Dizionari de Lenghe Furlane

platâsi  pla|tâ|si  [AF]

1. v.pron.intr. (ancje fig.) metisi intun puest, intune posizion o intune cundizion che a permetin di no jessi viodût, scuviert, cjatât e v.i.:  là sù [tal cimitieri], di cualchi timp, scuasi ogni sere, al leve a platâsi un lari scjampât de preson, e in chê o in chê altre tombe al passave la gnot (Pieri Menis, Doi pizighets e un lari); dute scuintiade e scjampà a cjase e si platà daûr la puarte par no presentâsi in chel stât a sô mari (Luigi Gortani, La fie e la fiastre)
   Sin. scuindisi , nascuindisi , taponâsi , parâsi , celâsi
   Cfr. imbusâsi , intanâsi , inniâsi
   
   1. v.pron.tr. fâ che une part di se stes, alc che si à intor o sim. nol puedi jessi viodût:  jê si platave i voi tun sbalsim di pôre (Dino Virgili, Pôre tal nuie…)
2. v.pron.intr. fâ fente di no jessi intune cierte situazion, cundizion, di no vê une cierte responsabilitât e v.i.:  no vuei che chenti si continuedi a platâsi daûr de argomentazion che si à di spietâ la leç dal Parlament (Adrian Cescje, Memoriis di politiche linguistiche)
   
   1. v.pron.tr. fâ fente che alc nol sedi, tignîlu platât a se stes:  Pascolat al siere disint che "nol è di platâsi che intal Pci furlan a jerin in tancj", soredut i "inteletuâi", "che a disevin che al jere dut timp pierdût" (Walter Tomada, La vie furlane al socialisim)
3. v.pron.intr. metisi intune posizion o cundizion protete:  a venti al jere lât a platâsi une sorte di princip che, dopo di vê vuerezât par dut il Friûl, si rindè di ritirâsi culà, insiemi cu la sô int (Josef Cjargnel, I pagans di Muine); a scjampin ancje lôr a platâsi des bombis che a sivilin par aiar (Ivano Urli, Storie di Vera)
4. v.pron.intr. ancje di alc di inanimât o ancje cence volontât, jessi o lâ dentri di alc, daûr di alc o intun ciert puest o posizion o cundizion, in mût di no jessi viodût, scuviert, cjatât e v.i. cun facilitât:  la stanzie a ere cuasi scure, cuasi vueide […]. Insom si platave une panarie scridelide e scure, che a ere la sole mobilie dal louc (Stiefin Morat, Kebar krossè); sot de cinise si platin lis boris (Carli Pup, La seconde Irlande)
   Sin. scuindisi , nascuindisi , taponâsi , parâsi , celâsi
   
   1. dal soreli o di un altri astri o sim., finî in prospetive daûr di alc che nol permet di viodilu:  el Signôr e sant Pieri si cjatin a jessi intal mieç di un bosc propi cuant che el soreli al è par lâ a platâsi e la gnot a ven sù plancut cidine (Dolfo Zorzut, Viôt di no fâ dal mâl al furistîr); propit in chel la lune si platà daûr di un bâr di nûl neri (Pieri Menis, Vigji il cuintribandîr)
      Sin. discomparî , sparî , lâ jù , lâ sot , lâ daûr
5. v.pron.intr. (fig.) jessi presint sot di une aparence divierse:  sot de ande rassegnade e cuiete di jê, e veve di platâsi une ruze antighe (Gianni Gregoricchio, Delchi); il dificil al è capî ce che si plate sot dai simbui (Sandri Carrozzo, Il miluç de magne)
   Sin. scuindisi , nascuindisi , taponâsi , parâsi , celâsi