Dizionari de Lenghe Furlane

parâsi  pa|râ|si  [FO]

1. v.pron.intr., v.pron.tr. cirî di no vê dam di un pericul, di une menace e v.i., sedi materiâl che imateriâl:  al incjantonà la fie fra mûr e taule e al tacà a menâ la cengle. Tilde si ingrumà par tiere, cirint di parâsi la muse cui braçs (Gianni Gregoricchio, Trê feminis); cosacs e todescs a tornarin a passâ la Tor e a brusarin Nimis e Faedis e compagn a faserin sù pe Cjargne, obleant i partigjans a parâsi tai boscs (Francesc Placerean, Cuintristorie dal Friûl dal 1866 fint in dì di vuê)
   Sin. difindisi , riparâsi , protezisi
   Var. daparâsi
   
   1. difindisi di une cualsisei robe che e pues jessi in cualchi maniere negative:  mi paravi la muse dai claps e dal pulvin che il cjaval al jevave te sô corse (Alan Brusini, Come tai romançs); lis sioris cul ombrenin, par parâsi dal prin soreli (Pieri Menis, Il cuader de none); al veve tacât a plovi, prime planc e po dopo cussì fuart che a vevin scugnût lâ a parâsi sot di un toblât (Cristina Noacco, Faliscjis); Eliseo al fasè doi pas sù e jù pe strade, par parâsi dal frêt, po al tornà a sentâsi sul cjaruç, taponant lis gjambis miôr che al podeve cu la manteline (Carlo Sgorlon, Prime di sere)
   2. (iperb.) spec. cuntune negazion, in espressions che a vuelin dî une grande domande, une grande cuantitât di lavôr:  la int e à une malandrete fiere di comprâ e di meti de bande. I buteghîrs cualchi volte no rivin adore di parâsi (Josef Marchet, Il pietin e il grop)
2. v.pron.intr. cjatâ par se stes une scuse, une justificazion:  oms no simpri galantoms, ma dispès paris e parons autoritaris che si paravin daûr dal vincul matrimoniâl, fasint i lôr comuts (Angelo Floramo, Cuintristorie dal Nûfcent 1970-1980)
   Sin. discolpâsi , justificâsi
3. v.pron.intr., v.pron.tr. vistîsi cun cure:  il predi si pare pe cerimonie
   Sin. furnîsi , aparasi
   Cfr. cuinçâsi
4. v.pron.intr. metisi denant, lâ e fermâsi intun ciert puest:  lui, però, si parà intal mieç de strade (Gianni Gregoricchio, Trê feminis)
   Sin. fermâsi , plantâsi , postâsi , plaçâsi

Polirematichis e espressions idiomatichis

• ni lenzisi ni parâsi des moscjis loc.v.
• ni lenzisi ni parâsi di moscjis loc.v.

Proverbis:

• pariti lenghe se no ti tai