Dizionari de Lenghe Furlane

sbassâsi  sba|ssâ|si  [AF]

1. v.pron.intr. pleâsi injù:  al vignive un altri e si sbassave su la cassele a nasâ [i pierçui] (Meni Ucel, Piarçui); al pensà di sbassâsi, di tirâ fûr di sot di une casse une patate crude, e me consegnà (Pieri Menis, Il «miracul» di un ûf)
   Sin. pleâsi , tirâsi jù , disbassâsi
   
   1. vê une forme o une direzion che e va injù:  [culinis] che a van jù cjavalant viers di Cuie e Tarcint, dopo di seisi sbassadis, a un pont, par dâ il pas a une aghe che e je: la Lurane (Meni Ucel, La "Fieste dai Roncs")
      Sin. lâ jù , disbassâsi
   2. vê o fâ un moviment che al va injù:  i uciei si sbassavin a cjaps (Maria Forte, Cjase di Dalban); il soreli si sbassave daûr lis polessis altis là vie (Dino Virgili, La massarie)
      Sin. lâ jù , disbassâsi
2. v.pron.intr. deventâ plui bas, plui piçul, minôr, mancul fuart, mancul bondant e v.i.:  il presit al si è sbassât une vore (Angelo Covazzi, A tîr di doi); cheste sostance [la insuline] e mancje o si sbasse intai diabetics (Guglielmo Pitzalis, Scuvierzi il diabete)
   Sin. calâ , lâ jù , disbassâsi
3. v.pron.intr. (fig.) umiliâsi, pierdi o acetâ di pierdi la dignitât, l'onôr:  jo i varès dit che un campion nol pues sbassâsi a chei nivei e che ciertis reazions no son robis di fâ (Christian Romanin, Dino Zoff: «O vin lidrîs buinis, o vin di tignîlis di cont»); i grancj a fasin simpri plui furtune. E plui potents e prepotents a son e plui la int si sbasse e si prostituìs (Antoni Beline, Politichis 2001: la gnot de reson)
   Sin. ridusisi , disbassâsi
   
   1. acetâ di fâ alc par cortesie o par bontât, massime cuntun fâ di suficience:  voaltris, sprofumâts, intal cjalt in Invier e intal fresc in Istât, no si sbassais, no dîs a dânus une man, ma nancje a cjalânus, par pôre di sporcjâsi e infetâsi cu la nestre miserie…! (Alviero Negro, Int di masnade)

Proverbis:

• cui che nol sa sbassâsi a timp e lûc le finìs cul cjâf sbûs
• plui si sbassisi e plui si mostre il cûl