cont , visâsi , acuarzisi , inacuarzisi

Proverbis:

• a la sense cui che al à ce fâ, si impense