Dizionari de Lenghe Furlane

pleâsi  ple|â|si  [AF]

1. v.pron.intr. mudâ di forme, di posizion in maniere di no jessi plui dret:  i siei lavris si plearin a un riduçâ malinconic (Maria Forte, La tiere di Lansing); il nono al vuarì di chê spacade, ma nol jere plui chel di prin: […] si jere pleât - lui, cussì dret - tant che une cjandele tal cjalt (Pieri Menis, Il «trono» dal von); si viodevin i arbui plui dongje a stuarzisi, a tirâsi sù, a pleâsi di gnûf (Pieri Somede dai Marcs, La bissebove)
   Sin. pleâ , stuarzisi , butâ , pendâ ipon. , tirâ ipon. , trai ipon.
   Var. pleiâsi
   
   1. di cdn., sbassâ il cjâf o ancje la schene in segn di sumission, di rispiet, di scuse e v.i.:  la femine no finive plui di scusâsi e di pleâsi (Maria Forte, Cjase di Dalban)
   2. vê une forme che e zire o che e va daûr di une linie che no je drete o a plomp:  une caligrafie antighe, ma di frute, un corsîf cu lis letaris lungjis che si pleavin a man drete, tant che fîi di jerbe tal aiarin de sere (Raffaele Serafini, Altris contis di famee); cuntune fasse di ornament al nivel che la linie dal barcon e tache a pleâsi intun semicercli (Laurin Zuan Nardin, Gianluca Comar, Cosa resta delle case friulane del XVI secolo nella Bassa friulana)
   3. vê une forme che e va injù:  culinis pegris e lontanis che no finissin mai di lâ sù e di pleâsi (Alan Brusini, Par stradis lungjis)
   4. mudâ di direzion, in mût di no stâ plui dret o di no lâ plui dret:  la machine svolà fûr di strade crevant i arcazios dal ôr de fuesse e si pleà lant jù a sfracaiâsi (Sandri Di Suald, Ah! la provincie)
   5. (fig.) vê une cierte evoluzion, lâ intune cierte maniere:  di istès dut [il matrimoni] si pleà al mâl e lôr doi no rivarin a cjatâsi nancje te frute (Maria Forte, Cjase di Dalban)
2. v.pron.intr. (fig.) cambiâ di idee, disposizion, compuartament e v.i. daûr di circostancis esternis, ancje rinunziant ae proprie libertât:  il mont intîr al varès di pleâsi riverent a acetâ chest comant (Tarcisio Venuti, La cjase di Toni); nô o vin di pleâsi a chestis regulis, pleâsi cun rispiet e timôr a chê tiere mari che nus parturìs e nus nudrìs ma che e podarès ancje tramudâsi in madrigne e in tombe (Antoni Beline, Mari di muart, mari di vite)
   Sin. conformâsi , sbassâsi , uniformâsi , adeguâsi , adatâsi , socombi , sometisi , rindisi² , molâ , cedi , sbassâ il cjâf , ubidî
   
   1. lassâsi convinci:  no son stâts ni sants ni madonis, cui puedial voltâ un len di chê fate, crevâsi, murî, ma pleâsi mai… (Pieri Somede dai Marcs, Gnot di Nadâl)
   2. ancje introdusint costruzions infinitivis, fâ alc cuintri voie:  Guri al scombateve di bessôl par no pleâsi a scoltâ la veretât, par no confessâsi che e jere vere (Dino Virgili, La aghe da pît la cleve)

Proverbis:

• miôr pleâsi che no scjavaçâsi
• plui si pleisi e plui si mostre il cûl