Dizionari de Lenghe Furlane

vignî jù    [FO]

1. loc.v. movisi, in câs ancje svicinantsi, di un puest che al è adalt a di un che al è abàs o di Nord a Sud:  dôs lagrimis i vignivin jù pe muse (Catarine Percude, La fuiace de Madone); vegnin jù i cjargnei de Cjargne / vegnin jù batint il tac (Popolâr, Vegnin jù i cjargnei de Cjargne); vignît jù une scjale, / cjalait, rimiraitle, / ce splendide sale (Romeo Battistig (?), Ai Piombi)
   
   1. vê une direzion di adalt a bas o di Nord a Sud, in câs ancje svicinantsi:  par rivâ là sù, dal Pas, si rimpinavisi par un canalon che al vignive jù come un slambri de «cupule» parsore vie e dulà che i secui a vevin ingrumât maseriis di claps (Pieri Menis, La vuere sul Freikofel); la stradute che e ven jù di Breçà (Dino Virgili, Cuel Valâr)
2. loc.v. in particolâr di ploie, nêf, tampieste, colâ dal cîl:  plovisine minudine, / lizerine, / tu vens jù cussì cidine / sence tons e sence lamps, / e tu dâs di bevi ai cjamps (Pieri Çorut, La plovisine); subit al sune il bot, ma ce frêt che al è difûr, al scomence a neveâ, e ven jù une nêf fine fine e za par tiere al è dut blanc (Pieri Somede dai Marcs, Gnot di Nadâl)
   
   1. (fig.) ancje dal scûr, de sere, de gnot, rivâ, tacâ:  in chês oris di dolce malincunie, misteriosis, plenis di cjants, di avemariis sunadis di lontan, cuant che e ven jù cidine la sere, che ducj e tornin stracs dal lavôr (Pieri Somede dai Marcs, O mi ricuardi); tornâ cjase, prime che e vegni jù la gnot (Ivano Urli, Il mus di Berto)
3. loc.v. pierdi ecuilibri, fuarce struturâl, o coesion, aderence e v.i. e colâ:  [cul taramot] tancj fabricâts a son vignûts jù o a son stâts butâts jù (Luigina Di Giusto, Andrea Guaran, Mauro Pascolini, La culine furlane); centenârs di metros cubos di cret e di arzilo e jero vignûts jù intun colp, fasint sparî la pachero (Fulvio ReddKaa Romanin, Geologicamente impossibile)
   Sin. sdrumâ , sdrumâsi , lâ jù , colâ¹
   
   1. (fig.) ancje di struture organizative, lâ in crisi, finî dal improvîs:  il scandul al à fat vignî jù il guvier
4. loc.v. vê une posizion che e je determinade dal pês che al tire injù:  i vignivin jù i cjavei pal cerneli, a lazaron vie (Dino Virgili, La aghe da pît la cleve)
   Sin. colâ¹ , pindulâ , pendâ
   
   1. vê une disposizion o une forme che e va daûr di une linie verticâl, dal alt al bas, soredut jessint picjât o fissât adalt:  […] cul fûc che al ardeve tal fogolâr bas, incjastrât tal mûr, cuntune nape che e vignive jù a trombe dal sofit altissim (Pieri Menis, Marum)

Components:

• jù av., adi.inv.
• vignî v.intr., v.aus.

Proverbis:

• a clopin plui i zenoi di disore a vignî jù, che no di abàs a lâ insù
• i bêçs no vegnin jù pai cops
• i bêçs no vegnin jù pal cjamin
• i dîs il cuviert al paron: se no tu vegnis sù tu, o ven jù jo